Dominique
„Dominique“ er vinsælt belgískt lag frá 1963 sungið á frönsku af „nunnunni syngjandi“ Jeanine Deckers. Lagið er óður til heilags Dóminíkusar, stofnanda Dóminísku reglunnar sem Deckers tilheyrði (sem systir Luc-Gabrielle). Lagið fór í efstu sæti vinsældalista víða um heim, einkum í kaþólskum löndum, og hlaut Grammy-verðlaun árið 1964 sem besta gospeltónlist eða önnur trúartónlist. Auk frönsku söng Deckers útgáfur af laginu á hollensku, þýsku, hebresku, japönsku, kóresku og portúgölsku.
