Knattspyrnufélagið Valur

Núverandi tímabil
Knattspyrnufélagið Valur
Fullt nafn	Knattspyrnufélagið Valur
Gælunafn/nöfn	Valsarar, Hlíðarendapiltar
Stytt nafn	Valur
Stofnað	11. maí 1911
Leikvöllur	Origovöllurinn
Stærð	1201 sæti, 2225 alls
Stjórnarformaður	Árni Pétur Jónsson
Knattspyrnustjóri	Heimir Guðjónsson
Heimabúningur Útibúningur

Valur er íslenskt íþróttafélag sem hefur aðstöðu að Hlíðarenda. Félagið var stofnað þann 11. maí árið 1911 af drengjum í KFUM, að hluta til fyrir tilstilli séra Friðriks Friðrikssonar.

Í gegnum tíðina hefur félagið náð frábærum árangri á Íslandsmótum í knattspyrnu og handknattleik. Valur spilaði til úrslita í Evrópukeppni meistaraliða í handbolta karla, tímabilið 1979-80, og er eina íslenska liðið sem náð hefur þessum áfanga. Enn fremur er Valur sigursælasta boltaíþróttafélag Íslands með 120 Íslandsmeistaratitla og bikarmeistaratitla í þremur vinsælustu boltaíþróttum landsins. Árið 2019 var ár kvennaflokka Vals, en þá unnu allar kvennadeildir félagsins Íslandsmótið. Meistaraflokkar í handknattleik og körfuknattleik gerðu gott betur og unnu bikarmeistaratitla.

Starfsemi félagsins nú til dags er ekki einungis bundin við knattspyrnu, hjá Val er hægt að æfa knattspyrnu, handknattleik og körfuknattleik.

Saga félagsins

Fyrstu Árin

Árið 1911 var knattspyrnan enn á bernskuskeiði sem íþrótt á Íslandi. Knattspyrnan barst hingað laust fyrir aldamót, og eins og alls staðar hreif hún hugi ungra manna. Árið 1908 var stofnuð unglingadeild innan KFUM í Reykjavík og var séra Friðrik Friðriksson leiðtogi deildarinnar og naut óskoraðrar virðingar. Drengirnir sóttu ekki einungis fundi í KFUM hjá séra Friðriki, stofnað var taflfélag, hljómsveit var starfrækt og margt fleira.

Á þessum tíma fæddist hugmynd hjá KFUM drengjunum að stofna knattspyrnufélag en nokkur slík félög höfðu þá verið stofnuð í Reykjavík. Það var síðan 11. maí 1911 sem haldinn var fundur á lesstofu KFUM þar sem sex piltar stofnuðu Fótboltafélag KFUM en nafni félagsins var þegar sama ár breytt í Val. Sagan segir að þegar þessir stofnendur félagins voru að vinna við að laga knattspyrnuvöll sinn á Melunum í Reykjavík hafi fálki sveimað yfir höfðum þeirra og þar fengu þeir þá hugmynd að kalla félagð Val. Við vígslu fyrsta Valsvallarins á Melunum haustið 1911 hélt séra Friðrik ræðu þar sem hann hvatti piltana til að halda áfram á þeirri braut sem þeir höfðu lagt út á og áminnti þá jafnframt um heiðarleika í leik og starfi og að friður, kærleikur, samheldni, fegurð og atorka ætti að ríkja í starfinu og aldrei ætti að þrífast neitt ósæmilegt og ljótt. Árið 1915 tók Valur í fyrsta sinn þátt í Íslandsmótinu í knattspyrnu en auk þeirra kepptu Fram og KR í mótinu. Árið 1916 var stofnuð yngri deild í félaginu er nefndist Væringjar fyrir drengi í KFUM fram til 15 ára aldurs sem gengju þá í Val. Árið 1919 vann þessi hópur ungra Valsmanna svokallað Haustmót og var það fyrsti mótssigur félagsins.

1920-1930

Á 15 ára afmæli félagsins árið 1926 var ákveðið að gera merki fyrir félagið og var þar um að ræða mynd af skildi og á honum var mynd af val, vængjum þöndum, með knött í klónum. Efst í grunni merkisins var sól sem sendi geisla sína, rauða og bláa yfir félagsmerkið. Á þessu ári var einnig ákveðið að taka upp nýjan búning, en allt frá því að Valur eignaðist fyrst félagsbúning hafði hann verið hvít peysa með bláum langröndum, hvítar buxur og bláir sokkar. Nú var ákveðið að búningur félagsins skyldi vera rauð peysa, hvítar buxur og bláir sokkar. Þetta hefur síðan verið búningur félagsins en ekki hefur verið föst regla í sokkalit, en þeir hafa þó yfirleitt verið rauðir eða hvítir.

Fyrstu titlarnir

Valur vann sinn fyrsta Íslandsmeistaratitil árið 1930, nítján árum eftir að félagið var stofnað. Langþráður draumur var orðinn að veruleika, en séra Friðrik sagði við nýbakaða meistarana að vissulega væri sigur góður en ekki mætti ofmetnast eða sýna dramblæti, en alla tíð var séra Friðrik með ýmis heilræði til Valsmanna, m.a. um drengilegan leik og háttprýði. Félagið varð næst Íslandsmeistari í knattspyrnu 1933 og síðan óslitið fjögur ár í röð 1935-1938, aftur 1940 og síðan aftur fjögur ár í röð frá 1942-1945.

Á þessum árum rofnuðu smám saman þau sterku tengsl sem í upphafi höfðu verið milli Vals og KFUM, en enn þann dag í dag eru Valsmenn minnugir uppruna félagsins og minnast með virðingu og hlýju tengsla sinna við KFUM og séra Friðrik Friðriksson. Brjóstmynd af séra Friðriki Friðrikssyni var reist að Hlíðarenda árið 1961. Á steinsúluna eru rituð þau fleygu orð: Látið aldrei kappið bera fegurðina ofurliði, einkunnarorð sem eiga að vera leiðarljós og takmark allra Valsmanna í leik og starfi. Friðrikskapella að Hlíðarenda var vígð árið 1993 þegar 125 ár voru liðin frá fæðingu séra Friðriks.

Flutningur að Hlíðarenda

Þegar æfingavöllur Vals á Melunum var tekinn af félaginu 1926 undu félagsmenn því illa og unnu forystumenn félagsins ötullega að því að félaginu yrði bætt það tjón með nýju landi. Eftir langa mæðu fékk félagið loks úthutað svæði við rætur Öskjuhlíðar sem nefndist Haukaland. Svæðið var stórgrýtt og illt yfirferðar en með samtakamætti ruddu menn svæðið og athafnasvæði knattspyrnumanna í Val jókst smám saman og haustið 1935 útbjuggu Valsmenn völl á svæðinu í sjálfboðavinnu og var það mikið og erfitt verk. Þetta nýja svæði átti eftir að valda straumhvörfum hjá félaginu, ekki síst meðal yngstu knattspyrnumannanna, en um þessar mundir var farið að efna til keppni milli 3. og 4. flokks og var oftast keppt á Valssvæðinu að frumkvæði Vals. Átti það mikla unglingastarf sem kom í kjölfar hins nýja vallar eftir að bera ríkulegan ávöxt fyrir Val.

Árið 1939 markar merk spor í sögu Vals með kaupum á jörðinni Hlíðarenda við Öskjuhlíð. Á gamlársdag 1914 gaf bæjarstjórn Reykjavíkur úr erfðafestubréf fyrir 5,5 hekturum lands til Jóns Kristjánssonar, lagaprófessors, sem gaf jörðinni nafnið Hlíðarendi. Jón lést langt fyrir aldur fram í spænsku veikinni sem gekk yfir landið 1918. Skömmu fyrir andlát sitt seldi Jón landið Sveini Pálssyni en síðar sama ár lést Sveinn einnig úr spænsku veikinni. Árið 1919 flutti Guðjón Guðlaugsson Alþingismaður til Reykjavíkur og keypti Hlíðarenda af dánarbúi Sveins. Guðjón bjó að Hlíðarenda til æviloka, en hann lést 6. mars 1939. Frú Jóney Guðmundsdóttir, ekkja Guðjóns Guðlaugssonar Alþingismanns, bauð félaginu landið til kaups vorið 1939 og úr varð að félagið undirritaði kaupsamning um landið 10. maí 1939. Það var ósk Jóneyjar að selja landið Knattspyrnufélaginu Val fremur en til „[...] kaupsýslumanna sem sóttust enn fremur eftir því að eignast Hlíðarenda.“ Kaupverðið var 30.000 kr. en þar af nam útborgun kr. 5.000. Jörðin var 5,09 ha. að stærð, að mestu ræktað tún. Landinu fylgdi íbúðarhús, stórt fjós og hlaða. Til þess að fjármagna kaupin gaf félagið út 50 króna skuldabréf en fjármögnun stóð svo tæpt að ekki tókst að greiða stimpilgjöldin fyrr en nokkru síðar.

