Austurríki

Úr Wikipediu, frjálsa alfræðiritinu
Stökkva á: flakk, leita
Republik Österreich
Lýðveldið Austurríki
Fáni Austurríkis Skjaldamerki Austurríkis
(Fáni Austurríkis) (Skjaldarmerki Austurríkis)
Kjörorð: ekkert
Þjóðsöngur: Land Der Berge, Land Am Strome
Staðsetning Austurríkis
Höfuðborg Vín
Opinbert tungumál þýska, svæðisbundin: slóvenska, króatíska og ungverska
Stjórnarfar Lýðveldi
Heinz Fischer
Werner Faymann
Aðild að Evrópusambandinu 1. janúar 1995
Flatarmál
 • Samtals
 • Vatn (%)
113. sæti
83.878,99 km²
1,3
Mannfjöldi
 • Samtals (2014)
 • Þéttleiki byggðar
101. sæti
8.507.786
99/km²
VLF (KMJ)
 • Samtals
 • á mann
áætl. 2005
275.020 millj. dala (34. sæti)
33.615 dalir (8. sæti)
Gjaldmiðill Evra
Tímabelti UTC+2
Þjóðarlén .at
Landsnúmer 43

Austurríki (opinberlega Lýðveldið Austurríki; þýska: Republik Österreich) er landlukt ríki í Mið-Evrópu með um 8,5 milljónir íbúa. Landið er sambandslýðveldi sem samanstendur af níu sambandsríkjum. Höfuðborg þess heitir Vín. Austurríki einkennist af hálendi Alpafjallanna en teygir sig einnig inn að Bæheimsskógi og Pannonísku sléttunni. Í margar aldir var Austurríki hluti af þýska ríkinu en klauf sig endanlega frá því síðla á 19. öld er Prússland varð leiðandi aðili í sameiningu þýsku ríkjanna. Austurríki er aðildarríki að NATO og er meðlimur Evrópusambandsins.

Lega og lýsing[breyta]

Austurríki er 83.879 km2 að stærð og er því meðalstórt ríki í Evrópu. Það á land að átta öðrum ríkjum:

Land Lengd landamæra Ath.
Þýskaland 784 km Deila með sér Bodenvatn
Ítalía 430 km
Ungverjaland 366 km Deila með sér Neusiedler See
Tékkland 362 km
Slóvenía 330 km
Sviss 164 km Deila með sér Bodenvatn
Slóvakía 91 km
Liechtenstein 35 km
Alpafjöll og Bæheimsskógur eru dökk á myndinni. Á milli sér í Dónárdalinn mikla og Vínarundirlendið í austri.

Gróflega má skipta Austurríki í fimm jarðfræðilega hluta.

  • Alpafjöll en þau þekja rúmlega 60% landsins og teygja sig frá vestri og nær alla leið austur til Vínarborgar
  • Bæheimsskógur og hæðalandið norðan þeirra (liggur að Bæheimi í Tékklandi)
  • Dónárdalurinn mikli sem nær frá Salzburg og austur eftir landinu
  • Vínarundirlendið í austri
  • Pannóníska sléttan í suðaustri (liggur að Ungverjalandi og Slóveníu)

Auk Alpafjalla er Dóná mjög áberandi í landslagi Austurríkis en fljótið rennur í gegnum landið norðanvert frá vestri til austurs.

Í Austurríki eru tvö lítil svæði, Kleinwalsertal í Vorarlberg og Jungholz í Tírol. sem ekki eru aðgengileg annars staðar frá Austurríki vegna hárra fjalla. Heldur eru bæði svæðin eingöngu aðgengileg frá Þýskalandi.

Þjóðfræði[breyta]

Orðsifjar[breyta]

Austurríki hefur í gegnum tíðina verið nefnt nokkrum nöfnum.

  1. Allt til 8. aldar hét það Marcha Orientalis, þ.e. Austurmörk (Ostmark). Landið var í austur frá gamla frankaríki Karlamagnúsar. Orðið mörk var gjarnan notað yfir landsvæði (sbr. Mark Brandenburg, Danmörk og svo framvegis).
  2. Í í skjali Ottós II keisara frá 976 nefnir hann héraðið Ostarichi, sem bókstaflega merkir ríkið í austri (Austurríki), enda var það í austur frá þýska ríkinu. Þetta er heitið sem festist í norðurgermönskum málum (til dæmis íslensku og dönsku). Þaðan kemur einnig franska heitið en í bjagaðri mynd (Autriche). Úr Ostarichi varð þýska heitið Österreich, enda hefur það sömu merkingu.
  3. Á latínu hét landið Austria en latína var diplómata- og fræðimál Evrópu allt til siðaskipta. Ýmis önnur mál hafa tekið upp þetta heiti, svo sem enska, ítalska, spænska og gríska.
  4. Nokkur önnur heiti hafa sést en þau voru öll stuttlíf. Þar má nefna Ostland (Austurland), Osterland og fleiri.

Mannfjöldi[breyta]

Í Austurríki búa 8,4 milljónir manna á tæplega 84 þúsund km2 svæði. Þéttleiki landsins er því 100 íbúar á km2. Mikil fjölgun fólks var merkjanleg á tímum iðnbyltingarinnar, þrátt fyrir talsverðar Ameríkuferðir en íbúum fækkaði snöggt meðan heimstyrjaldirnar tvær á 20. öld stóðu yfir. Eftir stríð hefur Austurríkismönnum fjölgað hægt og er fjölgunin í dag ekki nema um 30 þúsund á ári. Fjölgunin er til komin vegna innflutnings erlendra borgara, þar sem fæðingar- og dánartala landsins er nær jafnhá. Flestir þeirra sem eru af erlendu bergi brotnir eru frá löndum fyrrverandi Júgóslavíu. Útlendingar í Austurríki eru rúmlega 800 þúsund talsins, þ.e. tæp 10% af íbúafjölda landsins. Í Vín er hlutfallið 20%.

Tungumál[breyta]

Við ungversku landamærin eru bæjarheitin rituð á tveimur málum

Í Austurríki er þýska opinbert tungumál. Hér er hins vegar um suðurþýska mállýsku að ræða, þannig að framburður og orðaforði eru eitthvað ólík háþýsku. Austurríska mállýskan líkist helst bærísku en hefur þó þróast enn lengra. Við inngöngu Austurríkis í Evrópusambandið var samið um að landið fengi að halda sínum sérstaka orðaforða. Önnur viðurkennd tungumál í Austurríki eru ungverska, slóvenska, burgenlandkróatíska, tékkneska, slóvakíska og rómaní (sígaunar).

