Gylfi Þór Sigurðsson

Gylfi Þór Sigurðsson
Upplýsingar
Fullt nafn	Gylfi Þór Sigurðsson
Fæðingardagur	8. september 1989 (1989-09-08)
Fæðingarstaður	Reykjavík, Ísland
Hæð	1,85m
Leikstaða	Framsækinn miðjumaður
Núverandi lið
Núverandi lið	Víkingur
Númer	10
Yngriflokkaferill
	FH , Breiðablik og Reading F.C.
Meistaraflokksferill1
Ár	Lið	Leikir (mörk)
2008-2010	Reading F.C.	42 (18)
2008	→Shrewsbury Town (lán)	5 (1)
2009	→Crewe Alexandra F.C. (lán)	15 (3)
2010-2012	TSG 1899 Hoffenheim	36 (9)
2012	→Swansea City (lán)	18 (7)
2012-2014	Tottenham Hotspur	58 (8)
2014-2017	Swansea City	106 (27)
2017-2022	Everton	133 (25)
2023-2024	Lyngby Boldklub	2 (0)
2024-2025	Valur	19 (11)
2025-	Víkingur	19 (4)
Landsliðsferill2
2005 2000-2007 2007-2011 2010-	Ísland U17 Ísland U19 Ísland U21 Ísland	3 (2) 15 (8) 14 (6) 83 (27)
1 Leikir með meistaraflokkum og mörk talið í aðaldeild liðsins og síðast uppfært sept. 2025. 2 Landsliðsleikir og mörk uppfærð okt. 2024.

Gylfi með vítaspyrnu á HM (2018).

Gylfi Þór Sigurðsson (f. 8. september 1989) er íslenskur knattspyrnumaður sem spilar sem miðjumaður með Víkingi.

Gylfi Sigurðsson er fyrst og fremst þekktur fyrir frábæra spyrnugetu, hvort sem það séu sendingar, langskot eða föst leikatriði. Gylfi býr yfir miklum leikskilningi, er nánast jafnfættur og getur spilað á miðjunni, sem sóknarmiðjumaður eða vinstri kant/framherji sem kemur inn á völlinn og ógnar með sínum hættulegri, hægri fæti.

Gylfi hefur spilað með landsliðinu síðan 2010, skorað og varð markahæsti leikmaður liðsins árið 2023. Hann var valinn íþróttamaður ársins árið 2013 og árið 2016. Gylfi er markahæsti Íslendingur í ensku úrvalsdeildinni með tæp 70 mörk og einnig með flestar stoðsendingar eða 50 talsins.

Árið 2020 var hann 7. stoðsendingahæsti spilandi leikmaður úrvalsdeildarinnar (á eftir Kevin De Bruyne, David Silva, Christian Eriksen, Mesut Özil, Eden Hazard og Raheem Sterling).

Ungmennaferill

Gylfi Sigurðsson ólst upp í Setberginu í Hafnarfirði og byrjaði knattspyrnuæfingar hjá Fimleikafélagi Hafnarfjarðar 1994, þegar Gylfi var aðeins 4 ára og 9 mánaða gamall. Þrátt fyrir 6 ára aldurstakmark fékk hann undanþágu til að æfa i Knattspyrnuskóla F.H. undir stjórn Leifs Sigfinns Garðarsonar. Gylfi fæddist inn í mikla F.H.-fjölskyldu þar sem faðir hans; Sigurður Aðalsteinsson studdi félagið frá ungum aldri og eldri bróðir Gylfa; Ólafur Már Sigurðsson æfði með félaginu alla yngri flokka ásamt því að vera sigursæll kylfingur. Höfðu þeir mikil áhrif á þróun ferils Gylfa með daglegum, þrotlausum æfingum þar sem einblínt var á tækni-og skotæfingar, á sama tíma og Gylfi æfði með yngri flokkum F.H. við góðan árangur. Á fjórtánda ári, þegar flestir krakkar kynnast fyrst sumarvinnu með unglingavinnunni, fékk Gylfi leyfi frá foreldrum sínum að sleppa henni alfarið og einbeita sér í staðinn einungis að fótboltanum. Eftir mikið æfingaálag byrjaði Gylfi að kenna sér meins í hnjánum eftir stífar æfingar á sandgervigrasi F.H. í Kaplakrika.