Í samtali við Frímann Helgason sem birtist í 30. tbl. Valsblaðsins árið 1972 lýsti Hólmgeir Jónsson kaupunum og skuldabréfaútgáfunni með eftirfarandi hætti:

„Mér er einna minnistæðast þegar Ólafur Sigurðsson skýrði frá því að hann ætlaði að leggja það til að Valur keypti Hlíðarenda. Ég var þá féhirðir í stjórninni og mér var kunnugt um að ekkert fé var til. Hann hafði ráð við því og lét að því liggja að við gæfum bara út 50 kr. skuldabréf. Nú, svo var þetta ákveðið, og farið að selja bréfin og gekk það allt vel, en heildarupphæðin var 5,000 krónur. Síðan varð ég fyrsti gjaldkeri Hlíðarendanefndar, og ég minnist ekki að hafa leyst inn nema tvö eða þrjú bréf. Síðan kom svo stríðið og verðgildi peninga rýrnaði, 50 krónur urðu lítils virði og munu fáir hafa krafizt greiðslu fyrir bréf sín.“

Ólafur Sigurðsson, þáverandi formaður Vals, átti mikinn þátt í kaupunum á landinu og skrifaði m.a. svo um kaupin í 3. tbl. Valsblaðsins árið 1941:

„Þó að kaupin hafi verið gerð er takmarkinu ekki náð. Þau eru aðeins upphafið. Upphaf þess starfs sem á að tryggja félaginu fagran og fullkominn samastað, þar sem unnt verði að einbeita allri orku félagsins að hinum eiginlegu verkefnum þess, íþróttaiðkunum sakir fullkominna ytri skilyrða og efnahagslegs sjálfstæðis [...] Við verðum að gera til hans meiri kröfur en nokkurn tíma hafa verið gerðar hér á landi í þessum efnum, svo miklar að þær standist kröfur tímans um næstu 100 ár a.m.k.“

Með kaupunum var langþráðu markmiði náð, Valur átti sitt eigið land í alfaraleið skammt frá gamla Valsvellinum og þar með lauk 28 ára hrakningasögu félagsins. Forystumenn félagsins höfðu háleitar hugsjónir um uppbyggingu að Hlíðarenda og horfðu til framtíðar, sáu fyrir sér draumsýnir um íþróttasvæði og íþróttamiðstöð en gerðu sér jafnframt grein fyrir því að langt yrði í land að draumur þeirra um framtíðarsvæði Vals rættist, en þeir höfðu tekið fyrsta skrefið.

Ekki var til fé til framkvæmda á jörðinni fyrst og sinn og var landið því leigt út til Geirs í Hlíð til 5 ára til að létta undir með félaginu. Einum hektara var þó haldið eftir til að nýta undir æfingar en Reykjavíkurflugvöllur var farinn að þrengja mjög að æfingasvæðinu sem þá var í notkun. Miklar deilur áttu sér stað innan félagsins sem utan um kaupin og var áskorun m.a. send til bæjarstjórnar um að taka 1.000 kr. árlega af félaginu "er færi svo gáluslega með fé sitt". Þessar óánægjuraddir þögnuðu árið 1944 þegar Hlíðarendanefnd skilaði 100.000 kr. hagnaði af bílahappdrætti og hlutaveltu. Arkitektarnemarnir Gísli Halldórsson og Sigvaldi Thordarson voru fengnir til þess að skipuleggja Hlíðarenda til framtíðar árið 1943 og skiluðu þeir af sér uppdrátti dagsettan í apríl sama ár. Á uppdrættinum mátti sjá fullburða leikvang með grasi, áhorfendastúkum og hlaupabraut, stóran malarvöll, knattspyrnuvöll drengja, utanhúss handboltavöll á grasi, tennisvelli, íþróttahús, félagsheimili, búningaaðstöðu, íbúð umsjónarmanns og sundlaug. Ekkert varð úr þessum áformum og ári síðar gerðu þeir annan uppdrátt þar sem útihús á svæðinu, fjósi og hlöðu var breytt í félagsaðstöðu, fundarherbergi og búningsklefa. Nýr malarvöllur var vígður 1949 og 1953 var grasvöllur tekinn í notkun að Hlíðarenda.

Straumhvörf urðu í starfi félagsins með tilkomu íþróttahúss að Hlíðarenda sem tekið var í notkun 1958 en húsið var fullgert 1960. Þetta íþróttahús var mikil lyftistöng fyrir Val, bæði fyrir íþróttaiðkun og allt félagsstarf. Árið 1971 var hafist handa við undirbúning að nýjum grasvelli í fullri stærð og bættum aðbúnaði áhorfenda. Valur varð fyrsta Reykjavíkurfélagið til þess að ná því marki að leika heimaleiki á eigin grasvelli en hann var vígður 1981. Á 9. áratugnum héldu framkvæmdir áfam og árið 1987 var tekið í notkun annað íþróttahús ásamt vallarhúsi og félagsheimili. Íþróttahúsið sem byggt var árið 1987 vék síðar fyrir nýrri íþróttahöll sem vígð var árið 2007. Samhliða því tóku Valsmenn í notkun nýjan keppnisleikvang, yfirbyggða stúku og félags- og skrifstofuaðstöðu. Þann 3. október 2015 vígðu Valsmenn nýjan keppnisvöll þar sem undirlagið var úr gervigrasi og leikur félagið nú heimaleiki sína á gervigrasi.

Fleiri íþróttagreinar

Allt frá stofnun Vals höfðu íþróttaiðkanir Valsmanna fyrst og fremst tengst knattspyrnunni. Á bernskuárum félagsins voru gönguferðir og hjólreiðar einnig veigamikill þáttur í félagsstarfinu en þær tengdust oftast á einn eða annan hátt knattspyrnunni og æfingum. En í kringum 1940 fara nýjar íþróttagreinar að nema land hjá félaginu. Fyrst handknattleikur, en hann hafði raunar verið liður í þjálfun knattspyrnumanna félagsins um árabil. Árið 1940 var efnt til fyrsta Íslandsmóts í handknattleik sem Valsmenn unnu og allt síðan hefur handknattleikur verið mjög vinsæl íþróttagrein hjá Val og meðal landsmanna. Valsmenn vörðu Íslandsmeistaratitilinn 1941 og 1942 og aftur 1944. Valsmenn hafa ávallt átt velgengni að fagna í handknattleik þegar á heildina er litið þótt stundum hafi starfið dalað um tíma.

Konur í Val

Á fyrstu árum félagsins á meðan tengslin voru hvað mest við KFUM áttu eðli málsins samkvæmt einungis piltar aðild að Val. Á fyrstu starfsáratugum Vals var einnig lítið um að stúlkur stunduðu íþróttir, slíkt þótti jafnvel ekki kvenlegt. Helst var að stúlkur stunduðu fimleika eða sund, knattleikir þóttu ekki við þeirra hæfi. Tíðarandinn breyttist mjög á stríðsárunum og að því kom að kvennadeild var stofnuð í Val og var handknattleiksdeild kvenna stofnuð hjá félaginu 1948.

Æ síðan hafa kvennaflokkar í knattspyrnu og handknattleik staðið fyrir sínu, ekki aðeins á íþróttavöllunum, heldur einnig í hinu félagslega starfi og sú ákvörðun að veita konum aðgang að félaginu varð til þess að styrkja Val mikið félagslega. Það var ekki fyrr en eftir stofnun kvennadeilda sem hægt var að tala um Val sem alhliða íþrótta- og æskulýðsfélag. Það var fyrst árið 1962 sem þær hrepptu Íslandsmeistaratitilinn og um langan tíma var kvennalið Vals ósigarandi í handknattleik Sigríður Sigurðardóttir, handknattleikskona úr Val var kjörin íþróttamaður ársins 1964, fyrst kvenna.

