Logi Már Einarsson

Úr Wikipediu, frjálsa alfræðiritinu
Jump to navigation Jump to search
Logi Einarsson (LE)
Logi Már Einarsson

Fæðingardagur: 21. ágúst 1964 (1964-08-21) (54 ára)
Fæðingarstaður: Akureyri
5. þingmaður Norðausturkjördæmis
Flokkur: Merki Samfylkingarinnar Samfylkingin
Nefndir: Utanríkismálanefnd, Framtíðarnefnd, Formannanefnd um endurskoðun stjórnarskráarinnar
Þingsetutímabil
2016-2017 í Norðausturk. fyrir Samf.
2017- í Norðausturk. fyrir Samf.
= stjórnarsinni
Embætti
2016- Formaður Samfylkingarinnar
Tenglar
Æviágrip á vef Alþingis

Logi (Már) Einarsson (fæddur 21. ágúst 1964) er formaður Samfylkingarinnar og arkitekt.

Logi var kjörinn varaformaður Samfylkingarinnar á aðalfundi hennar árið 2016. Hann bauð sig fram sem oddviti flokksins í Norðausturkjördæmi í Alþingiskosningum sem haldnar voru þann 29.október 2016. Logi varð með kosningunni einn þriggja fulltrúa flokksins á þingi og sá eini kjördæmakjörni. Í kjölfar afhroðs Samfylkingar í kosningunum sagði formaður flokksins Oddný G. Harðardóttir af sér og tók Logi við þann 31. október 2016.

Æviágrip[breyta | breyta frumkóða]

Logi ólst upp á Akureyri og útskrifaðist með stúdentspróf úr Menntaskólanum á Akureyri árið 1985.[1] Hann nam húshönnun í Osló frá 1986–92 og útskrifaðist með mastersgráðu í arkitektúr.[2]

Eftir útskrift sneri Logi aftur til Akureyrar og vann þar sem landslagshönnuður á H. J. teiknistofu frá 1992 til 1994 og hjá skipulagsdeild Akureyrarbæjar 1994–1996. Hann vann síðan hjá Teiknistofunni Form frá 1996–1997, Úti og inni arkitektastofu árin 1997–2003, Arkitektúr.is arkitektastofu 2003–2004 og Kollgátu arkitektastofu 2003–2016. Hann stofnaði árið 2003 arkitektastofuna Kollgátu ásamt iðnhönnuðinum Ingólfi Frey Guðmundssyni. Hann var einnig stundakennari við Háskólann í Reykjavík árin 2010 til 2012.[3] Logi var formaður Arkitektafélags Íslands árið 2010 til 2012.

Stjórnmálaferill[breyta | breyta frumkóða]

Eftir að hafa starfað í mannvirkjageiranum sem arkitekt í nær tvo áratugi bauð Logi sig fram í þingkosningum fyrir Samfylkinguna í Norðausturkjördæmi árið 2009. Hann náði ekki kjöri en kom fimm sinnum inn sem varaþingmaður á kjörtímabilinu (2009–2013).[4] Hann varð varabæjarfulltrúi á Akureyri árið 2010, bæjarfulltrúi 2012 til 2016, formaður Akureyrarstofu 2014–2015 og formaður skólanefndar 2015–2016. Logi var kjörinn varaformaður Samfylkingarinnar á Landsfundi árið 2016.

Logi náði kjöri einn Samfylkingarmanna í norðausturkjördæmi í alþingiskosningunum árið 2016 og mætti segja að hann hafi haldið flokknum frá því að detta út af þingi. Vegna afhroðs Samfylkingarinnar í kosningunum sagði Oddný G. Harðardóttir af sér sem formaður og Logi, sem varaformaður, tók við formannsembættinu þann 31. október 2016. Hann lét af störfum sem bæjarfulltrúi á Akureyri stuttu eftir að hann var kjörinn á Alþingi.[5]

Í alþingiskosningunum 2017 bætti Samfylkingin við sig og hlaut 12,1 prósent atkvæða og fór frá því að hafa aðeins þrjá þingmenn upp í sjö. Logi var endurkjörinn formaður á landsfundi Samfylkingarinnar í mars 2018 með öllum greiddum atkvæðum. Undir forystu Loga hefur Samfylkingin rétt úr kútnum og mælist gjarnan annar eða þriðji stærsti íslenski stjórnmálaflokkurinn í skoðanakönnunum.

Í dag situr Logi í utanríkismálanefnd Alþingis, formannanefnd um endurskoðun stjórnarskráarinnar og framtíðarnefnd Alþingis.

Einkalíf[breyta | breyta frumkóða]

Logi er giftur lögfræðingnum og flautuleikaranum Arnbjörgu Sigurðardóttur. Þau eiga tvö börn, Úlf og Hrefnu.[6]

Tilvísanir[breyta | breyta frumkóða]

  1. Akureyri. „Bæjarfulltrúar 2010-2014“.
  2. „Logi Már Einarsson «  Gerum Akureyri skemmtilegri“.
  3. „Kollgáta arkitektúr“.
  4. „Logi Einarsson“.
  5. „Logi Már Einarsson nýr formaður Samfylkingarinnar“.
  6. „Logi Már Einarsson «  Gerum Akureyri skemmtilegri“.