Innósentíus 3.

Innósentíus 3.
Freska af Innósentíusi frá ca. 1219.
Páfi
Í embætti 8. janúar 1198 – 16. júlí 1216
Forveri	Selestínus 3.
Eftirmaður	Honoríus 3.
Persónulegar upplýsingar
Fæddur	22. febrúar 1161(1161-02-22) Gavignano, Páfaríkinu
Látinn	16. júlí 1216 (55 ára) Perugia, Páfaríkinu
Trúarbrögð	Kaþólskur
Foreldrar	Trasimondo de' Conti di Segni og Clarissa Scotti

Innósentíus 3. (22. febrúar 1161 – 16. júlí 1216) var páfi frá 8. janúar 1198 til dauðadags. Hann fæddist undir nafninu Lotario dei Conti di Segni.

Innósentíus var einn voldugasti og áhrifamesti páfi fyrr og síðar. Hann var mikill áhrifamaður í öllum kristnum ríkjum Evrópu og leit á sig sem yfirboðara evrópskra konunga. Innósentíus studdi miklar umbætur á uppbyggingu kaþólsku kirkjunnar með úrskurðum sínum og með fjórða þinginu í Lateran-höll. Kirkjulög urðu fyrir vikið talsvert straumlínulagaðri. Innósentíus notfærði sér bannfæringar og aðrar valdheimildir páfans til að neyða fursta og konunga til að hlýða skipunum sínum, en það tókst þó ekki alltaf. Innósentíus kallaði eftir því að kristnir menn færu í krossferðir gegn Márum á Spáni og múslimum í landinu helga. Auk þess skipaði hann krossferðir gegn katörum í Suður-Frakklandi.

Ein afdrifaríkasta ákvörðun Innósentíusar var að skipuleggja fjórðu krossferðina. Upphaflega var ætlunin að ráðast á Jerúsalem í gegnum Egyptaland en óvæntar aðstæður leiddu til þess að krossfararnir settust þess í stað um Konstantínópel og hertóku borgina. Árásin gekk þvert gegn fyrirskipunum Innósentíusar og hann bannfærði krossfarana fyrir vikið, en þó sætti hann sig með semingi við útkomuna og leit á hana sem merki um vilja Guðs til að binda enda á kirkjusundrungina. Til lengri tíma litið leiddu þessi atvik þó fremur til aukins rígs á milli kaþólsku kirkjunnar og rétttrúnaðarkirkjunnar.

Tilvísanir

Fyrirrennari: Selestínus 3.

Páfi (1198 – 1216)

Eftirmaður: Honoríus 3.

  Þetta æviágrip sem tengist trúarbrögðum er stubbur. Þú getur hjálpað til með því að bæta við greinina.