Á 8. áratugnum náði kvennaknattspyrna að skjóta rótum hjá Val og félagið hampaði sínum fyrsta Íslandsmeistaratitli í kvennaknattspyrnu árið 1978. Á 9. áratugnum átti Valur sigursælasta lið landsins í kvennaknattspyrnu.

Deildaskipting

Árið 1959 var gerð veigamikil skipulagsbreyting hjá félaginu er tekin var upp deildaskipting. Ákveðið var að skipta Val í þrjár deildir: Handknattleiksdeild, knattspyrnudeild og skíðadeild og kjósa sérstakar stjórnir þessara deilda. Áttu deildirnar að starfa nokkuð sjálfstætt og taka ákvarðanir um eigin mál en aðalstjórn félagsins átti að fara með æðsta vald í félaginu milli aðalfunda.

Á 7. áratugnum var stofnuð badmintondeild hjá Val en deildin náði aldrei að eflast verulega. Einnig átti skíðaíþróttin erfitt uppdráttar hjá félaginu, fyrst og fremst vegna þess að önnur íþróttafélög buðu upp á betri aðstöðu, en félagið átti þó stóran skíðaskála sem reistur var 1943 í Sleggjubeinsdal og var mikið notaður í félagsstarfinu. Árið 1970 var síðan 5. íþróttadeildin stofnuð hjá Val, körfuknattleiksdeild og gerðist það með þeim hætti að Körfuknattleiksfélag Reykjavíkur KFR sem verið hafði starfandi frá 1951 óskaði eftir stofnun körfuknattleiksdeildar hjá Val og þar með inngöngu í félagið. Á ýmsu gekk hjá deildinni fyrstu árin en fljótlega fór starfið að eflast og árið 1980 kom að því að félagið hlaut sinn fyrsta Íslandsmeistaratitil í körfuknattleik.

Sprengja í iðkun

Gífurleg breyting varð á öllu íþróttalífi Íslendinga á áttunda áratugnum og segja má að íþróttavakning hafi átt sér stað. Valur fór ekki varhluta af þessari íþróttavakningu. Mjög mikil sókn var á öllum vígstöðvum hjá félaginu, enda vel í stakk búið til þess að taka á móti fjölda fólks og búa unglingum æskilega aðstöðu til æfinga og leikja. Allt frá stofnun félagsins árið 1911 hafði Valur verið stórt nafn í íslenskum íþróttaheimi en sennilega hefur stjarna félagsins aldrei risið eins hátt og á áttunda átatugnum. Valur varð þá að stórveldi í nær öllum íþróttagreinum sem stundaðar voru innan félagsins, bæði í meistaraflokkum og yngri flokkum. Ungilngastarfið hjá félaginu tók stökk fram á við og öll skipulagning félagsstarfsins þótti til mikillar fyrirmyndar. Barna- og unglingastarf hjá Val hefur í gegnum tíðina verið mjög öflugt og hefur þetta öfluga starf orðið til þess að Valur hefur lengst af tvímælalaust verið eitt sterkasta íþróttafélag á Íslandi og markið hefur ávallt verið sett hátt.

Af félagsins hálfu hefur jafnan verið lögð áhersla á að fá hæft fólk til þess að leiðbeina hinum ungu og er ekki síður mikilvægt að búa börnum og unglingum góða aðstöðu. Árangur unglingaliða félagsins sýnir hversu starfið hefur verið öflugt en ótaldir eru þeir Íslandsmeistaratitlar og aðrir titlar sem ungt Valsfólk af báðum kynjum hefur fært félagi sínu á undanförnum áratugum og það sem er einkar ánægjulegt fyrir félagið er að flest það fólk sem skarað hefur fram úr í íþróttum hjá Val hefur alist upp hjá félaginu og hefur það verið einkennandi fyrir starfið.

Segja má að skipulag unglingastarfsins hafi í stórum dráttum haldist hið sama í áratugi. Aldursflokkaskipting hefur þó verið mismunandi. Lengi vel höfðu þeir yngstu fá verkefni við sitt hæfi, aðeins var keppt í 2. og 3. flokki, síðar bættust 4. -6. flokkur við og á síðustu árum 7. flokkur hjá piltum og 6. flokkur hjá stúlkum. Þegar árið 1938 var stofnað til unglingaleiðtogaembættis innan aðalstjórnar félagsins sem sýnir hversu félagið hefur snemma látið sig unglingastarfið sérstaklega varða enda var félagið upphaflega stofnað sem unglingafélag í tengslum við æskulýðsstarf KFUM. Síðar tóku við unglinganefndir sem önnuðust skipulag unglingamálanna en mesta breytingin varða árið 1959 er deildarskiptingin var tekin upp og hverri deild fyrir sig var valin ákveðin stjórn.

Knattspyrna

Karlar

Á Íslandi

Karlalið Vals hefur sigrað efstu deild Íslandsmótsins 23 sinnum og unnið bikarkeppni KSÍ 11 sinnum, aðeins nágrannaliðið KR hefur borið oftar sigur úr býtum en Valur. Valur á einnig met yfir lengsta veru í efstu deild íslandsmótsins, en félagið var sleitulaust í efstu deild frá 1915-1999 og nær því þeim merka áfanga, eitt íslenskra liða, að hafa verið í efstu deild í 75 ár. Önnur stórlið sem hafa afrekað þetta eru Mílanó liðin AC og Inter, Juventus, Barcelona og Real Madrid, svo fátt eitt sé nefnt. Í gegnum tíðina hefur félagið alið af sér fjöldann allan af atvinnu og landsliðsmönnum í knattspyrnu, þar með talinn fyrsta atvinnumann Íslendinga í knattspyrnu Albert Guðmundsson. Núverandi þjálfari liðsins er Heimir Guðjónsson og honum til aðstoðar er Srdjan Tufegdzic.

Í Evrópukeppnum

Karlalið Vals í knattspyrnu keppti sína fyrstu Evrópuleiki í undankeppni Evrópukeppni Bikarhafa tímabilið 1966-1967, þar mættu þeir Standard Liége frá Belgíu, eftir jafntefli í heimaleiknum tapaði Valur stórt á útivelli og samanlagt 9-2. Tveimur árum síðar drógust Valsarar gegn Benfica frá Portúgal, heimaleikur Vals fór fram á Laugardalsvellinum. Áhorfendamet var slegið þegar 18.243 greiddu sig inn á völlinn. Flestum á óvart gerðu liðin markalaust jafntefli í leiknum, En Benfica hafði í maí, sama ár, leikið til úrslita í Evrópukeppni félagsliða gegn Manchester United. Í liði Benfica í leiknum gegn Val voru nokkrir portúgalskir landsliðsmenn, t.d. Simoes, Torres, Augustino og að ógleymdum svarta pardusinum, Eusébio. Tveimur árum fyrr höfðu þessir menn hreppt bronsverðlaun með portúgalska landsliðinu á HM í Englandi 1966, fyrrnefndur Eusébio var markakóngur mótsins. Alls hefur Valur tekið þátt í Evrópukeppnum 20 sinnum, með ágætum árangri.

