Eistland

Lýðveldið Eistland
Eesti Vabariik
Fáni	Skjaldarmerki
Kjörorð: „ekkert“
Þjóðsöngur: Mu isamaa, mu õnn ja rõõm
Höfuðborg	Tallinn
Opinbert tungumál	eistneska
Stjórnarfar Forseti Forsætisráðherra	Þingræði Toomas Hendrik Ilves Taavi Rõivas
Sjálfstæði	frá Þýskalandi, Rússlandi og Sovétríkjunum
- Yfirlýst	24. febrúar 1918
- Viðurkennt	2. febrúar 1920
- Hertekið af SSSR	16. júní 1940
- Enduryfirlýst	20. ágúst 1991
Flatarmál  - Samtals  - Vatn (%)	132. sæti 45.227 km² 4,45%
Mannfjöldi  - Samtals (2014)  - Þéttleiki byggðar	154. sæti 1.315.819 29/km²
VLF (KMJ) - Samtals - á mann	áætl. 2015 36,947 millj. dala (109. sæti) 27.729 dalir (41. sæti)
VÞL (2013)	0.840 (33. sæti)
Gjaldmiðill	evra €
Tímabelti	EET (UTC+2) (sumartími: EEST (UTC+3))
Þjóðarlén	.ee
Landsnúmer	372

Eistland, Lýðveldið Eistland eða Eesti Vabariik (eistneska: Eesti) er land í Norður-Evrópu við Eystrasalt og Kirjálabotn. Það á landamæri að Rússlandi í austri og Lettlandi í suðri en norðan við Kirjálabotn er Finnland. Það er eitt Eystrasaltslandanna, en hin eru Lettland og Litháen.

Í Eistlandi er þingræði. Landinu er skipt í fimmtán sýslur, þar sem höfuðborgin og stærsta borgin er Tallinn. Í Eistlandi búa 1,3 milljónir manna. Landið er einn af fámennustu aðilum Evrópusambandsins, NATO og Schengen-svæðisins. Opinbera tungumálið, eistneska, er finnsk-úgrískt tungumál sem er nátengt finnsku og samísku.

Landið er iðnríki með öflugt hagkerfi. Það er aðili að OECD. Það er ofarlega á lista yfir lönd eftir vísitölu um þróun lífsgæða og efnahagslegt frelsi, lýðfrelsi, menntun og frelsi fjölmiðla mælist þar hátt (í þriðja sæti árið 2012).

Saga

Eistland hefur verið byggt finnsk-úgrískum þjóðflokkum síðan á forsögulegum tíma. Landið var kristnað af þýskum riddurum og Dönum sem höfðu lagt það undir sig 1227. Erlend ríki sem stjórnað hafa Eistlandi í gegnum söguna eru Danmörk, Svíþjóð, Pólland og Rússland.

Eftir hrun Rússneska keisaradæmisins vegna Októberbyltingarinnar lýsti Eistland yfir sjálfstæði sínu þann 24. febrúar 1918. Landið var svo innlimað í Sovétríkin með valdi í júní 1940 og var það eitt af lýðveldum Sovétríkjanna til 20. ágúst 1991 er þau liðu undir lok og Eistland lýsti yfir sjálfstæði sínu á ný. Þjóðhátíðardagur Eistlendinga er 24. febrúar.

Rússneskur her var í landinu allt til 1994 en síðan þá hefur Eistland nýtt sér nýfengið frelsi til að mynda efnahagsleg og stjórnmálaleg tengsl við vestræn ríki. Eistland fékk ingöngu í Atlantshafsbandalagið og Evrópusambandið árið 2004.

Stjórnmál

Eistland er stjórnarskrárbundið lýðræðisríki. Forseti þess er kosinn á 5 ára fresti af þinginu. Ríkisstjórnin er handhafi framkvæmdavaldsins og mynduð af forsætisráðherra og 14 öðrum ráðherrum sem forsetinn setur í embætti eftir að þingið hefur samþykkt þá.

Löggjafarvald liggur hjá þinginu sem starfar í einni deild og er kallað Riigikogu. Þingmenn eru 101 og er kjörtímabil þingsins 4 ár. Hæstiréttur landsins er handhafi dómsvalds og eru dómarar 17. Forseti hæstaréttar er valinn af þinginu og í kjölfarið skipaður af forseta ævilangt.

Sýsluskipan

Sýsluskipan í Eistlandi

Eistlandi er skipt í fimmtán sýslur:

• Harju-sýsla
• Hiiu-sýsla
• Ida-Viru-sýsla
• Jõgeva-sýsla
• Järva-sýsla
• Lääne-sýsla
• Lääne-Viru-sýsla
• Põlva-sýsla
• Pärnu-sýsla
• Rapla-sýsla
• Saare-sýsla
• Tartu-sýsla
• Valga-sýsla
• Viljandi-sýsla
• Võru-sýsla