Réunion

Úr Wikipediu, frjálsa alfræðiritinu
Stökkva á: flakk, leita
Réunion
Fáni Réunion Skjaldamerki Réunion
Fáni Skjaldarmerki
Þjóðsöngur:
La Marseillaise (opinber)
Staðsetning Réunion
Höfuðborg Saint-Denis
Opinbert tungumál franska
Stjórnarfar Héraðsstjórn
François Hollande
Didier Robert
Flatarmál
 - Samtals
 - Vatn (%)
*. sæti
2.511 km²
?
Mannfjöldi
 - Samtals (2013)
 - Þéttleiki byggðar
*. sæti
840.974
330/km²
VLF (KMJ)
- Samtals
- á mann
áætl. 2013
21,57 millj. dala (*. sæti)
? dalir (*. sæti)
Gjaldmiðill evra
Tímabelti UTC+4
Þjóðarlén .re
Landsnúmer 262

Réunion (franska: La Réunion) er frönsk eyja í Indlandshafi austan við Madagaskar, um 200 km suðvestan við Máritíus. Íbúafjöldi er um 840.000.

Réunion er eitt af handanhafsumdæmum Frakklands og er, líkt og þau, eitt af 27 umdæmum landsins með sömu lagalegu stöðu og meginlandsumdæmin. Réunion er því hluti af Evrópusambandinu og Evrusvæðinu.

Saga[breyta | breyta frumkóða]

Lítið er vitað um sögu Réunion fyrir komu Portúgala þangað snemma á 16. öld. Arabískir kaupmenn kölluðu eyjuna Dina Morgabin og hún kemur hugsanlega fyrir á korti eftir Al Sharif el-Edrisi frá 1153. Sjómenn frá Afríku og Suðaustur-Asíu kunna líka að hafa komið þangað.

Evrópubúar uppgötvuðu eyjuna um 1507. Hugsanlega var leiðangur Dom Pedro Mascarenhas fyrstur til að koma auga á hana en sá leiðangur gaf Mascarenes-eyjum nafn sitt. Réunion var nefnd Santa Apolónia eftir Apollóníu frá Alexandríu sem bendir til þess að sæfarendur hafi komið auga á eyjuma 9. febrúar sem er messudagur hennar. Sagt er að Diogo Lopes de Sequeira hafi lent á Réunion og Rodrigues árið 1509.

Meira en öld síðar var eyjan enn ósnert. Frakkar gerðu formlegt tilkall til hennar árið 1638 og fjórum árum síðar voru tólf franskir uppreisnarmenn frá Madagaskar fluttir þangað. Þeir voru fluttir aftur til Frakklands skömmu síðar. Árið 1649 var eyjan nefnd Île Bourbon eftir frönsku konungsættinni Búrbónum. Landnám hófst árið 1665 þegar Franska Austur-Indíafélagið sendi þangað fyrstu 20 landnemana.

Eyjan var nefnd Réunion árið 1793 eftir fall konungsveldisins í Frakklandi í minningu endurfunda byltingarmanna frá Marseilles og þjóðvarðliða frá París 10. ágúst 1792. Árið 1801 var eyjan endurnefnd Île Bonaparte eftir Napoléon Bonaparte. Árið 1810 gerði breski sjóliðsforinginn Josias Rowley innrás á eyjuna. Eftir að henni hafði verið skilað til Frakklands á Vínarþinginu fékk hún aftur nafnið Bourbon-eyja og hélt því þar til Búrbónar misstu aftur völdin árið 1848.

Eyjan var byggð evrópskum landnemum og verkamönnum frá ýmsum heimshornum sem lengst af voru þrælar. Þrælahald var afnumið árið 1848. Mikilvægi eyjarinnar sem áfangastaðar á sjóleiðum til Asíu minnkaði mikið eftir að Súesskurðurinn var opnaður árið 1869.

Í Síðari heimsstyrjöld var eyjan undir stjórn Vichy-stjórnarinnar til 30. nóvember 1942 þegar Frjálsir Frakkar hertóku eyjuna með tundurspillinum Léopard. Eyjan varð handanhafsumdæmi árið 1946 með umdæmisnúmerið 974.

Frá 1968 til 1982 voru 1.630 börn flutt frá Réunion til Frakklands, aðallega til Creuse, til að mennta þau. Mörg þeirra voru misnotuð og beitt harðræði af fjölskyldunum sem hýstu þau. Afdrif þessara barna voru dregin fram í dagsljósið árið 2002 og í kjölfarið hefur komið til málaferla.

Árin 2005 og 2006 gekk farsóttin chikungunya yfir eyjuna, líkt og margar aðrar í Indlandshafi á sama tíma. Franska stjórnin sendi fé og hermenn í stórátak til að fækka moskítóflugum sem bera sóttina á eyjunni.

Stjórnmál[breyta | breyta frumkóða]

Réunion á sjö fulltrúa á franska þinginu og þrjá í öldungadeildinni.

Stjórnsýslueiningar[breyta | breyta frumkóða]

Réunion er skipt í fjögur hverfi (arrondissements), 49 kantónur og 24 sveitarfélög. Hún er franskt handanhafsumdæmi og franskt hérað. Eyjan er með einstaklega fá sveitarfélög miðað við önnur frönsk umdæmi af sömu stærð og flest sveitarfélögin ná yfir nokkra byggðakjarna sem stundum eru langt frá hver öðrum. Réunion er hluti af Indlandshafsráðinu.

Map of Réunion

Landfræði[breyta | breyta frumkóða]

Réunion er 63 km löng, 45 km breið og 2150 km² að flatarmáli. Hún er staðsett á heitum reit. Þar eru tvö stór eldfjöll; dyngjan Piton de la Fournaise, sem hefur gosið oftar en 100 sinnum frá 1640, og útdauða eldfjallið Piton des Neiges, sem jafnframt er hæsti tindur eyjunnar (3.070 metrar yfir sjávarmáli). Eldfjöllin þykja líkjast eldfjöllum á Hawaii þar sem er líka svipað loftslag. Hlíðar beggja fjallanna eru vaxnar þéttum skógi. Þéttbýli og landbúnaðarsvæði eru bundin við láglendi við ströndina. Undan vesturströndinni eru kóralrif.

Á Réunion eru þrír sigkatlar: Cirque de Salazie, Cirque de Cilaos og Cirque de Mafate.

Efnahagslíf[breyta | breyta frumkóða]

Aðalútflutningsvara Réunion er sykur. Ferðaþjónusta er einnig drjúg tekjulind.

Wikimedia Commons er með margmiðlunarefni sem tengist


  Þessi Afríkugrein er stubbur. Þú getur hjálpað til með því að bæta við greinina.