Tímabil	Keppni	Umferð	Mótherji	Heima	Úti	Úrslit
1966–67	Evrópukeppni bikarhafa	Forkeppni	Standard Liège	1–1	1–8	2–9
1967–68	Evrópukeppni félagsliða	Fyrsta umferð	Jeunesse Esch	1–1	3–3	4–4(ú)
		Önnur umferð	Vasas	0–6	1–5	1–11
1968–69	Evrópukeppni félagsliða	Fyrsta umferð	Benfica	0–0	1–8	1–8
1974–75	UEFA bikarinn	Fyrsta umferð	Portadown	0–0	1–2	1–2
1975–76	Evrópukeppni bikarhafa	Fyrsta umferð	Glasgow Celtic	0–2	0–7	0–9
1977–78	Evrópukeppni félagsliða	Fyrsta umferð	Glentoran	1–0	0–2	1–2
1978–79	Evrópukeppni bikarhafa	Fyrsta umferð	1. FC Magdeburg	1–1	0–4	1–5
1979–80	Evrópukeppni félagsliða	Fyrsta umferð	Hamburg	0–3	1–2	1–5
1981–82	Evrópukeppni félagsliða	Fyrsta umferð	Aston Villa	0–2	0–5	0–7
1985–86	UEFA bikarinn	Fyrsta umferð	Nantes	2–1	0–3	2–4
1986–87	Evrópukeppni félagsliða	Fyrsta umferð	Juventus	0–4	0–7	0–11
1987–88	UEFA bikarinn	Fyrsta umferð	Wismut Aue	1–1	0–0	1–1(ú)
1988–89	Evrópukeppni félagsliða	Fyrsta umferð	Monaco	1–0	0–2	1–2
1989–90	Evrópukeppni bikarhafa	Fyrsta umferð	Dynamo Berlin	1–2	1–2	2–4
1991–92	Evrópukeppni bikarhafa	Fyrsta umferð	Sion	0–1	1–1	1–2
1992–93	Evrópukeppni bikarhafa	Fyrsta umferð	Boavista	0–0	0–3	0–3
1993–94	Evrópukeppni bikarhafa	Forkeppni	MyPa	3–1	1–0	4–1
	Evrópukeppni bikarhafa	Fyrsta umferð	Aberdeen	0–3	0–4	0–7
2006–07	UEFA bikarinn	Fyrsta umferð	Brøndby IF	0–0	1–3	1–3
2008–09	Meistaradeild Evrópu	Fyrsta umferð	BATE Borisov	0–1	0–2	0–3
2016–17	Evrópudeildin	Fyrsta umferð	Brøndby IF	1–4	0–6	1–10
2017–18	Evrópudeildin	Fyrsta umferð	Ventspils	1–0	0–0	1–0
		Önnur umferð	Domžale	1–2	2–3	3–5
2018–19	Meistaradeild Evrópu	Fyrsta umferð	Rosenborg	1–0	1−3	2–3
	Evrópudeildin	Önnur umferð	FC Santa Coloma	3–0	0–1	3–1
		Þriðja umferð	Sheriff Tiraspol	2–1	0–1	2–2 (ú)
2019–20	Meistaradeild Evrópu	Fyrsta umferð	Maribor	0−3	0−2	0−5
	Evrópudeildin	Önnur umferð	PFC Ludogorets Razgrad	1−1	0−4	1−5

Minjagripur frá leiknum við Benfica 1968.

Núverandi leikmenn meistaraflokks karla í knattspyrnu

Nú. Staða Leikmaður 1 GK Hannes Þór Halldórsson 25 GK Sveinn Sigurður Jóhannesson 2 DF Birkir Már Sævarsson 21 DF Orri Sigurður Ómarsson 26 DF Ólafur Karl Finsen 7 MF Haukur Páll Sigurðsson 15 MF Andri Adolphsson 3 DF Patrick Pedersen 11 MF Kári Daníel Alexandersson 10 MF Kristinn Freyr Sigurðsson 4 MF Einar Karl Ingvarsson

Nú. Staða Leikmaður 29 DF Sigurður Egill Lárusson 30 FW Rasmus Christiansen 23 MF Lasse Petry 31 MF Eiður Aron Sigurbjörnsson 20 MF Magnus Egilsson 5 DF Kaj Leo í Bartalsstovu 14 MF Birkir Heimisson 22 DF Ívar Örn Jónsson 18 FW Valgeir Lunddal Friðriksson 6 FW Sebastian Hedlund

Ath: Fánar eru tákn fyrir það þjóðerni sem skráð eru hjá FIFA. Leikmenn gætu haft fleiri en eitt ríkisfang.

Valur varð Íslandsmeistari í knattspyrnu karla 2007, það tímabil lék liðið heimaleiki sína á Laugardalsvelli, enda stóð endurnýjun yfir á Hlíðarendasvæðinu. Helgi Sigurðsson sést hér í forgrunni og fyrir aftan er Pálmi Rafn Pálmason.

Gengi meistaraflokks karla í knattspyrnu í gegnum tíðina

Gengi meistaraflokks karla í knattspyrnu í gegnum tíðina

Tímabil	Sæti		Tímabil	Sæti		Tímabil	Sæti		Tímabil	Sæti		Tímabil	Sæti		Tímabil	Sæti
1915	3		1936	1		1957	3		1978	1		1999	9		2020	1
1916	3		1937	1		1958	3		1979	3		2000	2. sæti í 1. deild
1917	3		1938	1		1959	4		1980	1		2001	9
1918	3		1939	4		1960	4		1981	5		2002	1. sæti í 1. deild
1919	4		1940	1		1961	3		1982	5		2003	10
1920	Tóku ekki þátt		1941	2		1962	2		1983	5		2004	1. sæti í 1. deild
1921	Tóku ekki þátt		1942	1		1963	3		1984	2		2005	2*
1922	Tóku ekki þátt		1943	1		1964	4		1985	1		2006	3
1923	3		1944	1		1965	5*		1986	2		2007	1
1924	4		1945	1		1966	1		1987	1		2008	5
1925	4		1946	3		1967	1		1988	2*		2009	8
1926	5		1947	2		1968	3		1989	5		2010	7
1927	2		1948	3		1969	5		1990	4*		2011	5
1928	2		1949	3		1970	5		1991	4*		2012	8
1929	2		1950	5		1971	5		1992	4*		2013	5
1930	1		1951	2		1972	5		1993	6		2014	5
1931	2		1952	4		1973	2		1994	4		2015	5*
1932	2		1953	2		1974	3*		1995	7		2016	5*
1933	1		1954	4		1975	3		1996	5		2017	1
1934	2		1955	3		1976	1*		1997	8		2018	1
1935	1		1956	1		1977	2*		1998	8		2019	6

Stjörnumerkt ár vannst bikarkeppni karla í knattspyrnu.

Gullskórinn

Gullskórinn hefur verið veittur markahæsta leikmanni efstu deildar í knattspyrnu karla allar götur frá 1917, þess ber þó að geta að engin gögn eru til um markahæstu leikmenn íslandsmótsins frá 1920 og til og með 1934. Eftirtaldir Valsmenn hafa hreppt hnossið:

Timabil	Nafn	Mörk
1935	Magnús Bergsteinsson	3
1936	Óskar Jónsson	5
1937	Óskar Jónsson	3
1938	Magnús Bergsteinsson*	3
1940	Sigurpáll Jónsson*	4
1942	Ellert Sölvason	6
1944	Sveinn Sveinsson	2
	Sveinn Helgason	2
	Jóhann Eyjólfsson	2
1947	Albert Guðmundsson	3
	Einar Halldórsson	3
1950	Halldór Halldórsson	3
1967	Hermann Gunnarsson	12
1968	Reynir Jónsson*	8
1973	Hermann Gunnarsson	17
1976	Ingi Björn Albertsson	16
1980	Matthías Hallgrímsson	13
1983	Ingi Björn Albertsson	14
1988	Sigurjón Kristjánsson	13
2015	Patrick Pedersen	13
2018	Patrick Pedersen	18

Stjörnumerktir leikmenn deildu titlinum með öðrum. Tímabilið 1983 varð Ingi Björn Albertsson fyrsti karlinn til þess að skora 100 mörk í efstu deild. Hann náði þessum áfanga í leik gegn KR þann 18. júní. Ingi er einn þriggja til að skora yfir 100 mörk í efstu deild og næst markahæsti leikmaðurinn í sögu efstu deildar í knattspyrnu.

Konur

Á Íslandi

Sömu sögu er að segja af kvennaliði Vals og karlaliði, þ.e. kvennadeild Vals í knattspyrnu er einnig sú næst sigursælasta á landinu m.t.t. sigra á Íslandsmóti. Fyrsti sigur liðsins í Íslandsmótinu kom 1978 og eru þeir orðnir ellefu talsins, sá síðasti vannst sumarið 2019. Fyrsti bikartitillinn kom í hús árið 1984 og hefur ekkert annað lið unnið bikarkeppnina jafn oft og Valskonur, en þær hafa sigrað keppnina alls 13 sinnum. Frá 2004 til 2008, undir stjórn Elísabetar Gunnarsdóttur og með Margréti Láru Viðarsdóttur í fararbroddi sigraði liðið Íslandsmótið fjórum sinnum af fimm mögulegum skiptum. Núverandi þjálfari liðsins er Pétur Pétursson, honum til aðstoðar er Eiður Benedikt Eiríksson.