Trú[breyta]

Tæplega 75% Austurríkismanna eru kaþólskir. Aðeins 4,6% tilheyra evangelískum kirkjum. Um 340 þúsund manns eru Múhameðstrúar en það eru 4,3% landsmanna. Gyðingar eru 8-10 þúsund. Langflestir þeirra búa í Vín. Tíu þúsund manns tilheyra búddisma. Þeir sem ekki tilheyra neinum trúflokki eru 12% af íbúum landsins.

Stjórnsýsla[breyta]

Þjóðfáni og skjaldarmerki[breyta]

Þjóðfáni Austurríkis samanstendur af þremur láréttum röndum: Rauðri, hvítri og rauðri. Hann kom fyrst fram 1230 svo vitað sé og var þá tákn Babenberger-ættarinnar, en það var markgreifa- og hertogaættin í Austurríki fram á síðla 13. aldar. Ekkert er vitað um tilurð fánans, en þjóðsagan segir að hann hafi orðið til í þriðju krossferðinni. Með í för var Leópold V hertogi af Babenberg. Í umsátrinu um Akkó (1189-1191) höfðu bardagar orðið svo miklir að hvítur kirtill Leópolds litaðist rauður. Eingöngu hafi sést í hvíta beltisbindið sem sverðið hans hékk í. Eftir daga Babenberg-ættarinnar tók Habsborgarættin fánann upp og gerði hann síðar að ríkisfána. Fánanum var breytt á ýmsum tímabilum, svo sem við innlimun Austurríkis í þýska ríki nasista.

Skjaldarmerki Austurríkis sýnir svartan örn sem horfir til vinstri. Á sitthvorum fæti eru hlekkir. Klærnar halda á hamri og sigð. Á brjóstinu er þjóðfáninn í skjaldarformi og á höfðinu er kóróna í formi borgarmúrs. Örninn var merki þýska ríkisins, en Austurríki var hluti af því fram í byrjun 19. aldar. Sigðin merkir bændurna. Hamarinn merkir vinnuaflið. Kórónan merkir borgarana. Örninn var í aldaraðir merki þýska ríkisins og Austurríkis en núverandi örn var tekið upp 1919, við upplausn austurríska-ungverska sambandsins. 1945 var hlekkjunum bætt við en þeir merkja sigur yfir einræðisstjórn nasista á tímum heimstyrjaldarinnar síðari.

Stjórnkerfi[breyta]

Austurríki er lýðveldi sem samanstendur af níu sambandsríkjum. Austurríska þingið samanstendur af tveimur deildum: Þjóðarráðinu (Nationalrat) og sambandsráðið (Bundesrat). Hið fyrrnefnda mynda 183 þingmenn sem kosnir eru í almennum kosningum. Kjörtímabilið er fimm ár. Sambandsráðið samanstendur af fulltrúum sambandsríkjanna, sem einnig eru þingmenn í hverju sambandsríki fyrir sig. Æðsti yfirmaður þingsins er kanslarinn, sem valinn er af forseta landsins. Kjörtímabil forsetans er sex ár. Allir ráðherrar eru tilnefndir af forsetanum en það er kanslarinn sem endanlega velur þá. Hvert sambandsland er með eigið þing (Landtag). Í hverju þingi eru sextán þingmenn sem kosnir eru í almennum kosningum og velja þeir ráðherrana í hverju sambandslandi fyrir sig.

Forsetar Austurríkis síðan stofnun 2. lýðveldisins:

Röð Forseti Tímabil Ath.
1 Karl Renner 1945-1950 Lést í embætti
2 Theodor Körner 1951-1957 Lést í embætti
3 Adolf Schärf 1957-1965 Lést í embætti
4 Franz Jonas 1965-1974 Lést í embætti
5 Rudolf Kirchschläger 1974-1986 Óflokksbundinn
6 Kurt Waldheim 1986-1992 Var áður aðalritari Sameinuðu þjóðanna
7 Thomas Klestil 1992-2004 Lést í embætti
8 Heinz Fischer Síðan 2004

Landið var keisararíki frá því er þýska ríkið leið undir lok. Keisarar Austurríkis voru aðeins fjórir talsins:

Röð Keisari Tímabil Ath.
1 Frans I 1804-1835 Var síðasti keisari þýska ríkisins
2 Ferdinand I 1835-1848 Sonur Frans I og Maríu Teresíu
3 Frans Jósef I 1848-1916 Bróðursonur Ferdinands I
4 Karl I 1916-1918 Frændi ofangreindra keisara

Her[breyta]

Í Austurríki er herskylda fyrir alla karlmenn og stendur hún yfir í sex mánuði. Í hernum eru að staðaldri 35 þúsund manns en 25 þúsund til viðbótar eru tiltækir. Konur eru ekki herskyldar en eru engu að síður velkomar. Markmið hersins er að tryggja varnir ríkisins en einnig að aðstoða við hjálparstarf ef náttúruhamfarir valda skaða eða neyðaraðstæður koma upp. Eftir að heimstyrjöldinni síðari lauk hefur Austurríki ekki tekið þátt í neinum hernaðarátökum. Þó hefur landið sent hermenn til starfa erlendis síðan 1960. Í öllum slíkum tilvikum er um litlar herdeildir að ræða. Stærsta verkefni austurríska hersins var KFOR-verkefnið í Kosóvó 1999 en 436 manns voru sendir þangað.

Gjaldmiðill[breyta]

Gjaldmiðillinn í Austurríki er evran. Á árunum 1925-1938 og aftur 1945-1998 var notast við Schilling (skildingur). Einn Schilling voru 100 Groschen. Á árunum 1938-1945 var landið hluti af Þýskalandi og var þá notast við þýsku ríkismörkina. Skildingurinn átti uppruna sinn í ríki Karlamagnúsar en ýmis lönd hafa notað hann í gegnum aldirnar, svo sem England (Shilling), Þýskaland og Danmörk (Skilling). Árið 1999 tók Austurríki upp evruna, en skildingurinn var í notkun til 28. febrúar 2002.

