Sumarólympíuleikarnir 1988

24. sumarólympíuleikarnir
Bær:	Seúl, Suður-Kóreu
Þátttökulönd:	160
Þátttakendur:	8.453 (6.250 karlar, 2.203 konur)
Keppnir:	237 í 23 greinum
Hófust:	17. september 1988
Lauk:	2. október 1988
Settir af:	Roh Tae-woo forseta
Íslenskur fánaberi:	Bjarni Friðriksson

Sumarólympíuleikarnir 1988 voru haldnir í Seúl í Suður-Kóreu frá 17. september til 2. október.

Aðdragandi og skipulag

Ákvörðunin um staðsetningu leikanna var tekin á árinu 1981. Auk Seúl sóttist japanska borgin Nagoya eftir gestgjafahlutverkinu. Japanska framboðið var talið mun sigurstranglegra og kom því verulega á óvart þegar Seúl fékk nálega tvöfalt fleiri atkvæði í kosningunni. Í aðdraganda leikanna hélt Seúl Asíuleikana árið 1986 sem hálfgerða generalprufu.

Skipuleggjendur fengu á sig nokkra gagnrýni þegar fréttist að borgaryfirvöld í Seoul höfðu látið flytja í burtu hópa heimilisleysingja og annarra sem taldir voru skaðlegir fyrir ímynd borgarinnar og halda þeim nauðugum á vistheimilum meðan á mótinu stóð. Óttast var að hópur kommúnistaríkja myndu sniðganga leikana líkt og gerst hafði fjórum árum fyrr. Þegar til kom ákváðu flest þeirra þó að taka þátt. Norður-Kóreumenn gerðu kröfu um að fá að halda hluta leikanna en þegar ekki var orðið við þeim óskum ákvað ríkið að mæta ekki til keppni. Sama gerðu Kúbanir, Albanir og Eþíópíumenn í samstöðuskyni.

Keppnisgreinar

Keppt var í 237 greinum. Fjöldi keppna í einstökum íþróttaflokkum er gefinn upp í sviga.

• Frjálsar íþróttir (42)

• Kappróður (14)

• Körfuknattleikur (2)

• Hnefaleikar (12)

• Kajakróður (12)

• Hjólreiðar (9)

• Reiðmennska (6)

• Skylmingar (8)

• Knattspyrna (1)

• Fimleikar (15)

• Ólympískar Lyftingar (10)

• Handknattleikur (2)

• Hokkí (2)

• Fangbrögð (16)

• Júdó (7)

• Nútímafimmtarþraut (2)

• Tennis (4)

• Borðtennis (4)

• Sund (31)

• Listsund (2)

• Dýfingar (4)

• Sundknattleikur (1)

• Skotfimi (13)
• Bogfimi (4)
• Siglingar (8)
• Blak (2)

Einstakir afreksmenn

Gríðarleg eftirvænting var fyrir 100 metra hlaup karla þar sem Ben Johnson frá Kanada kom í mark á glæsilegu heimsmeti, 9,79 sekúndum. Fögnuðurinn dofnaði hins vegar þegar í ljós kom að Johnson féll á lyfjaprófi, en flestir keppendurnir í úrslitahlaupinu áttu síðar eftir að gera slíkt hið sama.

Fimleikakonan Daniela Silivaş frá Rúmeníu vann til þrennra gullverðlauna og jafnaði met löndu sinnar Nadiu Comăneci sem hlotið hafði fullkomna 10 í fimleikakeppni ÓL árið 1976.

Dýfingakappinn Greg Louganis frá Bandaríkjunum varði tvöföld gullverðlaun sín frá fyrri leikum. Fyrr í keppninni rak hann höfuðið í stökkbrettið, missti meðvitund og var óttast að hann hefði stórslasast.

Christa Luding-Rothenburger frá Austur-Þýskalandi vann silfurverðlaun í hjólreiðum en fyrr á árinu hafði hún unnið til verðlauna í skautahlaupi á vetrarleikunum í Calgary. Samlanda hennar, Kristin Otto, hlaut flest gullverðlaun á leikunum - fimm talsins - í sundi.

Hafnabolti og taekwondo voru sýningargreinar á leikunum. Vinsældir síðarnefndu greinarinnar voru miklar og öðlaðist hún síðar stöðu fullgildrar Ólympíuíþróttar. Einnig var í fyrsta sinn keppt í kvennaflokki í júdó sem sýningargrein.

Tennis var meðal keppnisíþrótta í fyrsta sinn í 64 ár. Steffi Graf frá Vestur-Þýskalandi varð hlutskörpust eftir að hafa áður unnið öll fjögur risamótin í greininni á árinu.