Í Evrópukeppnum

Valur hefur náð fínum árangri í meistaradeild Evrópu í knattspyrnu, en besti árangur félagsins í meistaradeild kvenna í knattspyrnu náðist tímabilið 2005-06, þegar liðið komst í 8-liða úrslit, þá undir stjórn fyrrnefndar Elísabetar. Tímabilin 2005-06, 2007-08 og 2008-09 var Margrét Lára Viðarsdóttir markahæsti leikmaður keppninnar.

Tímabil	Keppni	Umferð	Mótherji	Heima	Úti	Úrslit
2005-06	Meistaradeild Evrópu	Forkeppni	Røa Idrettslag	4-1	n/a	4-1
			United Jakobstad	2-1	n/a	2-1
			Pärnu FC	8-1	n/a	8-1
		Riðlakeppni	Djurgården/Älvsjö	1-2	n/a	1-2
			ZFK Masinac Classic Niš	3-0	n/a	3-0
			Alma KTZH	8-0	n/a	8-0
		Átta liða úrslit	Turbine Potsdam	1-8	11-1	2-19
2007-08	Meistaradeild Evrópu	Forkeppni	Honka	2–1	n/a	2–1
			KÍ Klaksvík	6–0	n/a	6–0
			ADO Den Haag	5–1	n/a	5–1
		Riðlakeppni	Frankfurt	3–1	n/a	3–1
			Rapide Wezema	4–0	n/a	4-0
			Everton	3–1	n/a	3–1
2008-09	Meistaradeild Evrópu	Forkeppni	Cardiff City LFC	8–1	n/a	8–1
			FC FK Slovan Duslo Šaľa	6–2	n/a	6–2
			Maccabi Holon	9-0	n/a	9-0
		Riðlakeppni	Umeå IK	1-5	n/a	1-5
			ASD CF Bardolino	2–3	n/a	2–3
			Alma KTZH	8-0	n/a	8-0
2009-10	Meistaradeild Evrópu	32-liða úrslit	Torres	1-2	1-4	2-6
2010-11	Meistaradeild Evrópu	32-liða úrslit	Rayo Vallecano	1-1	0-3	1-4
2011-12	Meistaradeild Evrópu	32-liða úrslit	Glasgow City	0-3	1-1	1-4

Núverandi leikmenn meistaraflokks kvenna í knattspyrnu

Nú. Staða Leikmaður 1 GK Sandra Sigurðardóttir 25 GK Auður Sveinbjörnsdóttir 2 DF Diljá Ýr Zomers 21 DF Vesna Elísa Smiljkovic 26 DF Guðrún Karítas Sigurðardóttir 7 MF Arna Eiríksdóttir 15 MF Málfríður Anna Eiríksdóttir 3 DF Bergdís Fanney Einarsdóttir 11 MF Ásdís Karen Halldórsdóttir 10 MF Fanndís Friðriksdóttir 4 MF Ásgerður Stefanía Baldursdóttir

Nú. Staða Leikmaður 29 DF Dóra María Lárusdóttir 30 FW Guðný Árnadóttir 23 MF Elín Metta Jensen 31 MF Lillý Rut Hlynsdóttir 20 MF Hlín Eiríksdóttir 5 DF Hallbera Guðný Gísladóttir 14 MF Ída Marín Hermannsdóttir 22 DF Elísa Viðarsdóttir 18 FW Ólöf Sigríður Kristinsdóttir 6 FW Margrét Lára Viðarsdóttir

Ath: Fánar eru tákn fyrir það þjóðerni sem skráð eru hjá FIFA. Leikmenn gætu haft fleiri en eitt ríkisfang.

Gengi meistaraflokks kvenna í knattspyrnu í gegnum tíðina

Tímabil	Sæti		Tímabil	Sæti		Tímabil	Sæti		Tímabil	Sæti		Timabil	Sæti
1977	3		1987	2*		1997	3		2007	1		2017	3
1978	1		1988	1*		1998	2		2008	1		2018	3
1979	2		1989	1		1999	3		2009	1*		2019	1
1980	2		1990	3*		2000	5		2010	1*		2020	2
1981	3		1991	2		2001	4*		2011	2*
1982	2		1992	3		2002	3		2012	4
1983	2		1993	4		2003	3*		2013	2
1984	Riðlakeppni*		1994	3		2004	1		2014	7
1985	3*		1995	2*		2005	2		2015	7
1986	1*		1996	4		2006	1*		2016	3

Sumarið 2008 skoraði Valsliðið 91 mark á Íslandsmótinu og bætti eigið met frá árinu áður um 3 mörk.

Gullskórinn

Gullskórinn hefur verið veittur markahæsta leikmanni tímabilsins í efstu deild kvenna frá árinu 1981. Eftirfarandi Valskonur hafa hreppt gullskóinn:

Gullskórinn

Tímabil	Nafn	Mörk
1986	Kristín Arnþórsdóttir	22
1987	Ingibjörg Jónsdóttir	16
1988	Bryndís Valsdóttir	12
1989	Guðrún Sæmundsdóttir	12
1999	Ástgerður Hildur Ingibergsdóttir	20
2005	Margrét Lára Viðarsdóttir	23
2006	Margrét Lára Viðarsdóttir	34
2007	Margrét Lára Viðarsdóttir	38
2008	Margrét Lára Viðarsdóttir	32
2009	Kristín Ýr Bjarnadóttir	23
2010	Kristín Ýr Bjarnadóttir	23
2012	Elín Metta Jensen	18

Tímabilið 2007 skoraði Margrét Lára Viðarsdóttir 38 mörk í aðeins 16 leikjum, eða 2,4 mörk að meðaltali í hverjum leik. Hvorki fyrr né síðar hefur leikmaður í efstu deild karla eða kvenna skorað fleiri mörk á sama tímabili.

Þjálfarar meistaraflokks karla í knattspyrnu

• Guðmundur H. Pétursson (1930)
• Reidar Sörensen (1933–35)
• Murdo MacDougall (1935–37)
• Murdo MacDougall & Robert Jack (1937–38)
• Murdo MacDougall (1938)
• Joe Devine (1939)
• Joe Devine (1948)
• Hermann Hermannsson (1955)
• Óli B. Jónsson (1967–68)
• Yuri Illichev (1973–74), (1976–77)
• Nemes Gyula (1978–79)
• Volker Hofferbert (1980)
• Klaus-Jürgen Hilpert (1982)
• Claus Peter (1982–83)
• Ian Ross (1984–87)
• Hörður Helgason (1988–89)

• Guðmundur Þorbjörnsson (1989)
• Ingi Björn Albertsson (1990–91)
• Kristinn Björnsson (1992–93)
• Sigurður Dagsson (1996)
• Sigurður Grétarsson (1996)
• Kristinn Björnsson (1997–99)
• Ejub Purišević (2000–01)
• Þorlákur Árnason (2002–03)
• Njáll Eiðsson (2004)
• Willum Þór Þórsson (okt. 2004 – júlí 2009)
• Atli Eðvaldsson (júli- sept. 2009)
• Gunnlaugur Jónsson (sept. 2009 – sept. 2010)
• Kristján Guðmundsson (sept. 2010 – okt. 2012)
• Magnús Gylfason (okt. 2012 –okt. 2014)
• Ólafur Jóhannesson (okt. 2014-okt. 2019)
• Heimir Guðjónsson (okt. 2019- )

Handknattleikur

Karlar

Á Íslandi

Handknattleiksdeild Vals á sér langa sögu innan handboltans á Íslandi, félagið hefur skipað sér með þeim sigursælustu í íþróttinni hérlendis og er hefur ekkert lið unnið Íslandsmótið né bikarkeppnina í handbolta jafn oft og Valur karlamegin, Karlalið Vals tók þátt í fyrsta Íslandsmótinu í handbolta, tímabilið 1939-40 og stóð uppi sem sigurvegari, eftir að hafa unnið alla leiki sína í riðlinum. Þegar hefðbundnu deildafyrirkomulagi var komið á tímabilið 1947-1948 voru Valsarar vitaskuld með og gott betur en allar götur síðan hefur Valur átt lið í efstu deild karla í handknattleik. Með Val hafa margir fræknir handknattleiksmenn leikið, ber þar helst að nefna silfurverðlaunahafa Íslands á Ólympíuleikunum í Peking árið 2008. Þá Snorra Stein Guðjónsson og Ólaf Stefánsson. Núverandi þjálfari liðsins er Snorri Steinn Guðjónsson og honum til aðstoðar er Óskar Bjarni Óskarsson.

