Hildur Sverrisdóttir
| Hildur Sverrisdóttir (HildS) | |||||||||||||
|---|---|---|---|---|---|---|---|---|---|---|---|---|---|
 | |||||||||||||
| Alþingismaður | |||||||||||||
| |||||||||||||
| Persónulegar upplýsingar | |||||||||||||
| Fædd | 22. október 1978 Stokkhólmi, Svíþjóð | ||||||||||||
| Stjórnmálaflokkur | Sjálfstæðisflokkurinn | ||||||||||||
| Menntun | Lögfræðingur | ||||||||||||
| Háskóli | Háskólinn í Reykjavík | ||||||||||||
| Æviágrip á vef Alþingis | |||||||||||||
Hildur Sverrisdóttir (f. 22. október 1978) er íslenskur lögfræðingur og alþingismaður Sjálfstæðisflokksins í Reykjavíkurkjördæmi suður.
Ævi og störf
[breyta | breyta frumkóða]Hildur fæddist í Stokkhólmi í Svíþjóð og foreldrar hennar eru Sverrir Einarsson (1948-1998) kennari og rektor Menntaskólans við Hamrahlíð og Rannveig Auður Jóhannsdóttir (f. 1949) kennari og lektor á menntavísindasviði Háskóla Íslands.
Hún lauk stúdentsprófi frá Menntaskólanum við Hamrahlíð árið 2000, lögfræðiprófi frá Háskólanum í Reykjavík árið 2008 og hlaut réttindi sem héraðsdómslögmaður árið 2009. Hildur var framkvæmdastjóri Jafningjafræðslunnar frá 1997-2000, starfaði á lögmannsstofunni Ambrose Appelbe Solicitors í London frá 2001-2003 og var framkvæmdastjóri Reykjavík Dance Festival árið 2007. Hún starfaði sem lögfræðingur og lögmaður hjá fjölmiðlafyrirtækinu 365 frá 2007-2012, var varaborgarfulltrúi Sjálfstæðisflokksins í Reykjavík frá 2010-2016 og borgarfulltrúi frá 2016-2017.[1] Hildur tók sæti á Alþingi við andlát Ólafar Nordal árið 2017 en náði ekki kjöri í alþingiskosningunum síðar sama ár en var 1. varaþingmaður flokksins í Reykjavíkurkjördæmi suður út kjörtímabilið. Í janúar árið 2018 var Hildur ráðin aðstoðarmaður Þórdísar Kolbrúnar Reykfjörð Gylfadóttur ferðamála-, iðnaðar- og nýsköpunarráðherra.[2] Hildur var kjörin á þing í alþingiskosningunum í september árið 2021. Í september 2023 var Hildur gerð að þingflokksformanni Sjálfstæðisflokksins. Hún gegndi því hlutverki í tvö ár.
Hildur tók þátt í sameiginlegu prófkjöri Sjálfstæðisflokksins í Reykjavík 3. september 2016 og endaði í 7. sæti. Hún skipaði 4. sæti á lista flokksins í Reykjavíkurkjördæmi suður fyrir alþingiskosningarnar 2016 og endaði sem 1. varaþingmaður flokksins í kjördæminu.[3] Við andlát Ólafar Nordal 2017 tók Hildur sæti á þingi þar til seinna sama ár, er alþingiskosningar 2017 fóru fram. Í þeim skipaði hún 3. sæti á lista flokksins en náði ekki kjöri.
Í prófkjöri Sjálfstæðisflokksins í Reykjavík fyrir alþingiskosningar 2021 hafnaði Hildur í 4. sæti og náði þar með betri árangri en m.a. þrír sitjandi þingmenn flokksins.[4] Skipaði hún í kjölfarið 2. sætið á lista flokksins í Reykjavíkurkjördæmi suður í alþingiskosningunum og náði kjöri sem 5. þingmaður kjördæmisins.