Saga Austurríkis[breyta]

Landnám[breyta]

Langstærstur hluti Austurríkis var hernuminn af Rómverjum. Aðeins nyrsti hlutinn, fyrir norðan Dóná, tilheyrði germönum. Við endalok Rómaveldis þustu vestgotar, austgotar og alemannar yfir landið en enginn þessara þjóðflokka settist þar að. Á sjöttu öld fluttu bajúvarar til landsins frá norðri en alemannar settust að vestast í Vorarlberg. Eftir það fluttu einnig slavar í einhverjum mæli til landsins frá austri. Árið 600 stofnuðu slavar fyrsta sjálfstæða slavaríkið í Evrópu (Karantanía) en það náði inn í suðurhluta núverandi Austurríkis (Kärnten og Steiermark). Þetta ríki liðaðist undir lok á 8. öld og varð loks hluti hins mikla frankaríkis. Á tímum Karlamagnúsar hófst landnám germana þar, en Ungverjar eyðilögðu það jafnharðan. Eftir að Ottó I keisari sigraði Ungverja endanlega árið 955, hófst nýtt landnám bajúvara frá Bæjaralandi í vestri. Árið 976 hlaut Leopold frá Bæjaralandi, af ætt Babenberg, allt svæðið að léni undir Ottó III keisara. Það var þá kallað Ostarichi, sem seinna breyttist í Österreich. Austurríki varð því undir stjórn Bæjaralands en var greifadæmi í þýska ríkinu.

Uppgangur Habsborgara[breyta]

Á tímum Babenberg ættarinnar var landið rutt og þar myndaðist heilstætt samfélag. Babenberg-ættin átti líka Bæjaraland og voru bæði greifadæmin undir sömu stjórn. En 1156 aðskildi Friðrik Barbarossa keisari bæði löndin og breytti Austurríki í hertogadæmi. Með þessum gjörningi hófst saga Austurríkis sem eigið landsvæði innan þýska ríkisins, enda var það þá sjálfstætt samfélag undir stjórn hertoga. Fyrsti hertoginn hét Hinrik, með viðurnefnið Jasormimgott. Hann gerði borgina Vín að aðsetri sínu, en síðan þá hefur Vín verið höfuðstaður Austurríkis. Á tíma Hinriks hertoga varð Steiermark hluti af Austurríki en einnig landsvæði sem í dag eru hluti af Slóveníu. Þegar Friðrik II hertogi féll í orrustu 1246, dó Babenberg-ættin út. Þá hófst valdabarátta um héraðið, sem var nokkurn veginn stjórnlaust næsta áratuginn. Ottókar II, konungur Bæheims, náði völdum 1256 en hann féll í orrustu 1278 gegn Rúdolf af Habsborg. Þar með náði Habsborgarættin völdum í Austurríki sem ríkjandi hertogar og héldu þeim í 640 ár, allt til 1918.

Erkihertogadæmið[breyta]

1335 féll Kärnten í hendur Habsborgara og 1363 Tírol. Þar með var Austurríki orðið að stóru hertogadæmi og náði vel yfir núverandi landmæri. Þetta þótti þá vera allstórt svæði og 1379 var hertogadæminu skipt upp í þrjá hluta.

  • Neðra Austurríki (Ober – og Niederösterreich)
  • Innra Austurríki (Steiermark, Kärnten, Krain, Istría og Tríest)
  • Austurríki nær (Tírol, Vorarlberg, ásamt löndum í Alsace og Württemberg)

Þetta leiddi til mikilla erja á allri 15. öldinni, enda voru erfingjarnir margir og löndin góð. Austurríki sameinaðist ekki aftur fyrr en 1493 er Friðrik V hertogi erfði alla hlutana. Friðrik var kjörinn keisari þýska ríkisins á miðri 15. öld. Nokkrir hertogar Habsborgara höfðu áður verið kjörnir konungar (og keisarar) þýska ríkisins en með Friðrik, sem kallaðist Friðrik III, myndaðist nær óbrotin lína Habsborgara sem konungar og keisarar þýska ríkisins, allt til enda þess 1806. Friðrik hóf Austurríki upp sem erkihertogadæmi innan ríkisins strax árið eftir kjör sitt sem konungur. Þannig stóð erkihertogadæmið Austurríki jafnfætis við kjörfurstadæmin, með þeirri undantekningu að erkihertoginn hafði ekki kjörgengi í konungskjöri. Sem erkihertogadæmi varð Austurríki hins vegar sjálfstætt ríki í ríkinu.

Stórveldi[breyta]

1477 kvæntist hertoginn Maximilian Maríu frá Búrgund. Maximilian varð síðan keisari 1493 og erfði Habsborg því Búrgúnd. Eftir að sonur hans, Filippus, kvæntist Jóhönnu af Kastilíu og Aragon, 1496, eignaðist Habsborgarveldið Spán og þar með nýju löndin í Ameríku en einnig Napolíríkið, Sikiley og Sardiníu. Þegar Karl V varð keisari 1519 stóð Habsborg á hátindi veldis síns. Austurríki var hluti af stórveldi. Karl V hafði þó ekki mikinn áhuga á að viðhalda ríkinu á einni hendi. Strax 1521 skildi hann Austurríki frá og gaf það bróður sínum, Ferdinand I. Síðar gaf hann syni sínum Spán (ásamt Niðurlöndum og Ameríku). 1526 töpuðu Ungverjar orrustu við osmani (Tyrki) og erfði Ferdinand þá Ungverjaland og Bæheim, ásamt Mæri, Sílesíu og Lausitz. Hins vegar varð Ferdinand að fást við Tyrki. Árið 1538 var konungsríkinu Ungverjaland skipt í þrennt:

  • Meginhluti landsins hélst undir krúnu Austurríkis
  • Austurhluti landsins féll í hendur Tyrkjum
  • Siebenbürgen (Rúmenía) var stjórnað af ungverskum aðli, utan áhrifasvæði Austurríkis

1556 afþakkaði Karl V og settist í helgan stein. Þar með skiptist Habsborg í tvær nýjar ættir: Spænska ættin og austurríska ættin. Allir keisarar þýska ríkisins eftir þetta voru af austurrísku ættinni.

Siðaskipti og Tyrkjaógnin[breyta]

Tyrkir sitja um Vín 1529

Þegar siðaskiptin hófust snemma á 16. öldinni fór nýja trúin eins og eldur í sinu um gjörvallt Austurríki. Aðallinn og keisarinn viðhéldu kaþólskunni en ekki kom til átaka eða uppþota í ríkinu. Ef til vill átti óttinn við Tyrki einhvern þátt í því að þjappa íbúum Austurríkis saman. 1529 voru Tyrkir komnir að borgarmörkum Vínar.

Þann 27. september hófu þeir umsátur um borgina undir forystu soldánsins Súlíman I. Íbúar Vínar voru skelfingu lostnir. Margir íbúar Vínar flúðu en á hinn bóginn tókst nokkur þúsund hermönnum frá þýska ríkinu og Spáni að komast til borgarinnar áður en umsáturshringurinn lokaðist. Tyrkir voru hins vegar með nær 250 þúsund manna lið. Eftir nokkra bardaga ákvað Súlíman að hætta umsátrinu sökum versnandi veðurs en vetur var í nánd og birgðaflutningar erfiðir. Þann 14. október hurfu Tyrkir úr landi. Þeir birtust aftur 1532 en þá hafði Karli V tekist að safna miklu liði. Súlíman réðist því ekki á Vín, heldur rændi og ruplaði í Steiermark og hvarf á braut á ný.

