Reykjahlíð (Mývatnssveit)

Mývatn, Hlíðarfjall og nágrenni.

Reykjahlíð er landmikil bújörð og kirkjustaður í Mývatnssveit.

Jörðin teygir sig frá bökkum Mývatns í vestri, austur til Jökulsár á Fjöllum. Norður að Dettifossi og að fjallinu Eilífi, þar sem sveitarfélagið Norðurþing tekur við. Vestur fyrir og norður fyrir Gæsafjöll þar sem jörðin Þeistareykir tekur við. Suðurmörk jarðarinnar eru í Ódáðahrauni.

Bæjarstæðið er á bökkum Mývatns, en í nágrenninu hefur, eftir stofnun Kísiliðjunnar , sem nú er horfin, vaxið upp Þorp þar sem bjuggu 210 manns árið 2019. Á staðnum eru hótel og flugvöllur. Reykjahlíð tilheyrir Skútustaðahreppi og er skrifstofa sveitarfélagsins staðsett í þorpinu. Íþróttafélagið Mývetningur er starfrækt þar.

Á jörðinni finnst mikill jarðhiti og rekur Landsvirkjun gufuaflsvirkjanir í Bjarnarflagi og við Kröflu. Við Jarðbaðshóla í Bjarnarflagi eru Jarðböðin við Mývatn. Fjölsótt hverasvæði, sem kallast Hverarönd, er rétt austan við Námafjall og Námaskarð.