Hildur var ritstjóri bókarinnar Fantasíur sem kom út árið 2012 og var Bakþankapistlahöfundur í Fréttablaðinu frá 2013 - 2016.[1]
Deila um slit þingfundar 2025
[breyta | breyta frumkóða]Í tengslum við langar umræður um veiðigjöld sleit Hildur, sem 5. varaforseti Alþingis, þingfundi 9. júlí 2025 kl. 23:39 þegar hún sat í forsetastóli. Í umfjöllun kom fram að slit fundarins hefðu verið gagnrýnd af stjórnarmeirihlutanum og sögð hafa átt sér stað án nægilegs samráðs við forseta Alþingis, Þórunni Sveinbjarnardóttur.[5]
Daginn eftir brugðust ráðherrar ríkisstjórnarinnar við atvikinu í ræðum og yfirlýsingum. Guðmundur Ingi Kristinsson, mennta- og barnamálaráðherra, líkti fundarslitunum við valdarán og kallaði eftir afsögn Hildar. Kristrún Frostadóttir, forsætisráðherra, gagnrýndi atvikið harðlega og sagði það fordæmalaust og alvarlegt, og Þorgerður Katrín Gunnarsdóttir, utanríkisráðherra, sagði að með þessu hefði verið „klippt á lýðræðið“.[6][7]
Hildur hafnaði því að um „valdarán“ hefði verið að ræða og sagði að hún hefði slitið þingfundi í góðri trú og talið sig fylgja venjum um fundarlok, meðal annars þar sem hún taldi að næsta ræða með andsvörum myndi annars fara fram yfir hefðbundinn fundartíma og að hún hefði ekki fengið fyrirmæli um lengri fund.[8]
Forseti Alþingis, Þórunn Sveinbjarnardóttir, sagði daginn eftir að ákvörðun Hildar hefði verið rædd á fundi forsætisnefndar og að af hennar hálfu yrðu „engin eftirmál“; hún féllst jafnframt á skýringu Hildar um að hún hefði slitið fundi í góðri trú.[9]
Í kjölfarið hélt deilan um þinghaldið áfram í samhengi við umræðu um beitingu 71. gr. þingskapalaga og samskipti forseta Alþingis og stjórnarandstöðu.[10][11]
Tilvísanir
[breyta | breyta frumkóða]- 1 2 „Alþingi Hildur Sverrisdóttir - Æviágrip“ (skoðað 26. september 2021)
- ↑ Kjarninn.is, „Hildur Sverrisdóttir ráðin aðstoðarmaður Þórdísar Kolbrúnar“ (skoðað 26. september 2021)
- ↑ „Alþingiskosningar 2016 – fréttir“. kosningasaga. 16 apríl 2016. Sótt 27 október 2021.
- ↑ Ingvar (6 júní 2021). „Lokatölur: Guðlaugur Þór efstur“. Sjálfstæðisflokkurinn. Sótt 27 október 2021.
- ↑ „Forsætisráðherra sagði stjórnskipan Íslands í hættu: „Við munum verja lýðveldið Ísland"“. Heimildin.
- ↑ Sólrún Dögg Jósefsdóttir. „Segir ummæli ráðherra um sig ógeðfelld“. Vísir.
- ↑ „Forsætisráðherra sagði stjórnskipan Íslands í hættu: „Við munum verja lýðveldið Ísland"“. Heimildin.
- ↑ Árni Sæberg. „Þykir leitt að hafa valdið uppnámi“. Vísir.
- ↑ „Forsætisráðherra sagði stjórnskipan Íslands í hættu: „Við munum verja lýðveldið Ísland"“. Heimildin.
- ↑ „Hildur Sverrisdóttir: Beiting 71. gr. þingskapalaga (ræða)“. Alþingi.
- ↑ Sólrún Dögg Jósefsdóttir. „Stjórnarandstaðan sakar forseta um alvarlegan trúnaðarbrest“. Vísir.