Í Evrópukeppnum

Í byrjun áttunda áratugar síðasta aldar varð til hin svokallaða „mulningsvél“ til en höfundur hennar er talinn vera Reynir Ólafsson sem tók við þjálfun karlaliðs Vals árið 1970. Hann mun strax hafist handa við að bæta varnarleik liðsins sem þótti ekki góður. Reyni tókst vel að gera þær lagfæringar sem þurfti og fljótlega þótti Valsvörnin óárennileg og fékk fyrir vikið fyrrgreint viðurnefni. „Mulningsvélin“ náði þó ekki að skila Íslandsbikarnum heim á Hlíðarenda fyrr en 1973 en það ár varð kvennalið Vals einnig Íslandsmeistari og því um stórt ár að ræða hjá handknattleiksfólki Vals. „Mulningsvélin“ varð síðan Íslandsmeistari þrjú ár í röð 1977, 1978 og 1979, þótt nokkuð hafi verið farið að kvarnast úr hópnum undir það síðasta.

Stærsta afrek „Mulningsvélarinnar“ var án efa að komst í úrslit í Evrópukeppni meistaraliða árið 1980. Frækilegir sigrar unnust á leiðinni í úrslit, m.a. voru spænsku meistararnir í Atlético Madrid lagðir að velli í undanúrslitum. Eftir þriggja marka tap ytra í fyrri leiknum, 24:21, vann Valur heimaleikinn sem fram fór í Laugardalshöll snemma árs 1980, 18:15, í einum eftirminnilegasta handboltaleik sem þar hefur farið fram. Stefán Gunnarsson skoraði 18. og síðasta markið og Ólafur Benediktsson fór á kostum í markinu og átti ekki hvað sístan þátt í að Valsliðið náði að tryggja sér þriggja marka sigur sem nægði til að komast í úrslit.

Þegar kom að úrslitaleiknum við þýska liðið Grosswallstadt ákvað Valur að selja heimaleikjaréttinn af fjárhagsástæðum. Úrslitaleikurinn var háður í Ólympíuhöllinni í München og tapaðist, 21:12. Aldrei síðar hefur íslenskt félagslið komst í úrslitaleik í Evrópukeppni, Valsmenn komust þó nærri því að leika afrek sitt eftir tímabilið 2016-17, en þá duttu þeir út í undanúrslitum áskorendabikars Evrópu í handknattleik.

Árangur Karlaliðs Vals í Evrópukeppnum

Tímabil	Keppni	Umferð	Mótherji	Heima	Úti	Úrslit
1973-74	Evrópukeppni Meistaraliða	1. Umferð	Vfl Gummersbach	10-11	8-16	18-27
1976-77	Evrópukeppni Bikarhafa	32-liða úrslit	HC Red Boys Differdange	25-11	29-12	54-23
		16-liða úrslit	WKS Slask Wroclaw	20-22	18-22	38-44
1977-78	Evrópukeppni Meistaraliða	32-liða úrslit	Kyndil	23-15	30-16	53-31
		16-liða úrslit	Honvéd Budapest	23-35	25-22	48-57
1978-79	Evrópukeppni Meistaraliða	32-liða úrslit	IL Refstad	14-12	14-16	28-28(ú)
		16-liða úrslit	Dinamo Bucharest	19-25	20-20	39-45
1979-80	Evrópukeppni Meistaraliða	16-liða úrslit	Brentwood	32-19	38-14	70-33
		8-liða úrslit	IK Drott	18-19	18-16	36-35
		Undanúrslit	Atlético Madrid	18-15	21-14	36-32
		Úrslit	Grosswallstadt	12-21
1984-85	Evrópukeppni Félagsliða	1. Umferð	Ystad	20-17	19-23	39-40
1985-86	Evrópukeppni Félagsliða	1. Umferð	Kolbotn	22-20	18-20	40-40(ú)
		16-liða úrslit	Lugi	16-22	15-15	31-37
1986-87	IHF-Bikarinn	1. Umferð	Urædd	14-16	20-25	34-41
1988-89	Evrópukeppni Meistaraliða	1. Umferð	Kyndil	27-26	24-17	51-43
		16-liða úrslit	ZMC Amicitia Zurich	16-15	25-22	41-38
		8-liða úrslit	SC Magdeburg	22-16	15-21	37-37(ú)
1989-90	Evrópukeppni Meistaraliða	1. Umferð	Kyndil	29-14	26-27	55-41
		16-liða úrslit	Rába ETO Györ	21-31	23-29	44-60
1990-91	Evrópukeppni Bikarhafa	1. Umferð	Sandefjord	22-20	21-25	43-45
1991-92	Evrópukeppni Meistaraliða	1. Umferð	IK Drott	27-24	28-27	55-51
		16-liða úrslit	Hapoel Rishon Lezion	25-20	27-28	52-48
		8-liða úrslit	FC Barcelona	19-23	15-27	34-50
1992-93	Evrópukeppni Bikarhafa	1. Umferð	Stavanger	24-22	34-25	58-47
		16-liða úrslit	Klaipeda	28-24	21-22	49-46
		8-liða úrslit	TUSSEM Essen	27-25	14-23	41-48
1993-94	Evrópukeppni Meistaraliða	1. Umferð	Tatra Koprivnice	22-18	23-23	45-41
		16-liða úrslit	HK Sandefjord	25-22	21-24	46-46(ú)
1994-95	Evrópukeppni Meistaraliða	1. Umferð	Kolding	22-26	27-27	49-53
1995-96	Evrópukeppni Meistaraliða	32-liða úrslit	CSKA Moskva	23-23	21-20	44-43
		16-liða úrslit	ABC Braga	25-23	25-29	50-52
1996-97	Evrópukeppni Meistaraliða	1. Umferð	Shakhtar Donetsk	20-19	16-27	36-46
2004-05	Evrópukeppni Félagsliða	1. Umferð	Grasshopper Zurich	28-28	21-23	49-51
2005-06	Evrópukeppni Félagsliða	1. Umferð	HC Tbilisi	51-15	47-13	98-28
		2. Umferð	Sjunda	28-31	33-27	61-58
		3. Umferð	Skövde	24-22	28-35	52-57
2007-08	Meistaradeildin	Forkeppni	Viking Malt	28-19	33-24	61-43
		Riðlakeppni	Celje Lasko		24-34	4. sæti í riðli
			Vfl Gummersbach	24-33
			MKB Veszprém		28-41
			Celje Lasko	29-28
			Vfl Gummersbach		22-34
			MKB Veszprém	24-31
2016-17	Áskorendabikar EHF	32-liða úrslit	Haslum Handballklubb	31–24	25–25	56-49
		16-liða úrslit	RK Partizan 1949	21–21	24–24	45-45
		8-liða úrslit	RK Sloga Požega	30–27	29–26	59-53
		Undanúrslit	AHC Potaissa Turda	30–22	23–32	53-54

