Bjarni Benediktsson (f. 1908)

Bjarni Benediktsson
Bjarni Benediktsson
Forsætisráðherra Íslands
	Í embætti; 14. nóvember 1963 – 10. júlí 1970
Forseti	Ásgeir Ásgeirsson; Kristján Eldjárn
Forveri	Ólafur Thors
Eftirmaður	Jóhann Hafstein
Borgarstjóri Reykjavíkur
	Í embætti; 8. október 1940 – 4. febrúar 1947
Forveri	Pétur Halldórsson
Eftirmaður	Gunnar Thoroddsen
Formaður Sjálfstæðisflokksins
	Í embætti; 22. október 1961 – 10. júlí 1970
Forveri	Ólafur Thors
Eftirmaður	Jóhann Hafstein
Alþingismaður
Persónulegar upplýsingar
Fæddur	30. apríl 1908; Reykjavík, Íslandi
Látinn	10. júlí 1970 (62 ára) Þingvöllum, Íslandi
Dánarorsök	Eldsvoði
Stjórnmálaflokkur	Sjálfstæðisflokkurinn
Maki	Valgerður Tómasdóttir (g. 1935; d. 1935); Sigríður Björnsdóttir (g. 1943)
Börn	Björn, Guðrún, Valgerður og Anna
Foreldrar	Benedikt Sveinsson og Guðrún Pétursdóttir
Háskóli	Háskóli Íslands
Starf	Stjórnmálamaður
	Æviágrip á vef Alþingis

Bjarni Benediktsson (30. apríl 1908 – 10. júlí 1970) var borgarstjóri Reykjavíkur, alþingismaður, ráðherra og forsætisráðherra Íslands. Hann fæddist í Reykjavík, sonur Benedikts Sveinssonar, alþingismanns og bókavarðar, og Guðrúnar Pétursdóttur frá Engey, landsfrægs skörungs.

Bjarni lauk stúdentsprófi frá Menntaskólanum í Reykjavík átján ára að aldri og gegndi hann embætti forseta Framtíðarinnar árið 1925^[1]. Hann lauk lagaprófi frá Háskóla Íslands 1930 með hæstu einkunn sem þá hafði verið gefin. Hann stundaði framhaldsnám í stjórnlagafræði í Berlín 1930-1932, var skipaður prófessor í lögum í Háskóla Íslands 1932 og gegndi því starfi til 1940. Hann varð heiðursdoktor í lögfræði frá Háskóla Íslands 1961.

Bjarni kvæntist Valgerði Tómasdóttur 1935 en missti hana eftir nokkurra mánaða sambúð. Hann kvæntist aftur 1943, Sigríði Björnsdóttur (1. nóvember 1919 – 10. júlí 1970) , og eignuðust þau fjögur börn, Björn, Guðrúnu, Valgerði og Önnu.

Borgarfulltrúi og borgarstjóri

Bjarni skipaði öruggt sæti á lista Sjálfstæðisflokksins í Reykjavík í bæjarstjórnarkosningunum 1934 og sat í bæjarstjórn til 1942. Við fráfall Péturs Halldórssonar 1940 varð Bjarni borgarstjóri Reykjavíkur. Hann var kosinn á þing 1942 og gegndi borgarstjórastarfi jafnhliða þingmennskunni næstu árin en lét af því árið 1947, þegar hann varð utanríkis- og dómsmálaráðherra. Hann sat einnig í borgarstjórn Reykjavíkur á árunum 1946-1949. Árið 1948 var Bjarni kosinn varaformaður Sjálfstæðisflokksins.

Þingmaður og ráðherra

Bjarni var utanríkisráðherra 1949-1956 og átti drjúgan þátt í að marka þá utanríkisstefnu, sem Íslendingar hafa síðan fylgt. Hann var jafnframt dómsmálaráðherra sama tímabil og menntamálaráðherra 1953-1956.

Árið 1956 varð Bjarni Benediktsson aðalritstjóri Morgunblaðsins við hlið Valtýs Stefánssonar en sat jafnframt áfram á Alþingi. Hann var ritstjóri fram í nóvember 1959 er hann varð dóms-, kirkju- heilbrigðis- og iðnaðarmálaráðherra í viðreisnarstjórninni. Hann gegndi jafnframt fjölda trúnaðarstarfa og átti sæti í ýmsum stjórnum og nefndum.

Á landsfundi 1961 var dr. Bjarni kjörinn formaður Sjálfstæðisflokksins. Árið 1963 varð hann forsætisráðherra og gegndi þeirri stöðu þangað til hann fórst ásamt konu sinni og dóttursyni, Benedikt Vilmundarsyni, í eldsvoða á Þingvöllum aðfaranótt 10. júlí 1970.

Neðanmálsgreinar

↑ „Forsetar Framtíðarinnar frá 1883“. Menntaskólinn í Reykjavík.

Heimild

Hannes Hólmsteinn Gissurarson (1989). Sjálfstæðisflokkurinn í sextíu ár. Sjálfstæðisflokkurinn.

Tenglar

Bjarni Benediktsson.is Geymt 24 júní 2009 í Wayback Machine

Fyrirrennari:
Ólafur Thors

Forsætisráðherra
(14. nóvember 1963 – 10. júlí 1970)

Eftirmaður:
Jóhann Hafstein

Fyrirrennari:
Ólafur Thors

Formaður Sjálfstæðisflokksins
(22. október 1961 – 10. júlí 1970)

Eftirmaður:
Jóhann Hafstein

Fyrirrennari:
Pétur Magnússon

Varaformaður Sjálfstæðisflokksins
(8. nóvember 1948 – 22. október 1961)

Eftirmaður:
Gunnar Thoroddsen

Fyrirrennari:
Gunnlaugur Briem Einarsson

Forseti Framtíðarinnar
(1925 – 1925)

Eftirmaður:
Bjarni Sigurðsson

[forsetar_Framtíðarinnar-1] „Forsetar Framtíðarinnar frá 1883“. Menntaskólinn í Reykjavík.

[1]