Árið 1600 hóf kaþólska kirkjan gagnsiðbótina í Austurríki, heldur seinna en víða annars staðar í þýska ríkinu. Siðbótin var hins vegar mjög grimmileg og árangurinn eftir því. Á skömmum tíma tókst að snúa meirihluta íbúa Austurríkis til kaþólsku á ný. Þar af leiðandi tók landið þátt í 30 ára stríðinu og barðist með bæjurum gegn siðaskiptamönnum og gegn Svíum.

Síðara umsátur Tyrkja[breyta]

Orrustan um Vín

1683 birtust Tyrkir aftur við borgardyr Vínar. Að þessu sinni undir forystu stórvesírsins Kara Mústafa. 14. júlí var umsáturshringur lagður um borgina. Meðan Vín var þannig einangruð frá umheiminum, rústuðu Tyrkir svæðinu í kring, sem og Neðra Austurríki. Mörgum borgum var eytt og íbúar þeirra stráfelldir. Þrátt fyrir ákafar árásir á Vín náðu Tyrkir ekki að komast inn fyrir borgarmúrana. Í ágúst hafði Leopold I keisari safnað nægu liði til að þramma til Vínar. Með í för voru hermenn frá Bæjaralandi, Frankalandi, Saxlandi, Sváfalandi og Feneyjum. Einnig mætti pólskur her til Vínar. Sobieski konungur var aðal-herstjórnandi kristna hersins.

Þann 12. september varð stórorrusta við Tyrki í Kahlenberg við Vín. Meðan sú orrusta stóð yfir gerði herinn í Vínarborg útrás og réðust á Tyrki. Eftir tólf tíma bardaga létu Tyrkir undan síga og flúðu af vettvangi. Vín var þannig björguð en reyndar er talið að ósigur Tyrkja hafi bjargað Austurríki öllu. Í kjölfarið var farið í Tyrkjastríð á Balkanskaga. Það fyrra fór fram 1683-1699 en í því var Eugen prins af Savoy mjög sigursæll. Austurríki hlaut þá landsvæði á Balkanskaga sem í dag eru hlutar Slóveníu og Króatíu.

Spænska og austurríska erfðastríðin[breyta]

María Teresía. Málverk eftir Martin van Meytens.

Árið 1701 hófst spænska erfðastríðið. Ýmsir gerðu tilkall til spænsku krúnunnar við andlát Karls II konungs, en hann var síðasti aðili spænsku Habsborgaranna. Jósef I keisari gerði tilkall til krúnunnar fyrir hönd Austurríkis, en eftir mikla bardaga hlaut Filippus V frá Frakklandi hnossið. Stríðinu lauk með friðarsáttmálunum í Utrecht 1713. Eftir fleiri Tyrkjastríð 1714-18 hlaut Austurríki landsvæðin í norðurhluta Bosníu og Serbíu og nokkur fleiri.

Habsborgarveldið náði því mestri útbreiðslu sinni eftir að Spánn var skilinn frá. 1711 hafði Karl VI tekið við sem keisari þýska ríkisins. Honum var strax ljóst að hann yrði síðasti Habsborgarinn í karllegg og hafði áhyggjur af framtíð Austurríkis og þýska ríkisins. Því bjó hann til nýja stjórnarskrá fyrir keisaraveldið, en í því kvað svo á að keisaraembættið mætti ganga í erfðir með dætrum í Austurríki. Karl lést 1740. Sökum þess að enginn önnur lönd þýska ríkisins, né heldur kjörfurstarnir, viðurkenndu stjórnarskrá Karls VI um erfðir kvenna, braust út stríð um krúnu Austurríkis og þýska ríkisins.

Friðrik mikli Prússakonungur réðist inn í Sílesíu og hertók landsvæðið. Hann gerði bandalag við kjörfurstann af Bæjaralandi, sem í kjölfarið var kjörinn keisari sem Karl VII. Prússar, Bæjarar og Frakkar börðust gegn Austurríki en Englendingar og Hollendingar veitti Austurríkismönnum mikinn stuðning. Karl VII lést 1745 og þá var leiðin greið fyrir elstu dóttur Karls VI, Maríu Teresíu. Hún var krýnd sem erkihertogaynja af Habsborg og drottning Ungverjalands, en eiginmaður hennar, Frans I, var krýndur sem keisari ríkisins. Enn var þó barist í stríðinu til 1748. Sjö ára stríðið 1756-63 breytti engu um Sílesíu eða önnur landamæri Austurríkis.

Evrópumál[breyta]

Jósef II tók við af móður sinni sem erkihertogi af Austurríki 1780. Hann var mjög framfarasinnaður og vildi allt fyrir fólkið gera. 1785 stakk hann upp á því að fá að skipta á austurrísku Niðurlöndum (þ.e. Belgíu) fyrir Bæjaraland, þannig að Bæjaraland og Austurríki myndu sameinast í eitt ríki. Þýska ríkið hlytu Niðurlönd. Tillögunni var hins vegar hafnað af kjörfurstunum. Á hinn bóginn tók Jósef þátt í skiptingu Póllands 1772, 1793 og 1795 (ásamt Prússlandi og Rússlandi). Það með fékk Austurríki stóran hluta landsins, allt norður til Varsjár en Pólland þurrkaðist út af landakortinu. Franska byltingin skók Evrópu 1789. Strax 1794 hertók franskur byltingarher Niðurlönd Habsborgara (þ.e. Belgíu).

Napoleonsstríðin[breyta]

Austurríki tók þátt í bandalaginu gegn Napoleon þegar árið 1799 til að stemma stigu við yfirgang Frakklands. Þrátt fyrir það stóðu Austurríkismenn einir gegn Napoleon í orrustunni við Marengo og við Hohenlinden árið 1800 og biður ósigur í bæði skiptin. Við það unnu Frakkar lönd við Rínarfljót. Eftir sigur Frakka í þríkeisaraorrustunni miklu við Leipzig 1805 komust þeir til Vínarborgar og tóku borgina. Við það tækifæri missti Austurríki lönd sín á Ítalíu (til dæmis Venetíu). Frakkar yfirgáfu borgina hins vegar skjótt aftur. Þegar þýska ríkið var lagt niður 1806 eftir þrýsting frá Napoleon, var Frans II ríkjandi keisari. Strax á sama ári lýsti hann yfir stofnun Austurríkis sem keisararíkis. Segja má að þetta hafi verið stofnstund Austurríkis sem óháð og frjálst ríki, þrátt fyrir að nær allir keisarar þýska ríkisins hafi verið af ætt Habsborgara og oftast setið í Vín síðan á 15. öld. Nýja keisararíkið stóð til 1918.