Núverandi leikmenn meistaraflokks karla í Handknattleik

Tímabilið 2019-20

Markverðir

• 1 Daníel Freyr Andrésson
• 12 Hreiðar Levy Guðmundsson

Vinstri Hornamenn

• 11 Stiven Tobar Valencia
• 10 Vignir Stefánsson

Hægri Hornamenn

• 18 Ásgeir Snær Vignisson
• 23 Arnór Snær Óskarsson

Línumenn

• 25 Þorgils Jón Svölu Baldursson
• 69 Jóel Bernburg
• 86 Tjörvi Týr Gíslason

Vinstri Skyttur

• 15 Alexander Örn Júlíusson
• 23 Róbert Aron Hostert

Miðjumenn

• 24 Magnús Óli Magnússon
• 34 Anton Rúnarsson
• 9 Benedikt Gunnar Óskarsson

Hægri Skyttur

• 5 Agnar Smári Jónsson
• 6 Arnór Snær Óskarsson

Konur

Á Íslandi

Árið 1947 voru Kvennaflokkar vals settir á legg og fljótlega eftir það hófust æfingar í handknattleik þeirra á meðal. Það var hinsvegar ekki fyrr en á sjöunda áratug 20. aldar sem félagið hrósaði fyrst sigri á Íslandsmótinu í handknattleik, nánar tiltekið 1962. Þá hófst sannkallað blómaskeið þar sem Valskonur urðu meistarar ellefu sinnum á þrettán árum, þar af sex ár í röð frá 1964 til og með 1969. Þjálfari liðsins á þessum árum var Þórarinn Eyþórsson og meðal leikmanna Vals á þessum árum var ein öflugasta handknattleikskona landsins, fyrr og síðar, Sigríður Sigurðardóttir, fyrirliði íslenska landsliðsins sem varð Norðurlandameistari 1964. Sama ár var Sigríður kjörin íþróttamaður ársins af Samtökum íþróttafréttamanna, sú fyrsta úr röðum handknattleiksmanna og varð einnig fyrsta konan til að hreppa verðlaunin. Alls hefur kvennalið félagsins unnið Íslandsmótið 17 sinnum nú síðast tímabilið 2018-2019. Núverandi þjálfari liðsins er Ágúst Þór Jóhannsson og honum til aðstoðar er Óskar Bjarni Óskarsson.

Í Evrópukeppnum

Rétt eins og hjá karlaliði Vals í handknattleik er um auðugan garð að gresja þegar litið er á árangur handknattleikskvenna í Val m.t.t. Evrópukeppna, ber þar helst að nefna tímabilið 2005-06, en þá komust Valsstúlkur í undanúrslit Áskorendabikars EHF, eftir sigra gegn grísku og svissnesku liði.

Tímabil	Keppni	Umferð	Mótherji	Heima	Úti	Samanlagt
2004–05	EHF-Bikarinn	Fyrsta umferð	Önnereds HK	24–35	26–30	50–65
2005–06	Áskorendabikarinn	16-liða úrslit	HC Athinaikos Athens	37–29	24–26	61–55
		8-liða úrslit	LC Brühl Handball	25–21	32–27	57–48
		Undanúrslit	CSU Tomis Constanța	35–28	25–37	60–65
2007–08	Áskorendabikarinn	Þriðja umferð	ŽORK Napredak Kruševac	40–18	34–20	74–38
		16-liða úrslit	RK Lasta Radnički Petrol Beograd	31–30	31–26	62–56
		8-liða úrslit	Mérignac Handball	24–23	30–36	54–58
2010–11	EHF-Bikarinn	Fyrsta umferð	IUVENTA Michalovce	26–21	30–30	56–51
		Önnur umferð	VfL Oldenburg	28–26	25–36	53–62
2012–13	EHF-Bikarinn	Önnur umferð	Valencia Aicequip	37–25	27–22	64–47
		Þriðja umferð	HC Zalău	24–23	21–22	45–45
2018–19	Áskorendabikarinn	Þriðja umferð	Virto / Quintus	20–21	20–24	40–45

Núverandi leikmenn meistaraflokks kvenna í Handknattleik

Tímabilið 2019-20

Markverðir

• 1 Andrea Gunnlaugsdóttir
• 12 Íris Björk Símonardóttir

Vinstri Hornamenn

• 11 Lilja Ágústsdóttir
• 10 Ragnhildur Edda Þórðardóttir

Hægri Hornamenn

• 18 Auður Ester Gestsdóttir
• 23 Íris Ásta Pétursdóttir

Línumenn

• 25 Vigdís Birna Þorsteinsdóttir
• 69 Hildur Björnsdóttir
• 86 Ída Margrét Stefánsdóttir

Vinstri Skyttur

• 15 Lovísa Thompson
• 23 Sandra Erlingsdóttir

Miðjumenn

• 24 Elín Rósa Magnúsdóttir
• 34 Arna Sif Pálsdóttir
• 9 Ásdís Þóra Ágústsdóttir

Hægri Skyttur

• 5 Elínborg Binnadóttir
• 6 Díana Dögg Magnúsdóttir

Körfuknattleikur

Hinn 25. desember 1951 stofnuðu níu drengir, allir fyrrum nemendur úr Menntaskólanum í Reykjavík að einum frátöldum, Körfuboltalið sem þeir gáfu nafnið „Gosi“. Um tilgang félagsins sagði m.a. svo í tíu ára afmælisriti þess:

„Þá fýsti að halda hópinn, er skólaveru lyki, og í því skyni stofnuðu þeir félagið. Háleitara var markmiðið ekki í fyrstu, enda vart við því að búast, að svo alvörulitlir piltar, sem völdu félagi sínu þetta skrítna heiti, væru upptendraðir hugsjónaeldmóði eða ætluðu að betrumbæta æskuna í heild með því að útbreiða þennan undarlega knattleik.“

Gosi var eitt stofnliða efstu deildar í körfuknattleik. 22. desember 1957 breytti Gosi nafni sínu í KFR, eða Körfuknattleiksfélag Reykjavíkur. Undir því nafni var leikið til ársins 1970. 3. október rann KFR saman við Knattspyrnufélagið Val og hóf að keppa í körfuknattleik undir merkjum félagsins. Tíu árum síðar komu fyrstu stóru titlarnir í hús þegar Valur vann Íslandsmótið í Körfuknattleik árið 1980, á næstu þremur árum unnust þrír titlar í viðbót. Bikarmeistaratitlar árin 1981 og 1983 og Íslandsmeistaratitill 1983.

Pétur Guðmundsson er sennilega þekktasti körfuknattleiksmaðurinn sem Valur hefur alið af sér, en Pétur lék um árabil í NBA deildinni.

Íþróttamaður Vals

Eftirtaldir aðilar hafa hlotið þann heiður að vera valdir Valsmaður ársins

• 1992 - Valdimar Grímsson
• 1993 - Guðmundur Hrafnkelsson
• 1994 - Dagur Sigurðsson
• 1995 - Guðrún Sæmundsdóttir
• 1996 - Jón Kristjánsson
• 1997 - Ragnar Þór Jónsson
• 1998 - Guðmundur Hrafnkelsson
• 1999 - Ásgerður Hildur Ingibergsdóttir
• 2000 - Kristinn Lárusson
• 2001 - Rósa Júlía Steinþórsdóttir
• 2002 - Sigurbjörn Hreiðarsson
• 2003 - Íris Andrésdóttir
• 2004 - Berglind Íris Hansdóttir
• 2005 - Bjarni Ólafur Eiríksson
• 2006 - Margrét Lára Viðarsdóttir
• 2007 - Margrét Lára Viðarsdóttir
• 2008 - Katrín Jónsdóttir
• 2009 - Dóra María Lárusdóttir
• 2010 - Hrafnhildur Skúladóttir
• 2011 - Anna Úrsúla Guðmundsdóttir
• 2012 - Guðný Jenný Ásmundsdóttir
• 2013 - Haukur Páll Sigurðsson
• 2014 - Kristín Guðmundsdóttir
• 2015 - Bjarni Ólafur Eiríksson
• 2016 - Bjarni Ólafur Eiríksson*
• 2017 - Orri Freyr Gíslason
• 2018 - Birkir Már Sævarsson
• 2019 - Helena Sverrisdóttir
• 2020 - Anton Rúnarsson

*- Knattspyrnumaðurinn Bjarni Ólafur Eiríksson hefur oftast allra verið kjörinn Íþróttamaður Vals, þrisvar talsins.