Handknattleikskeppni ÓL 1988

Með góðum árangri á HM í Sviss 1986, tryggði Ísland sér þátttökurétt á leikunum í Seoul og voru miklar vonir bundnar við góðan árangur. Styrkleikalisti Alþjóðahandknattleikssambandsins setti Ísland í fjórða sæti heimslistans skömmu fyrir leikana. Tólf lið kepptu í tveimur riðlum og var riðill Íslands ógnarsterkur.

Fyrstu tvær viðureignir liðsins voru gegn lökustu andstæðingunum, Alsír og Bandaríkjunum. Unnust þeir leikir auðveldlega. Íslendingar reyndust Svíum lítil fyrirstaða í þriðja leiknum. Því næst fylgdi jafntefli gegn Júgóslövum, með jöfnunarmarki á lokasekúndunni. Sovétmenn reyndust svo of stór biti í lokaleik riðilsins.

Andstæðingar Íslands í leiknum um sjöunda sætið voru Austur-Þjóðverjar og hefði sigur tryggt sæti á HM í Tékkóslóvakíu 1990. Leikurinn varð sögulegur. Eftir tvær framlengingar var staðan 28:28, en Þjóðverjarnir höfðu betur í vítakeppni.

Sovéska landsliðið varð Ólympíumeistari með talsverðum yfirburðum, vann allar viðureignir sínar með nokkrum mun. Suður-Kórea hlaut silfurverðlaunin en Júgóslavar bronsið.

Þátttaka

Þátttaka Íslendinga á leikunum

Auk handknattleikslandsliðsins, sendu Íslendingar sautján íþróttamenn til Seoul: sjö frjálsíþróttamenn, sex sundmenn, tvo júdókappa og tvo kappsiglingarmenn.

Eðvarð Þór Eðvarðsson náði bestum árangri sundmanna, varð sautjándi í 100 metra baksundi.

Uppskeran í frjálsíþróttakeppninni olli vonbrigðum. Íslendingar áttu á að skipa góðum keppendum í kastgreinum, s.s. kringlukastaranum Vésteini Hafsteinssyni, Kúluvarparanum Pétri Guðmundssyni og spjótkösturunum Vilhjálmi Einarssyni og Sigurði Einarssyni. Þeir voru allir nokkuð frá sínu besta. Einar varð þrettándi og Pétur fjórtándi.

Verðlaunaskipting eftir löndum

Nr	Lönd	Gull	Silfur	Brons	Alls
1	Sovétríkin	55	31	46	132
2	Austur-Þýskaland	37	35	30	102
3	Bandaríkin	36	31	27	94
4	Suður-Kórea	12	10	11	33
5	Vestur-Þýskaland	11	14	15	40
6	Ungverjaland	11	6	6	23
7	Búlgaría	10	12	13	35
8	Rúmenía	7	11	6	24
9	Frakkland	6	4	6	16
10	Ítalía	4	4	4	14
11	Kína	5	11	12	28
12	Bretland	5	10	9	24
13	Kenýa	5	2	2	9
14	Japan	4	3	7	14
15	Ástralía	3	6	5	14
16	Júgóslavía	3	4	5	12
17	Tékkóslóvakía	3	3	2	8
18	Nýja Sjáland	3	2	8	13
19	Kanada	3	2	5	10
20	Pólland	2	5	9	16
21	Noregur	2	3	0	5
22	Holland	2	2	5	9
23	Danmörk	2	1	1	4
24	Brasilía	1	2	3	6
25	Finnland	1	1	2	4
	Spánn	1	1	2	4
27	Tyrkland	1	1	0	2
28	Marokkó	1	0	2	3
29	Austurríki	1	0	0	1
	Portúgal	1	0	0	1
	Súrinam	1	0	0	1
32	Svíþjóð	0	4	7	11
33	Sviss	0	2	2	4
34	Jamæka	0	2	0	2
35	Argentína	0	1	1	2
36	Síle	0	1	0	1
	Kosta Ríka	0	1	0	1
	Indónesía	0	1	0	1
	Íran	0	1	0	1
	Hollensku Antillaeyjar	0	1	0	1
	Perú	0	1	0	1
	Senegal	0	1	0	1
	Bandarísku Jómfrúaeyjar	0	1	0	1
44	Belgía	0	0	2	2
	Mexíkó	0	0	2	2
46	Kólumbía	0	0	1	1
	Djíbútí	0	0	1	1
	Grikkland	0	0	1	1
	Mongólía	0	0	1	1
	Pakistan	0	0	1	1
	Filippseyjar	0	0	1	1
	Tæland	0	0	1	1
Alls		241	234	264	739