Á þeim tíma var Breiðablik með besta gervigras landsins. Til að laga hnévanda sinn gekk Gylfi þvi árið 2003 til liðs við Kópavogsfélagið i 3. flokki. Þar æfði hann með framtíðarlandsliðsfélögum á borð við Alfreð Finnbogasyni og Jóhanni Berg Guðmundssyni. Eftir æfingaferðir til Englands til að kynna sér aðstæður hjá Everton og Preston North End fékk Gylfi loks almennilegt tækifæri þegar Reading F.C. býður Blikunum Viktori Unnari Illugasyni og Gylfa Sigurðssyni (báðir 16 ára) að kynntu sér aðstæður. Þeir enduðu báðir á að fá samning og æfðu í byrjun hjá unglingaliðum Reading.

Atvinnumannaferill

Reading

Gylfi hafði verið, á reynslu hjá Preston North End en endaði á að skrifa undir samning hjá akademíu Reading F.C. (með námsstyrk) þann 1. október 2005. Út af sífellt betri frammistöðu færðist Gylfi fljótt frá því að spila með unglingaliðum Reading, yfir í að vera lykilmaður varaliðsins næstu þrjú ár og 2008, eftir meðmæli varaliðsþjálfarans Frank Lampard Sr. ( föður Frank Lampard ) fengu hann og fimm aðrir ungir leikmenn atvinnumannasamninga.

2008–09

Fyrir tímabilið 2008–09 var Gylfa úthlutað treyjunúmerinu 34 hjá Reading. Hann sat á bekknum í 2–1 útisigri félagsins gegn Dagenham & Redbridge í fyrstu umferð enska deildarbikarsins þann 12. ágúst. Tveimur vikum síðar lék hann sinn fyrsta leik í næstu umferð gegn Luton Town þegar hann kom inn á sem varamaður fyrir James Harper á 59. mínútu í 5–1 sigri á Madejski-leikvanginum. Hann skoraði í vítaspyrnukeppni í útitapi Reading gegn Stoke City í þriðju umferð eftir að hafa komið inn á sem varamaður.

Til að öðlast frekari reynslu í byrjunarliði skrifaði Gylfi undir eins mánaðar lánssamning við Shrewsbury Town þann 16. október. Tveimur dögum síðar skoraði hann í fraumraun sinni í ensku úrvalsdeildinni gegn AFC Bournemouth í 4–1 sigri á útivelli. Hann lék alls sex leiki með Shrewsbury og skoraði eitt mark. Hann sneri aftur til heimafélagsins og lék með Reading í 2–0 tapi gegn Cardiff City í þriðju umferð FA-bikarsins þann 3. janúar 2009. Þann 27. febrúar gekk hann til liðs við Crewe Alexandra en þjálfari liðsins var Guðjón Þórðarsson, fyrrum landsliðsþjálfari. Var Gylfi því áhugasamur og fór á neyðarláni til liðsins . Tveimur dögum síðar lék hann fyrsta leik sinn gegn Brighton á útivelli og skoraði á 89. mínútu í 4–0 sigri. Þann 24. mars var lánssamningur hans framlengdur til loka tímabilsins. Hann skoraði tvö mörk til viðbótar fyrir Crewe gegn Milton Keynes Dons og Cheltenham Town en tókst ekki að fyrirbyggja fall félagsins niður í ensku aðra deildina.

1899 Hoffenheim

Árin 2010-2011 fór Gylfi til Hoffenheim í Þýskalandi. Gylfi var ekki í náðinni hjá nýjum þjálfara í byrjun leiktímabils 2011-2012 en hins vegar mjög vinsæll hjá stuðningsmönnum liðsins. Gylfi leitaði á endanum á önnur mið.

Swansea og Tottenham

Gylfi var lánaður til Swansea árið 2012 og spilaði 12 leiki með þeim. Hann var valin leikmaður mánaðarins í mars 2012, fyrstur Íslendinga. Sumarið 2012 fór hann til Tottenham Hotspur og var þar til 2014.

Swansea City

Sumarið 2014 náði Tottenham samningi við Swansea City um skipti á Gylfa og Ben Davies vinstri bakverði Swansea. Gylfi lagði upp mark og skoraði sigurmarkið í opnunarleik Swansea á móti Manchester United en það var í fyrst skipti síðan 1972 sem United hafði tapað opnunarleik.