Formenn Vals

Eftirtaldir aðilar hafa gengt formennsku Knattspyrnufélagsins Vals:

Formenn Vals

Ár	Nafn
1911-14	Loftur Guðmundsson
1914-16	Árni B. Björnsson
1916-18	Jón Guðmundsson
1918-20	Magnús Guðbrandsson
1920-22	Guðbjörn Guðmundsson
1922-23	Guðmundur Kr. Guðmundsson
1923-28	Axel Gunnarsson
1928-31	Jón Sigurðsson
1931-32	Jón Eiríksson
1932-33	Pétur Kristinsson
1933-34	Ólafur Sigurðsson
1934-38	Frímann Helgason
1938-39	Ólafur Sigurðsson
1939-41	Sveinn Zoega
1941-43	Frímann Helgason
1943-44	Sveinn Zoega
1944-46	Þorkell Ingvarsson
1946-47	Sigurður Ólafsson
1947-50	Úlfar Þórðarson
1950-52	Jóhann Eyjólfsson
1952-57	Gunnar Vagnsson
1957-62	Sveinn Zoega
1962-67	Páll Guðnason
1967-70	Ægir Ferdinandsson
1970-75	Þórður Þorkelsson
1975-77	Ægir Ferdinandsson
1977-81	Bergur Guðnason
1981-87	Pétur Sveinbjarnarson
1987-94	Jón Gunnar Zoega
1994-02	Reynir Vignir
2002-09	Grímur Sæmundsen
2009-14	Hörður Gunnarsson
2014-15	Björn Zoega
2015-18	Þorgrímur Þráinsson
2018-?	Árni Pétur Jónsson

Valsblaðið

Valsblaðið, félagsblað Knattspyrnufélagsins Vals, kom fyrst út í janúar 1939 en ritstjóri þess og ábyrgðarmaður var Sigurður Ólafsson. Í 1. tölublaði Valsblaðsins sagði m.a. svo um útgáfuna:

„Það hefir oft verið um það rætt innan Vals, að nauðsyn bæri til þess, að félagið gæfi út blað, sem út kæmi nokkurn veginn reglulega. Núverandi stjórn hefir hafist handa um þetta mál, og kemur 1. tölublaðið út hér með.

Fyrirkomulag blaðsins er enn ekki fyllilega ákveðið, en ætlunin er, að það komi fyrst um sinn út 4-6 sinnum á ári og sé minst 8 síður hvert blað. Blaðinu er ætlað að birta greinar og fréttir frá félagsstarfseminni, og ýmsum áhugamálum íþróttamanna. Það verður kostað kapps um að hafa blaðið sem allra fjölbreyttast, fróðlegast og skemmtilegast, svo að allir, sem það lesa, hafi bæði gagn og gaman af.

[...]

Væntanlega á Valsblaðið eftir að vinna félaginu ómetanlegt gagn með því að knýta meðlimina fastari böndum við félagið og vekja þá til starfa, ekki aðeins þá, er iðka knattspyrnu, heldur og þá, er fyrir aldurs sakir eða annara [sic] orsaka eru hættir því.“

Árið 2019 fagnaði Valsblaðið 80 ára útgáfuafmæli. Útgáfa blaðsins var stopul eftir 1940 en blaðið var endurvakið af krafti frá 1958 og hefur komið út árlega frá árinu 1983. Núverandi ritstjóri blaðsins er Guðni Olgeirsson en hann tók við ritstjórn blaðsins af Þorgrími Þráinssyni árið 2003.

Titlar

Knattspyrna karla

• Íslandsmeistarar: 23

• 1930, 1933, 1935, 1936, 1937, 1938, 1940, 1942, 1943, 1944, 1945, 1956, 1966, 1967, 1976, 1978, 1980, 1985, 1987, 2007, 2017, 2018, 2020

• Bikarmeistarar: 11

• 1965, 1974, 1976, 1977, 1988, 1990, 1991, 1992, 2005, 2015, 2016

• Deildabikar: 3

• 2008, 2011,2020

• Meistarar meistarana: 11

• 1977, 1979, 1988, 1991, 1992, 1993, 2006, 2008, 2016, 2017, 2018.

Knattspyrna kvenna

• Íslandsmeistarar: 11

• 1978, 1986, 1988, 1989, 2004,2006, 2007, 2008, 2009, 2010, 2019

• Bikarmeistarar: 13

• 1984, 1985, 1986, 1987, 1988, 1990, 1995, 2001, 2003, 2006, 2009, 2010, 2011

• Deildabikar: 3

• 2003, 2007, 2010

Handknattleikur karla

• Íslandsmeistarar: 22

• 1940, 1941, 1942, 1944, 1947, 1948, 1951, 1955, 1973, 1977, 1978, 1979, 1988, 1989, 1991, 1993, 1994, 1995, 1996, 1998, 2007, 2017

• Bikarmeistarar: 10

• 1974, 1988, 1990, 1993, 1998, 2008, 2009, 2011, 2016, 2017

• Meistarar meistarana: 1

• 2009

Handknattleikur kvenna

• Íslandsmeistarar: 16

• 1962, 1964, 1965, 1966, 1967, 1968, 1969, 1971, 1972, 1973, 1974, 1983, 2010, 2011, 2012, 2019

• Bikarmeistarar: 6

• 1988, 1993, 2000, 2012, 2013, 2019

Körfuknattleikur karla

• Íslandsmeistarar: 2

• 1980, 1983

• Bikarmeistarar: 3

• 1980, 1981, 1983

Körfuknattleikur kvenna

• Íslandsmeistarar: 1

• 2019

• Bikarmeistarar: 1

• 2019

Tenglar

• Heimasíða félagsins
• Knattspyrnufélagið Valur 35 ára; grein í Morgunblaðinu 1946
• IcelandFootball.net - Valur Reykjavík
• https://www.mbl.is/greinasafn/grein/1379092/ - Handknattleikur í Val
• https://www.valur.is/um-val/saga.aspx - Saga félagsins
• https://www.valur.is/media/13442/valsbladid_2006.pdf - Evrópuævintýri mfl. kvk.

Pepsi Max deild karla • Lið í Pepsi Max deild 2020 Stjarnan • FH  • KR  • Víkingur  • Valur  • KA   Breiðablik  • ÍA  • HK  • Grótta  • Fylkir  • Fjölnir Leiktímabil í efstu deild karla (1918-2020)  1918 • 1919 • 1920 • 1921 • 1922 • 1923 • 1924 • 1925 • 1926 • 1927 1928 • 1929 • 1930 • 1931 • 1932 • 1933 • 1934 • 1935 • 1936 • 1937 1938 • 1939 • 1940 • 1941 • 1942 • 1943 • 1944 • 1945 • 1946 • 1947 1948 • 1949 • 1950 • 1951 • 1952 • 1953 • 1954 • 1955 • 1956 • 1957 1958 • 1959 • 1960 • 1961 • 1962 • 1963 • 1964 • 1965 • 1966 • 1967 1968 • 1969 • 1970 • 1971 • 1972 • 1973 • 1974 • 1975 • 1976 • 1977 1978 • 1979 • 1980 • 1981 • 1982 • 1983 • 1984 • 1985 • 1986 • 1987 1988 • 1989 • 1990 • 1991 • 1992 • 1993 • 1994 • 1995 • 1996 • 1997 1998 • 1999 • 2000 • 2001 • 2002 • 2003 • 2004 • 2005 • 2006 • 2007 2008 • 2009 • 2010 • 2011 • 2012 • 2013 • 2014 • 2015 • 2016 • 2017 2018 • 2019 • 2020 Mjólkurbikarinn • Lengjubikarinn • Pepsi Max deild 1. deild • 2. deild • 3. deild • 4. deild ---------------------------------------------------------------------------------------------- Mjólkurbikar kvenna • Lengjubikar kvenna • Meistarakeppni kvenna Úrvalsdeild kvenna • 1. deild kvenna • 2. deild kvenna Deildakerfið • KSÍ • Íslandshornið • Reykjavíkurmótið • Fótbolti.net mótið

Íslandsmeistarar karla í knattspyrnu  KR (26)  • Valur (22)  • Fram (18) • ÍA (18) FH (8)  • Víkingur (5)  • Keflavík (4)  • ÍBV (3)  • KA (1)  • Breiðablik (1)

Olís deild karla • Lið í Olís deild karla 2015-2016. Afturelding  • Akureyri  • FH  • Fram  • Haukar Grótta  • ÍBV  • ÍR  • Víkingur  • Valur