Aftur var myndað bandalag gegn Napoleon. Austurríki tók hins vegar ekki þátt í neinum orrustum fyrr en 1809. Á því ári töpuðu þeir fyrir Napoleon í orrustunni við Abensberg, Eggmühl og Regensburg. Austurríski herinn flúði til Bæheims og Napoleon þrammaði til Vínar. Frakkar skutu á borgina og hertóku hana í einni svipan í maí. Við svo búið sneri austurríski herinn aftur frá Bæheimi. Í orrustunni við Aspern (nálægt Vín) sigruðu Austurríkismenn og hröktu Frakkar burt úr landi á næstu mánuðum. Þetta var fyrsta stóra tap Napoleons á ferli sínum. Fyrir vikið hélt Austurríki sjálfstæði sínu. 1813 dró til þjóðarorrustunnar miklu við Leipzig. Þar mættust Frakkar og bandamenn (Austurríki, Prússland, Rússland og Svíþjóð). Orrustan stóð yfir í þrjá heila daga og lauk með ósigri Napoleons. Þetta var síðasta orrusta Austurríkismanna gegn honum. Þeir komu ekki við sögu við lokafall Napoleons í orrustunni við Waterloo.

Vínarfundurinn[breyta]

Metternich fursti

Eftir fall Napoleons var nauðsynlegt að koma skipan á nýjum ríkjum og landamærum í Evrópu. Haldin var viðamikil ráðstefna í Vín að boði Frans I keisara, en fundarstjóri var utanríkisráðherra landsins, Metternich fursti. Ráðstefnan hófst 18. september 1814 og kallast Vínarfundurinn (þ. Wiener Kongress). Allir helstu leiðtogar í Evrópu sóttu ráðstefnuna, sér í lagi frá Rússlandi, Bretlandi, Austurríki, Prússlandi, Frakklandi, kirkjuríkisins og margra annarra smærri ríkja. Vín var næsta árið pólitísk þungamiðja Evrópu. Viðræður og samningar þokuðust hægt. Á vormánuðum 1815 strauk Napoleon úr útlegð frá Elbu og safnaði nýju liði. Komst þá skriður á samninga og lauk ráðstefnunni 9. júní. Aðeins níu dögum síðar, 18. júní, var Napoleon sigraður aftur í stórorrustunni við Waterloo. Fyrir Austurríki hafði ráðstefnan mikil áhrif. Landið missti Niðurlönd og eignir við ofanvert Rínarfljót. Á hinn bóginn fékk Austurríki að halda Galisíu (suðurhluti Póllands). Landið fékk auk þess Illyríu og Salzburg. Austurríki varð eftir sem áður stórveldi í Evrópu. Eitt það síðasta sem Vínarfundurinn gerði var að stofna þýska sambandið úr leifum þýskra furstadæma, hertogadæma og konungsríkja. Austurríki varð leiðandi afl í nýja ríkinu en var þess fyrir utan eigið keisaraveldi. Austurríki var til að mynda utan við tollbandalag nýja ríkisins. Þýska sambandið var leyst í sundur af Bismarck 1866.

Byltingar[breyta]

Samhliða aukinni iðnvæðingu og fjölgun í röðum nýrrar verkamannastétt jukust stjórnmálaleg átök í Austurríki. Þetta var einnig tími þjóðernishyggju. Um miðja 19. öldina voru mótmælin í hámarki en sökum þess að Austurríki var fjölþjóðaríki, náðu mótmælendur ekki að skipuleggja sig eins og víða annars staðar. Á byltingarárinu 1848 kom til víðtækra mótmæla, en þær voru allar barðar niður. Á hinn bóginn sá keisari að friða þurfti lýðinn. Því var Metternich fursti rekinn úr embætti, enda var hann mjög íhaldssamur á gamla kerfið og mikill harðlínumaður.

Þann 22. júlí fundaði fyrsta austurríska þingið í nútíma-formi í Vín. Ekkert þinghús var til staðar og því var fundað í reiðskóla til að byrja með. Meðan íbúar móðurlandsins voru friðaðir í bili, braust út bylting í öðrum hlutum ríkisins. Í Norður-Ítalíu var bylting barin niður af hernum. Í Ungverjalandi var vilji til að losna frá Austurríki og myndaður var mikill her. Austurríski herinn neitaði hins vegar að fara austur og því lýstu Ungverjar sig úr sambandi við keisarann. Yfirmenn hersins voru studdir af íbúum Vínar og gerð var aðför að keisara og stjórninni, sem yfirgáfu borgina og flúðu til borgarinnar Olomouc í Mæri (Tékklandi). Þar afþakkaði Ferdinand I keisari en frændi hans, Jósef Karl, tók við sem nýr keisari. Keisarasinnar söfnuðu liði og hófu gagnbyltingu. 1. nóvember hertóku þeir Vín í miklum bardögum þar sem 2000 manns týndu lífi. 24 leiðtogar byltingarmanna voru teknir af lífi. Þar með var endir bundinn á byltingunni. Aðeins með aðstoð Rússa tókst að vinna Ungverjaland á ný. Eftir þetta tók Jósef Karl keisari sér nánast einræðisvald.

Ítalía og þýska stríðið[breyta]

Árið 1859 hófu Ítalir, undir forystu Garibaldis, að sameina sjálfstæð lönd og greifadæmi á Ítalíuskaga. Þeir sigruðu Austurríki í orrustunni við Solferino og Magenta. Við tapið missti Austurríki nokkur lönd, svo sem Langbarðaland. Ítalía varð svo sjáfstætt konungsríki 1861. Einnig varð mikill órói í þýska sambandinu. Austurríki var ávallt leiðandi afl í því, þar til Bismarck komst til valda í Prússlandi. Þegar Bismarck hertók Slésvík og Holtsetaland, deildi hann yfirráðum þessara héraða með Austurríki. Prússland réði yfir Slésvík en Austurríki yfir Holtsetaland. Þegar Bismarck hertók Holtsetaland 1866 sagði Austurríki Prússlandi stríð á hendur. 3. júlí var barist við Königgrätz í Bæheimi. Við hlið Austurríkis börðust saxar, bæjarar og nokkur önnur þýsk héruð, sem einnig vildu stöðva framgang Prússlands. Prússar sigruðu hins vegar í orrustunni og urðu leiðandi afl í Þýskalandi. Þýska sambandið var lagt niður. Aðeins fimm árum síðar varð Prússland keisaraveldi og hafði þá sameinað mestan hluta Þýskalands. Austurríki var ekki með í því keisaraveldi. Þar með hafði Austurríki misst bæði lönd, völd og virðingu, þrátt fyrir að vera enn eigið keisararíki. Frans I var niðurlægður. Ári síðar stofnaði hann austurríska-ungverska sambandið og var krýndur konungur Ungverjalands 8. júní 1867. Við það varð Ungverjaland ekki lengur hluti af keisararíkinu. Hins vegar tilheyrðu Bæheimur, Mæri, Galisía, vesturhluti Rúmeníu, Slóvenía og Króatía til keisaradæmisins.

