Spaugstofan

Úr Wikipediu, frjálsa alfræðiritinu
Jump to navigation Jump to search
Spaugstofumenn í söngatriði þáttarins

Spaugstofan er grín-sjónvarpsþáttur sem hefur verið í gangi í Sjónvarpinu og síðan Stöð 2 með hléum síðan 21. janúar 1989 þegar hún hóf göngu sína undir nafninu 89 á stöðinni, árið eftir hét hún 90 á stöðinni og svo 91 á stöðinni og 92 á stöðinni. Þessir þættir gerðust á mestu leiti í fréttastofu lítillrar fréttastofu Stöðinn. 1992 fóru þeir í hlé og nokkrir af þeim fóru í Imbakassann. Þeir mættu aftur 1996 með heitið Enn ein stöðin sem gekk til 1999 og þá tóku þeir sig í hlé í þrjú ár. Þeir mættu svo aftur 2002 með nafnið Spaugstofan, þá gerðist þetta ekki á fréttastofu stöðvarinnar heldur bara þeir sjálfir að túlka fréttir líðandi stundar. Þanning gekk þetta til 2010, þá voru þeir fluttir á Stöð 2. Þátturinn var á Stöð 2 í fjögur ár, eða til 2014. Þátturinn hætti þá en þeir fóru á svið með aðra sýningu 2015 "Yfir til Þín". 23. janúar 2016 fóru þeir á RÚV með allra síðasta þáttinn sem ber heitið Andspyrnuhreyfingin. Þátturinn er á dagskrá á laugardagskvöldum og gengur yfirleitt út á það að sýna atburði liðinnar viku í spaugilegu ljósi. Spaugstofuna skipa í dag þeir Örn Árnason, Karl Ágúst Úlfsson, Pálmi Gestsson og Sigurður Sigurjónsson. Randver Þorláksson var í Spaugstofunni í tæpa tvo áratugi, eða allt til ársins 2007.[1] Þessi hópur kallast Spaugstofumenn þegar fjallað er um þá í fjölmiðlum. Þessi skipan hefur verið óbreytt megnið af þeim tíma er Spaugstofan hefur starfað, ef frá er skilið brotthvarf Randvers árið 2007. Þeir í Spaugstofunni gera mikið grín að stjórnmálum og frægum mönnum á Íslandi. Þátturinn var lengst af í Ríkissjónvarpinu á laugardögum en flutti sig yfir á Stöð 2 árið 2010.

Í upphafi árið 1987 voru framleiddir fjórir þættir undir heitinu Spaugstofan en þá var Laddi einnig með þeim félögum en hann fór svo yfir í Gríniðjuna. Pálmi var ekki með Spaugstofunni þá en gekk til liðs við hana 1989.

Persónur og atriði í þáttunum[breyta | breyta frumkóða]

Spaugstofumenn leika í þáttunum stjórnmálamenn og annað fólk sem er áberandi í fjölmiðlum. Þeir leika einnig persónur sem þeir hafa sjálfir þróað.

Ragnar Reykás[breyta | breyta frumkóða]

Lágvaxni alþýðumaðurinn Ragnar Reykás er leikinn af Sigurði Sigurjónssyni. Hann kemur venjulega fram í viðtölum utandyra við fréttamanninn Erlend (leikinn af Erni Árnasyni) og gefur álit "mannsins á götunni" á málefnum líðandi stundar. Einkennandi fyrir þessi viðtöl er að Ragnar gefur sig út fyrir að hafa ígrundaðar skoðanir á málunum og talar af sterkri sannfæringu en á meðan á viðtalinu stendur gerist eitthvað sem leiðir til þess að Ragnar sér nýja hlið á málinu og skiptir algjörlega um skoðun. Þegar Tor Bomann-Larsen kynnti tilgátur sínar um að Ólafur fimmti, konungur Noregs, hefði verið rangfeðraður, kom í ljós að Ragnar Reykás væri réttborinn konungur Noregs.

