Tryggvi Þórhallsson

Tryggvi Þórhallsson
Forsætisráðherra Íslands
Í embætti 28. ágúst 1927 – 3. júní 1932
Þjóðhöfðingi	Kristján 10.
Forveri	Jón Þorláksson
Eftirmaður	Ásgeir Ásgeirsson
Formaður Framsóknarflokksins
Í embætti 1928 – 1932
Forveri	Þorleifur Jónsson
Eftirmaður	Ásgeir Ásgeirsson
Alþingismaður
frá til  kjördæmi    þingflokkur 1923 1933  Strandasýsla  Framsóknarfl. 1933 1934  Strandasýsla  Bændaflokkurinn
Persónulegar upplýsingar
Fæddur	9. febrúar 1889 Reykjavík, Íslandi
Látinn	31. júlí 1935 (46 ára) Reykjavík, Íslandi
Stjórnmálaflokkur	Framsóknarflokkurinn Bændaflokkurinn
Maki	Anna Guðrún Klemensdóttir (g. 1913)
Börn	7
Móðir	Valgerður Jónsdóttir
Faðir	Þórhallur Bjarnarson
Háskóli	Háskóli Íslands
Starf	Prestur, stjórnmálamaður
Æviágrip á vef Alþingis

Tryggvi Þórhallsson (9. febrúar 1889 – 31. júlí 1935) var forsætisráðherra Íslands árin 1927 til 1932. Hann var sonur Þórhalls Bjarnarsonar biskups og Valgerðar Jónsdóttur. Hann lærði guðfræði, tók vígslu 1913 og var prestur á Hesti í Borgarfirði til 1916, en þá fluttist hann til Reykjavíkur og var settur dósent í guðfræði við Háskóla Íslands en árið 1917 varð hann ritstjóri Tímans og gegndi því starfi í 10 ár. Hann var kjörinn þingmaður Strandamanna fyrir Framsóknarflokkinn 1923.

Hann var gerður að foringja flokksins og myndaði ríkisstjórn Tryggva Þórhallssonar sem sat frá 1927-1932. Í þeirri stjórn var hann atvinnumálaráðherra auk þess að fara með forsætisráðherraembættið. Hann var þekktastur fyrir að hafa rofið þing árið 1931, rétt áður en til stóð að leggja fram vantrauststillögu á ríkisstjórn hans. Í kosningunum sem fylgdu fékk Framsóknarflokkurinn meirihluta þingsæta með aðeins 35% kjörfylgi, en eitt af hitamálunum sem leiddu til vantrauststillögunnar og þingrofsins voru fyrirhugaðar umbætur í kosningakerfinu, þar sem til stóð að fjölga þingmönnum Reykvíkinga á kostnað landsbyggðarinnar.

Stjórn Tryggva sat því áfram en fór frá vorið 1932. Árið 1933 sagði Tryggvi sig úr Framsóknarflokknum ásamt fleirum og stofnaði Bændaflokkinn, sem fékk þrjá þingmenn í kosningunum 1934 en sjálfur féll Tryggvi í Strandasýslu fyrir Hermanni Jónassyni. Hann dró sig þá að mestu í hlé frá stjórnmálum, enda orðinn heilsuveill og lést ári síðar.

Tryggvi var bankastjóri Búnaðarbankans frá 1932 til æviloka.

Tryggvi bjó mestan hluta ævi sinnar í húsinu Laufási við Laufásveg, sem faðir hans lét reisa árið 1896. Eiginkona hans hét Anna Guðrún Klemensdóttir (1890-1987), dóttir Klemensar Jónssonar landritara og Þorbjargar Stefánsdóttur Bjarnarson húsmóður. Börn Tryggva og Önnu Guðrúnar voru: Klemens Tryggvason (1914-1997) hagstofustjóri, Valgerður Tryggvadóttir (1916-1995) skrifstofustjóri hjá Ríkisútvarpinu, Þórhallur Tryggvason (1918-2008) bankastjóri Búnaðarbankans, Agnar Tryggvason (1919-2012) framkvæmdastjóri, Þorbjörg Tryggvadóttir (1922-2007) framkvæmdastjóri, Björn Tryggvason (1924-2004) aðstoðarbankastjóri Seðlabankans og Anna Guðrún Tryggvadóttir (1927-2020) kennari.

Gröf Tryggva í Hólavallagarði.

Eitt og annað

• Skopblaðið, Spegillinn, kallaði Tryggva Þórhallsson Stóra núllið þegar hann var forsætisráðherra en Jónas Jónsson frá Hriflu þótti ráða mestu í þeirri ríkisstjórn.

Tenglar

• Æviágrip á heimasíðu Alþingis
• Tryggvi Þórhallsson, bankastjóri; andlátsfregn í Morgunblaðinu 1935
• Tryggvi Þórhallsson, aldarminning; Grein í Morgunblaðinu 9. febrúar 1989
• Séra Tryggvi Þórhallsson; Minningartorð eftir séra Þorstein Briem prófast, Kirkjuritið október 1935, bls. 343–347.
• Tryggvi Þórhallsson; þorkell Jóhannesson, Andvari janúar 1939, bls. 3–27.

Fyrirrennari: Jón Þorláksson	Forsætisráðherra (28. ágúst 1927 – 3. júní 1932)	Eftirmaður: Ásgeir Ásgeirsson
Fyrirrennari: Þorleifur Jónsson	Formaður Framsóknarflokksins (1928 – 1932)	Eftirmaður: Ásgeir Ásgeirsson

  Þessi stjórnmálagrein sem tengist Íslandi er stubbur. Þú getur hjálpað til með því að bæta við greinina.