Serbíukrísan[breyta]

Morðið á krónprinsinum Frans Ferdinand og eiginkonu hans

1878 hertók Austurríki alla Bosníu og Hersegóvínu, en þau lönd höfðu tilheyrt Tyrkjum. 1908 voru þau innlimuð Austurríki. Meðan Frans Jósef keisari reyndi að meðhöndla þegna sína hvarvetna í ríkinu á grundvelli jafnréttis, leyndi ríkisarfinn, Frans Ferdinand, ekki skoðunum sínum um að slavar og Ungverjar væru annars flokks þegnar. 1914 heimsótti hann og eiginkona hans borgina Sarajevó í Bosníu. Mörgum þjóðernissinnum þar í borg, sem vildu sameina suðurslava í eitt ríki, fannst heimsókn þessi ögrun. Meðan Frans Ferdinand og kona hans voru að keyra í gegnum Sarajevó 28. júní voru þau skotin til bana af Gavrilo Princip, serbneskum þjóðernissinna. Austurríkismenn voru æfir. Stjórnin kenndi ríkisstjórn Serbíu um verknaðinn. 23. júlí setti Austurríki stjórn Serbíu úrslitakosti sem þeir síðarnefndu gátu ekki uppfyllt að öllu leyti. Eftir að keisari Prússlands hafði staðfest stuðning við Austurríki, lýsti Austurríki stríð á hendur Serbum 28. júlí. Þar með hófst heimstyrjöldin fyrri.

Heimstyrjöld[breyta]

Karl I var síðasti keisari Austurríkis

Austurríki reið ekki feitum hesti í hernaði í styrjöldinni. Þeir börðust aðallega í Galisíu (núverandi Póllandi), við landamærin að Ítalíu og á Balkanskaga. Rússar náðu að hrekja Austurríkismenn og Þjóðverja burt úr Galisíu. Á Balkanskaga voru serbar mjög aðgangsharðir og hröktu Austurríkismenn burt. Það var einungis á landamærum að Ítalíu þar sem Austurríkismönnum tókst að halda stöðu sinni. Árið 1916 lést Frans Jósef keisari og við tók Karl I. Hann kallaði saman ríkisráðið, sem tjáði honum hugmyndir þess um framtíð Austurríkis. Ungverjaland og Balkanskagi var ekki hluti af þeim hugmyndum og því var ljóst fyrir stríðslok að Austurríki myndi brátt líða undir lok sem fjölþjóðaríki. Karl hvatti því hinar ýmsu þjóðir ríkisins til að mynda eigin stjórn, sem myndi lúta stjórninni í Vín. Þjóðirnar settu upp sínar eigin stjórnir, en hugðust hins vegar lýsa yfir sjálfstæði. Í stríðslok lágu Þýskaland og Austurríki efnahagslega í rústum. Því tók þjóðarráð Austurríkis til bragðs að mynda nýja stjórn í október 1918 án aðkomu Karls keisara. 11. nóvember leysti Karl því keisara- og konungsríkið Austurríki-Ungverjaland upp og 12. nóvember var lýðveldið Austurríki formlega stofnað. Karl sagði hins vegar ekki af sér sem keisari. Því var honum gefin þau tilmæli að segja af sér eða yfirgefa landið ella. Í mars 1919 yfirgaf Karl landið og í apríl voru gömlu Habsborgarlögin tekin úr gildi. Í uppgjöri stríðsins missti Austurríki öll slavnesku landsvæðin sín. Galisía varð að hluta Póllands. Bæheimur og Mæri varð að vesturhluta Tékkóslóvakíu. Slóvenía, Illyría og Bosnía og Hersegóvína urðu að vesturhluta Júgóslavíu. Suðurhluti Tírol var hertekið af Ítalíu. Ungverjaland varð sjálfstætt ríki. Þar með varð Austurríki minna en núverandi stærð (Burgenland var enn hluti Ungverjalands) og hafði aldrei verið minni í sögu Habsborgarveldisins.

Fyrsta lýðveldið[breyta]

Við stofnun lýðveldisins voru fáir sem trúðu á bjarta framtíð landsins. Margir lærðir menn töldu að móðurlandið væri of lítið til að brauðfæra íbúana. Auk þess var landið efnahagslega í rúst. Upp kom sú hugmynd að Austurríki sameinaðist Weimar-lýðveldinu en bandamenn lögðu blátt bann við öllu slíku. Salzburg sótti formlega um inngöngu í Þýskaland, óháð stjórninni í Vín, en Weimar-lýðveldið hafnaði því. Vorarlberg sótti um inngöngu í Sviss en við atkvæðagreiðslu vildu 80% íbúanna verða að kantónu í Sviss. Bæði Svissarar og bandamenn höfnuðu því hins vegar. Í syðstu sýslum í Kärnten var einnig aðkvæðagreiðsla íbúanna um sameiningu við Slóveníu (og þarmeð Júgóslavíu), en niðurstaðan var sú að vera áfram í Austurríki. 1921 var ákveðið að stofna nýtt ríki í vestasta hluta Ungverjalands. Við atkvæðagreiðslu vildi mikill meirihluti íbúanna hins vegar sameiningu við Austurríki og því varð svo. Svæðið hlaut heitið Burgenland og er fámennasta sambandsland Austurríkis.