Tímabilið 2016-2017 skoraði Gylfi 9 mörk og átti 13 stoðsendingar og átti lykilþátt í að Swansea bjargaði sér frá falli í ensku úrvalsdeildinni. Gylfi hljóp mesta vegalengd allra leikmanna á tímabilinu; 433 kílómetra. Gylfi er markahæsti leikmaður Swansea í úrvalsdeildinni með 34 mörk.

Everton

2017-2018

Gylfi í leik Everton og Chelsea.

Árið 2017 var Gylfi seldur frá Swansea City til Everton fyrir 45 milljón punda. Samningurinn var til 5 ára.

Gylfi skoraði sitt fyrsta mark fyrir Everton á móti Hajduk Split, í fyrsta leik sínum í byrjunarliðinu (25. ágúst). Markið var af meira en 45 metra færi með viðstöðulausu skoti, 13 sekúndum eftir að flautað var til seinni hálfleiks. Ronald Koeman, þjálfari Everton, sagði að markið væri eitt af mörkum tímabilsins. Í mars 2018 meiddist Gylfi á hné í leik á móti Brighton og var frá í 6-8 vikur. Leiktíðina 2017-2018 spilaði Gylfi 33 leiki og skoraði 6 mörk.

2018-2019

Gylfi hóf leiktíðina 2018-2019 mun betur en á fyrri leiktíð og var markahæsti maður liðsins (fyrir jól) á eftir Brasilíumanninum Richarlison. Hann skoraði meðal annars tvö mörk gegn Fulham FC og Cardiff City og sigurmark gegn Leicester City af 23 metra færi. Gylfi komst upp fyrir Eið Smára Guðjohnsen (55 mörk) sem markahæsti Íslendingurinn í ensku úrvalsdeildinni í febrúar með 56 mörk. Gylfi kláraði tímabilið með 13 mörk í deildinni og 6 stoðsendingar. Hann var markahæstur ásamt Richarlison.

2019-2020

Tímabilið 2019-2020 var gengi Everton ekki gott í byrjun tímabils og þjálfarinn Marco Silva var rekinn. Með nýjum þjálfara, Carlo Ancelotti, færðist Gylfi aftar á miðjuna. Gylfa hafði ekki gengið vel að skapa mörk og hlaut gagnrýni. Íþróttafréttamenn orðuðu hann frá félaginu eftir tímabilið.

2020-2021

Gylfi hóf tímabilið á bekknum eftir að nýir miðjumenn komu til Everton; James Rodríguez, Allan og Abdoulaye Doucouré. Hann byrjaði þó í bikarleikjum og skoraði sitt 100. mark í enskri knattspyrnu gegn Salford City í september. Gylfi skoraði sigurmarkið úr víti gegn Chelsea í desember, í 1-0 sigri. Hann skoraði einnig úr víti í fyrsta sigurleik Everton á Liverpool FC á Anfield í 22 ár. Hann skoraði tvívegis á móti Tottenham í 2-2 jafntefli í apríl.

Lyngby

Sumarið 2023 hélt Gylfi til Lyngby. Hann spilaði sinn fyrsta leik fyrir liðið í lok september þegar hann kom inn á sem varamaður. Gylfi meiddist og spilaði ekki sem skyldi með liðinu.