Kristján Ólafsson[breyta | breyta frumkóða]

Kristján Ólafsson, einnig leikinn af Sigurði Sigurjónssyni, sér um fræðsluþætti fyrir neytendur og reynir að gefa neytendum góð ráð varðandi ýmsar vörur. Hann kynnir sig með því að segja "Kristján heiti ég, Ólafsson". Kristján hefur nokkra kæki og virðist því vera taugaóstyrkur yfir því að tala fyrir framan sjónvarpsmyndavélarnar. Hann verður sérstaklega vandræðalegur þegar hann talar um kynlíf og því tengda hluti, en það gerir hann oft. Hann nefnir gjarnan ensk orð yfir hluti og hugtök sem hann talar um, áhorfendum til upplýsingar. Í einum þætti dró hann stóran smokk yfir líkama sinn og tróð sér inn í stórt líkan af kynfærum konu. Þetta atriði varð til þess að forsvarsmenn þáttarins voru kærðir fyrir að brjóta gegn almennu velsæmi.

Bogi og Örvar[breyta | breyta frumkóða]

Útigangsmennirnir Bogi og Örvar, venjulega titlaðir "rónar", eru leiknir ef Erni Árnasyni og Randver Þorlákssyni. Þeir halda til á bekk við styttuna af Ingólfi Arnarsyni á Arnarhóli. Þeir taka yfirleitt ekki virkan þátt í íslenska þjóðfélaginu heldur láta sér oftast nægja að velta því fyrir sér hvaða afleiðingar ýmsar aðgerðir og breytingar munu hafa fyrir þá. Þegar þeir komast að niðurstöðu syngja þeir ýmist "Nú erum við í góðum málum, lallarallala," eða "Nú erum við í vondum málum, lallarallala," eftir því hver niðurstaðan er. Sum atriði með Boga og Örvari ganga út á tilfallandi orðaleiki og enn önnur draga á skoplegan hátt fram muninn á lífi útigangsmannsins og lífi hins vinnandi manns, t.d. þegar annar þeirra vinnur 50% starf hjá fyrirtæki og er svo "róni hálfan daginn" og þegar annar þeirra hefur með sér nema, ungan mann sem er að "læra til róna".

Hjónin Boris og Svetlana[breyta | breyta frumkóða]

Hjónin Boris Beljakov og Svetlana Rassarova eru skautadansarar frá fyrrum Sovétríkjunum. Til að byrja með komu þau aðallega fram í sjónrænum grínatriðum en þau komu fram í viðtali þegar "nýbúar" komust í fjölmiðlaumræðuna.

Sniðugt á Íslandi[breyta | breyta frumkóða]

Sniðugt á Íslandi eru atriði sem sýna nokkra austur-evrópska menn sem sækja námskeið í íslensku fyrir nýbúa. Ýmis fyrirbæri í íslenska þjóðfélaginu eru útskýrð fyrir nýbúunum, sem jafnan komast að þeirri niðurstöðu að það sé "sniðugt á Íslandi".

Samsæriskenninga-maðurinn[breyta | breyta frumkóða]

Ónefndur maður, leikinn af Erni Árnasyni, kynnir ýmsar samsæriskenningar fyrir áhorfandanum. Stundum horfir áhorfandinn á hann gegnum öryggismyndavélar hér og þar. Þessi maður horfir alltaf í myndavélina og talar beint til áhorfandans. Hann hefur innréttað leynilega njóstastöð innan í styttu fyrir framan Stjórnarráðið í Reykjavík og þaðan njósnar hann um ríkisstjórn Íslands. Hann grunar Norðmenn um samsæri til að ná völdum á Íslandi. Þegar honum sýnist fólk vera að fylgjast með honum hrópar hann "Heia Norge!" í uppgerðarhollustu við Noreg.

Tengt efni[breyta | breyta frumkóða]

Neðanmálsgreinar[breyta | breyta frumkóða]

Tengill[breyta | breyta frumkóða]

  Þessi sjónvarpsgrein er stubbur. Þú getur hjálpað til með því að bæta við greinina.