Til að rétta af fjárhag landsins var gamla krónan leyst upp 1924 og tekin upp skildingur (Schilling). Hin litla efnahagsuppsveifla varð þó að engu 1929 þegar heimskreppan skall á. Austurríki lifði á lánum. Til að mynda lánaði Þjóðabandalagið landinu 300 milljónir skildinga gegn því að landið sameinaðist ekki Weimar-lýðveldinu næstu 20 árin. 1933 var þriðjungur Austurríkismanna atvinnulaus. 1932 komst kristilegi sósíalistinn Engelbert Dollfuss til valda sem kanslari lýðveldisins. Hann varð fyrir áhrifum af fasískum fyrirmyndum á Ítalíu og varð nánast einvaldur 4. mars er hann leysti upp þingið. 7. mars var ritskoðun og bann við hópamyndun sett á í landinu. 10. maí voru allar kosningar afnumdar og í framhaldið allir stjórnmálaflokkar bannaðir. Í febrúar gerðu íbúar landsins allsherjar uppreisn, þar sem sýnt þótti að Dollfuss kanslari myndi ekki slaka á völdum. Uppreisnin var hins vegar barin niður af mikilli hörku. 1934 var gerð önnur tilraun til byltingar. Í henni varð Dollfuss fyrir skoti og lést af sárum sínum 25. júlí.

Innlimunin[breyta]

Hitler (í fremsta bílnum) lætur hylla sig í Vín 15. mars 1938

Eftirmaður hans, Kurt Schuschnigg, átti við ramman reip að draga. Mikil óánægja var í Austurríki og þurfti Schuschnigg á aðstoð frá Mussolini og síðar frá Þýskalandi Hitlers að halda. Hitler, sem var sjálfur fæddur í Austurríki, vann að því bak við tjöldin að sameina ríkin, þrátt fyrir bann Þjóðabandalagsins. Schuschnigg kanslari reyndi forða slíkar tilraunir og tilkynnti óvænt að leyfa þjóðarakvæðagreiðslu um frjálst og óháð Austurríki. Atkvæðagreiðslan átti að fara fram 13. mars 1938. 11. mars þrýsti Hitler með hótunum á Miklas forseta að leysa Schuschnigg af embætti og kalla nasistann Arthur Seyss-Inquart sem nýjan kanslara. Strax daginn eftir þrammaði þýski herinn inn fyrir landamæri Austurríkis og hertók allar höfuðborgir sambandslandanna. Þann dag tilkynnti Hitler að Þýskaland og Austurríki hefðu sameinast. Stjórnin var leyst upp. Hitler var nýi valdhafinn í Austurríki, sem sótti Vín heim 15. mars til að láta hylla sig. Samtímis þessu var þegar byrjað að ofsækja gyðinga hvarvetna í landinu og flytja burt. Heimstyrjöldin síðari hófst í nóvember 1939. Hundruð þúsundir Austurríkismanna voru settir í þýska herinn og urðu þeir að berjast með nasistum. Fyrstu loftárásir á landið voru gerðar í ágúst 1943, sökum fjarlægðar frá flugvöllum bandamanna. Sovétmenn komust til Vínar og eftir harða bardaga við nasista féll borgin 23. apríl 1945. Þar með lauk landið þátttöku sinni í stríðinu. Aðrir bandamenn hernámu Austurríki ekki fyrr en í maíbyrjun.

Hernám og annað lýðveldið[breyta]

Eftir stríð skiptu bandamenn Austurríki upp í fjögur hernámssvæði, eins og gert var með Þýskaland.

  • Frakkland: Vorarlberg og vesturhluti Tírol
  • Bretland: Austurhluti Tírol, Kärnten og Steiermark
  • Bandaríkin: Salzburg og suðurhluti Efra Austurríkis
  • Sovétríkin: Norðurhluti Efra Austurríkis, Neðra Austurríki og Burgenland
Austurríki skipt upp í fjögur hernámssvæði

Vín var skipt niður í fjögur svæði, rétt eins og Berlín. Miðborgin var undir stjórn allra fjögurra bandamanna. Aldrei kom til greina að sameina Þýskaland og Austurríki, enda bæði bandamenn og Austurríkismenn ákveðið á móti öllu slíku. Hernámið stóð yfir í tíu ár. 15. maí 1955 hlaut Austurríki sjálfstæði sitt á ný og yfirgáfu þá allir erlendir hermenn landið. Austurríki varð að lýðveldi á ný. Á sama ári lýsti landið yfir hlutleysi. Í framhaldi af því varð mikill efnahagsuppgangur í landinu. Það gekk í Sameinuðu þjóðirnar í desember 1955 og í Evrópuráðið 1956. Margir flóttamenn flúðu til Austurríkis frá Ungverjalandi eftir misheppnaða byltingu þar 1956 og frá Tékklandi eftir vorið í Prag 1968. Þegar járntjaldið féll 1990 opnuðust landamæri landsins til Tékklands, Ungverjalands og Slóveníu. Austurríki var því ekki lengur á jaðarsvæði í Evrópu. Meðan stríðið í Júgóslavíu stóð yfir tók Austurríki við fjölda flóttamanna. Austurríki gekk í Evrópusambandið 1995, en áður hafði það verið stofnmeðlimur að EFTA 1960. Þann 1. janúar 2002 tók evran gildi þar í landi.

Landafræði[breyta]

Sambandslönd[breyta]

Austurríki er skipt í níu sambandslönd (Bundesland):

Sambandsland Höfuðstaður Flatarmál (km²) Mannfjöldi
Burgenland Eisenstadt 3.961,80 284.897
Efra Austurríki Linz 11.979,91 1.412.640
Kärnten Klagenfurt 9.538,01 558.271
Neðra Austurríki Sankt Pölten 19.186,26 611.981
Salzburg Salzburg 7.156,03 531.721
Steiermark Graz 16.401,04 1.210.614
Tirol Innsbruck 12.640,17 710.048
Vorarlberg Bregenz 2.601,12 372.001
Vín Vín 414,65 1.712.142

Borgir[breyta]

Vín er langstærsta borg landsins með tæplega 1, 7 milljónir íbúa. Stórborgarsvæðið er með 2,4 milljón íbúa. Það gera rúmlega fjórðungur allra íbúa Austurríkis. Stærstu borgir landsins:

Röð Borg Íbúar Sambandsland
1 Vín 1.687.271 Vín
2 Graz 253.994 Steiermark
3 Linz 189.122 Efra Austurríki
4 Salzburg 147.732 Salzburg
5 Innsbruck 118.035 Tírol
6 Klagenfurt 93.478 Kärnten
7 Villach 58.949 Kärnten
8 Wels 58.542 Efra Austurríki
9 St. Pölten 51.548 Neðra Austurríki
10 Dornbirn 44.867 Vorarlberg
11 Wiener Neustadt 40.564 Neðra Austurríki
12 Steyr 38.402 Efra Austurríki
13 Feldkirch 30.673 Vorarlberg
14 Bregenz 27.309 Vorarlberg

Fjöll[breyta]

