Sumarólympíuleikarnir 1992

Sumarólympíuleikarnir 1992 voru haldnir í Barcelona á Spáni frá 25. júlí til 9. ágúst.

Keppnisgreinar

Keppt var í 237 greinum. Fjöldi keppna í einstökum íþróttaflokkum er gefinn upp í sviga.

• Frjálsar íþróttir (43)

• Kappróður (14)

• Badminton (4)

• Körfuknattleikur (2)

• Hnefaleikar (12)

• Kajakróður (16)

• Hjólreiðar (10)

• Reiðmennska (6)

• Skylmingar (8)

• Hafnabolti (1)

• Knattspyrna (1)

• Fimleikar (15)

• Ólympískar Lyftingar (10)

• Handknattleikur (2)

• Hokkí (2)

• Hjólaskautahokkí (1 - sýningargrein)

• Fangbrögð (20)

• Júdó (14)

• Nútímafimmtarþraut (2)

• Tennis (4)

• Borðtennis (4)

• Sund (31)

• Listsund (2)

• Dýfingar (4)

• Sundknattleikur (1)

• Skotfimi (13)
• Bogfimi (4)
• Siglingar (10)
• Blak (2)

Handknattleikskeppni ÓL 1992

Þremur dögum fyrir setningu Ólympíuleikanna var tilkynnt að vegna samskiptabanns Sameinuðu þjóðanna, yrði Júgóslövum bannað að keppa í hópíþróttum á leikunum. Íslendingum var því boðið að hlaupa í skarðið á síðustu stundu í handknattleikskeppninni.

Íslenska liðið fór rólega af stað. Naumur sigur vannst á liði Brasilíu í fyrsta leik. Því næst fylgdi jafntefli við Tékkóslóvakíu. Stórsigur á Ungverjalandi og sigur á Suður-Kóreu þýddu að liðið var komið í undanúrslit, þrátt fyrir skell gegn heimsmeisturum Svía í lokaleik riðilsins.

Í undanúrslitunum reyndist lið Samveldis sjálfstæðra ríkja of sterkur andstæðingur fyrir íslenska liðið. Samveldið varð að lokum Ólympíumeistari eftir sigur á Svíum í úrslitum. Íslenska liðið tapaði loks fyrir Frökkum í leik um bronsið. Uppskeran varð því fjórða sætið, sem var besti árangur Íslands á stórmóti í handknattleik fram að því.

Þáttaka

Þátttaka Íslendinga á leikunum

Auk handknattleikslandsliðsins, sendu Íslendingar þrettán íþróttamenn til Barcelona: fjóra frjálsíþróttamenn, tvær sundkonur, þrjá júdókappa, þrjá badmintonmenn og einn keppanda í skotfimi.

Spjótkastarinn Sigurður Einarsson náði bestum árangri einstaklingsíþróttamannanna, hafnaði í fimmta sæti. Fyrir leikanna hafði Vilhjálmur Einarsson verið talinn líklegastur til afreka, en hann varð fjórtándi og missti naumlega af því að komast upp úr forkeppninni. Kringlukastarinn Vésteinn Hafsteinsson og kúluvarparinn Pétur Guðmundsson höfnuðu fyrir ofan miðjan hóp.

Óvenjufáir íslenskir sundmenn tóku þátt á leikunum, þær Helga Sigurðardóttir og Ragnheiður Runólfsdóttir. Náði sú síðarnefnda nítjánda sæti í 100 metra bringusundi.

Carl J. Eiríksson keppti í skotfimi. Hann var elstur þátttakenda á öllum leikunum, 65 ára að aldri.

Keppendur Íslands í badminton og júdó féllu allir snemma úr keppni.

Verðlaunahafar eftir löndum

Nr	Lönd	Gull	Silfur	Brons	Alls
1	Samveldi sjálfstæðra ríkja	45	38	29	112
2	Bandaríkin	37	34	37	108
3	Þýskaland	33	21	28	82
4	Kína	16	22	16	54
5	Kúba	14	6	11	31
6	Spánn	13	7	2	22
7	Suður-Kórea	12	5	12	29
8	Ungverjaland	11	12	7	30
9	Frakkland	8	5	16	29
10	Ástralía	7	9	11	27
11	Kanada	7	4	7	18
12	Ítalía	6	5	8	19
13	Bretland	5	3	12	20
14	Rúmenía	4	6	8	18
15	Tékkóslóvakía	4	2	1	7
16	Norður-Kórea	4	0	5	9
17	Japan	3	8	11	22
18	Búlgaría	3	7	6	16
19	Pólland	3	6	10	19
20	Holland	2	6	7	15
21	Kenýa	2	4	2	8
22	Noregur	2	4	1	7
23	Tyrkland	2	2	2	6
24	Indónesía	2	2	1	5
25	Brasilía	2	1	0	3
26	Grikkland	2	0	0	2
27	Svíþjóð	1	7	4	12
28	Nýja Sjáland	1	4	5	10
29	Finnland	1	2	2	5
30	Danmörk	1	1	4	6
31	Marokkó	1	1	1	3
32	Írland	1	1	0	2
33	Eþíópía	1	0	2	3
34	Alsír	1	0	1	2
	Eistland	1	0	1	2
	Litháen	1	0	1	2
37	Sviss	1	0	0	1
38	Jamæka	0	3	1	4
	Nígería	0	3	1	4
40	Lettland	0	2	1	3
41	Austurríki	0	2	0	2
	Namibía	0	2	0	2
	Suður-Afríka	0	2	0	2
44	Belgía	0	1	2	3
	Króatía	0	1	2	3
	Óháðir keppendur	0	1	2	3
	Íran	0	1	2	3
48	Ísrael	0	1	1	2
49	Taiwan	0	1	0	1
	Mexíkó	0	1	0	1
	Perú	0	1	0	1
52	Mongólía	0	0	2	2
	Slóvenía	0	0	2	2
54	Argentína	0	0	1	1
	Bahamaeyjar	0	0	1	1
	Kólumbía	0	0	1	1
	Ghana	0	0	1	1
	Malasía	0	0	1	1
	Pakistan	0	0	1	1
	Filippseyjar	0	0	1	1
	Púertó Ríkó	0	0	1	1
	Katar	0	0	1	1
	Súrinam	0	0	1	1
	Tæland	0	0	1	1
Alls		260	257	298	815