Valur

Í byrjun árs 2024 spurðist út að Gylfi hyggðist ganga til liðs við Val. Í miðjum mars bárust fregnir þess efnis að hann hafði skrifað undir. Hann gerði 2 ára samning við félagið. Margir F.H.-ingar voru hissa á vali Gylfa þar sem hann hefði ætíð titlað sig sem F.H.-ing og oftar en einu sinni rætt í viðtali um draum sinn að enda ferilinn með uppeldisliði sínu. Gylfi skoraði mark í sínum fyrsta leik fyrir Val en átti erfitt með að fóta sig fyrstu mánuðina líkt og algengt er með íslenska atvinnumenn sem koma heim til að ljúka ferlinum í íslensku deildinni. Meiðsli settu sitt strik í reikningin auk þess sem erfiðleikar undanfarna ára virtust plaga enn huga hans. 2024 var á endanum vonbrigða tímabil í Val. Gylfi lék ekki vel og Valsarar enduðu í 3. sæti. Evrópukeppnin var þeim erfið, þar sem þeir mættu St. Mirren og fjölmörgum skoskum stuðningsmönnum þeirra. Gylfi þurfti að þola ljóta níðsöngva tengda fortíð sinni frá háværu Skotunum sem komu á Hlíðarenda. Svo mikið var áreitið að Gylfi tók þá erfiðu ákvörðun að spila ekki seinni leikinn í Skotlandi, þrátt fyrir að Valur margreyndi að sannfæra hann um að skipta um skoðun þar sem þeir áttu enn möguleika á að komast áfram og miklir peningar í húfi. Þetta og eitrað andrúmsloft í klefa Vals vegna fjölda gæðaleikmanna með háa prófíla sem þurftu að verma bekkinn varð til þess að Gylfa og Srdjan Tufegdzic, öðru nafni Túfa, þjálfara liðsins lenti saman og neitaði Gylfa að spila mikilvæga leiki á komandi undirbúningstímabili Vals.

Víkingur Reykjavík

Víkingur vissi vel hversu óánægður Gylfi væri hjá Val og að hann vildi komast sem fyrst í burtu. Víkingur gerði kauptilboð sem Valur hafnaði sem gerði ósætti Gylfa og Vals enn meira. Eftir opinberustu og dramatískustu kauptilraunir í knattspyrnusögu Íslands, þar sem móðganir gengu á milli liðanna, gáfu Valsmenn að endingu eftir og seldu Gylfa til keppinauta sinna í Víking og var hann kynntur sem nýr leikmaður þeirra í febrúar 2025. Kaupverðið var talið 20 milljónir króna. Gylfi þreytti frumraun sína í Víkingstreyjunni þann 7. apríl en honum tókst ekki að klára leikinn þar sem hann hlaut annað rauða spjaldið á ferli sínum fyrir grófa tæklingu.

Einkalíf

Í júní 2019 kvæntist Gylfi Alexöndru Ívarsdóttur, sem hafði verið valin Ungfrú Ísland árið 2008, en þau höfðu verið saman frá árinu 2010. Eiga þau eitt barn saman í dag.

Í júlí 2021 spurðist út að Gylfi Þór hefði verið handtekinn og settur í leyfi frá Everton vegna rannsóknar lögreglunnar í Manchester á meintu kynferðisbroti hans gegn barni. Knattspyrnusamfélagið var mjög brugðið því fyrir var ímynd Gylfa hrein og nafn hans mjög mikið notað til að auglýsa vörur. Á meðan rannsókn málsins fór fram neyddist Gylfi til að gera hlé á ferli sínum og var frystur hjá Everton. Á meðan þessu stóð var Gylfi í farbanni sem hafði slæm áhrif á fjölskyldulíf hans þar sem eiginkona hans og barn voru flutt heim til Íslands. Samningur hans við Everton rann að lokum út og eftir margra mánaða rannsókn með tilheyrandi óvissu og bið sem kostaði hann landsliðssæti gaf lögreglan loks út yfirlýsingu að hún myndi ekki hafa bolmagn til að gefa út ákæru og Gylfi slapp loksins í apríl árið 2023. Eftir úrskurðinn var óvissa meðal fjölmiðla hvort Gylfi færi í mál við lögregluyfirvöld þarlenda en ákvað hins vegar að forðast öll eftirmál og flaug strax heim til Íslands.

Viðurkenningar

• Leikmaður mánaðarins, enska úrvalsdeildin, mars 2012.
• Leikmaður mánaðarins, enska meistaradeildin, mars 2010.
• Leikmaður tímabilsins, Reading FC: 2009–10.
• Leikmaður tímabilsins, Hoffenheim: 2010–11.
• Knattspyrnukarl ársins, Ísland: 2010, 2012, 2013, 2014, 2015, 2016, 2017, 2018, 2019, 2020
• Íþróttamaður ársins: 2013 og 2016.
• Leikmaður tímabilsins, Swansea City: 2015–16 og 2016–17.

Tilvísanir

  Þetta æviágrip sem tengist Íslandi er stubbur. Þú getur hjálpað til með því að bæta við greinina.