Þingeyjarsveit

Þingeyjarsveit
Kjördæmi	Norðausturkjördæmi
Flatarmál  – Samtals	5. sæti 5.972 km²
Mannfjöldi  – Samtals  – Þéttleiki	37. sæti 852 (2021) 0,14/km²
Sveitarstjóri	Dagbjört Jónsdóttir
Þéttbýliskjarnar	Laugar (íb. 109)
Sveitarfélagsnúmer	6612
Póstnúmer	601, 641, 645, 650
Vefsíða sveitarfélagsins

Þingeyjarsveit er sveitarfélag á Norðurlandi eystra, kennt við Þingey í Skjálfandafljóti.

Sveitarfélagið varð til 9. júní 2002 við sameiningu fjögurra hreppa: Ljósavatnshrepps, Bárðdælahrepps, Hálshrepps og Reykdælahrepps. Í kjölfar atkvæðagreiðslu 26. apríl 2008 sameinaðist Þingeyjarsveit svo Aðaldælahreppi.

Þingeyjarsveit er víðfeðm en byggð takmarkast við Fnjóskadal, Ljósavatnsskarð, Köldukinn, Bárðardal, Laxárdal, Aðaldal og Reykjadal en á síðastnefnda staðnum er þorpið Laugar. Megnið af landi sveitarfélagsins er í óbyggðum og nær það alveg inn á Vatnajökul. þrjú stór vatnsföll renna um Þingeyjarsveit, Laxá í Laxárdal, Fnjóská í Fnjóskadal og Skjálfandafljót í Bárðardal. Í því síðarnefnda er Goðafoss nálægt Fosshóli við Þjóðveg 1. Í Fnjóskadal er Vaglaskógur, vinsælt útivistarsvæði.

Á Stórutjörnum í Ljósavatnsskarði, á Hafralæk í Aðaldal og á Laugum í Reykjadal eru reknir grunnskólar og á Laugum er einnig framhaldsskóli.

Í atkvæðagreiðslu 5. júní 2021 samþykktu íbúar sveitarfélagsins sameiningu við Skútustaðahrepp með 65,2% greiddra atkvæða.