Austurríki er mikið fjallaland. Tveir fjallgarðar liggja í landinu. Sá stærri eru Alpafjöll en þau liggja nánast eftir endilöngu landinu frá vestri til austurs og ná nærri því til Vínar. Í þeim eru öll hæstu fjöll landsins. Ölpunum í Austurríki er skipt í marga minni fjallgarða. Minni fjallgarðurinn er Bæheimsskógur og liggur í norðri landsins, við landamærin að Tékklandi. Hæstu fjöll Austurríkis:


Röð Tindur Hæð í m Staðsetning
1 Grossglockner 3.798 Hohe Tauern
2 Wildspitze 3.772 Ötztaler Alpen
3 Kleinglockner 3.770 Hohe Tauern
4 Weisskugel 3.739 Ötztaler Alpen
Grossglockner er hæsti tindur Austurríkis


Ár og fljót[breyta]

Langstærsti hluti Austurríkis tengist vatnasviði Dónár (um 95%). Vestast í Vorarlberg renna nokkrar ár í Rín. Allra nyrst, við tékknesku landamærin renna tvær litlar ár til norðurs og tengjast vatnasviði Saxelfar. Stærstu ár Austurríkis (miðað við lengd innanlands):


Röð Á Lengd innanlands í km Lengd alls í km Rennur í
1 Inn 350 517 Dóná
2 Dóná 321 2.857 Svartahaf
3 Mur 295 453 Drau
4 Enns 254 Dóná
5 Salzach 225 Inn
6 Gurk 157 Drau
7 Traun 153 Dóná
8 Drau 142 749 Dóná
Fjólublátt = Vatnasvið Dónár. Appelsínugult = Vatnasvið Rínar. Grænt = Vatnasvið Saxelfar.


Vötn[breyta]

Mikið er af vötnum í Austurríki. Tvö þeirra mynda landamæri við önnur ríki: Neusiedler See við Ungverjaland, og Bodenvatn við Þýskaland og Sviss. Stærstu stöðuvötn Austurríkis:

Röð Vatn Stærð í km2 Afrennsli
1 Neusiedler See 220 (innanlands) Einser-skurðurinn
2 Bodenvatn 58 (innanlands) Rín
3 Attersee 45,9 Ager
4 Traunsee 24 Traun
5 Wörthersee 19 Glanfurt

Stærsta uppistöðulón Austurríkis heitir Stauraum Altenwörth og er aðeins 11 km2 að stærð. Það er staðsett í Dóná rétt vestan við Vín.

Menning[breyta]

Tónlist[breyta]

Mozart var eitt þekktasta tónskáld Austurríkis

Margir af þekktustu tónskáldum og tónlistarmönnum klassíska tímans komu frá Austurríki. Þeirra helstu eru Wolfgang Amadeus Mozart, Joseph Haydn, Franz Schubert, Anton Bruckner og Franz Liszt, sem var Ungverji sem fæddist í Burgenland. Auk þeirra fluttu ýmsir aðrir til Vínar til að starfa þar, svo sem Ludwig van Beethoven (fæddist í Bonn).

Sérstakur undirflokkur klassískrar tónlistar nefnast Vínarvalsar og eru þeir heimsþekktir. Helstu valsatónskáldin eru Johann Strauss (bæði faðir og sonur) og Josef Lanner. Fjölmörg óperutónskáld eru frá Austurríki. Þeirra helstu eru Karl Millöcker, Nico Dostal, Franz Suppé, Franz Lehár og Ralph Benatzky. Fáar þekktar hljómsveitir nútímatónlistar eru frá Austurríki. Einn helsti dægurlagasöngvari landsins er Udo Jürgens, sem sigraði í Eurovision 1966.

Aðrir listamenn[breyta]

Þekktir austurrískir rithöfundar eru Franz Grillparzer (oft nefndur þjóðskáld Austurríkis), Franz Kafka, Bertha von Suttner (fyrsta konan til að hljóta friðarnóbelinn), Rainer Maria Rilke, Egon Erwin Kisch, Johannes Mario Simmel og Elfriede Jelinek (Nóbelsverðlaun). Þekktir leikarar og leikkonur frá Austurríki eru meðal annars Romy Schneider, Curd Jürgens, Maximilian Schell, Klaus Maria Brandauer og Arnold Schwarzenegger.

Vísindi[breyta]

Þrír Austurríkismenn hafa hlotið Nóbelsverðlaunin í efnafræði, fjórir í eðlisfræði og sex í læknisfræði. Þeirra þekktastir eru kjarneðlisfræðingurinn Wolfgang Pauli og atferlisfræðingurinn Konrad Lorenz. Einn þekktasti sálfræðingur heims var Austurríkismaðurinn Sigmund Freud.

Íþróttir[breyta]

Niki Lauda er þrefaldur heimsmeistari í Formúlu 1

Þjóðaríþrótt Austurríkismanna eru skíðaíþróttir (Alpagreinar). Skíðamenn eins og Toni Sailer, Franz Klammer og Hermann Maier eru margfaldir heimsbikar- og Ólympíumeistarar. Innsbruck er Ólympíuborg, en þar hafa vetrarleikarnir verið haldnir tvisvar (1964 og 1976). Í ruðningi þykir austurríska deildin meðal bestu í heimi. Í handbolta hefur kvennaliðið Hypo Niederösterreich átta sinnum unnið Evrópudeildina. Í Formúlu 1 hafa þrír Austurríkismenn getið sér gott orð: Niki Lauda (þrefaldur heimsmeistari), Jochen Rindt og Gerhard Berger.

Helgidagar[breyta]

Auk neðangreindra helgidaga eru til nokkrir í viðbót sem eingöngu gilda í einu eða tveimur sambandslöndum.

Dags. Helgidagur Ath.
1. janúar Nýársdagur
6. janúar Vitringarnir þrír
19. mars Dagur heilags Jósefs Aðeins í fjórum sambandslöndum
Breytilegt Föstudagurinn langi Ekki fyrir kaþólsku kirkjuna
Breytilegt Páskar Tveir dagar
1. maí Verkalýðsdagurinn
Breytilegt Uppstigningardagur
Breytilegt Hvítasunna Tveir dagar
Breytilegt Fronleichnam
15. ágúst Himnaför Maríu
26. október Þjóðhátíðardagur
1. nóvember Allraheilagramessa
8. desember Getnaður Maríu
24. desember Aðfangadagur
25. desember Jóladagur
26. desember Dagur heilags Stefáns
31. desember Gamlársdagur

Heimildir[breyta]

Tenglar[breyta]

Wikimedia Commons er með margmiðlunarefni sem tengist


Einkennismerki Wikiorðabókar
Wikiorðabókin er með skilgreiningu á orðinu