Norræna húsið

Séð vestur yfir Reykjavík úr turni Hallgímskirkju, Norræna húsið fyrir miðri mynd

Norræna húsið er stofnun hýst í samnefndu húsi í Vatnsmýrinni í Reykjavík, sem á að stuðla að samvinnu og efla tengsl Íslands og hinna Norðurlandanna.

Byggingin var hönnuð af finnska arkitektinum Alvar Aalto, fullbyggð 1968 og opnuð almenningi þann 24. ágúst sama ár. Þar má finna bókasafn, veitingastaðinn Sónó Matseljur og sali, sem leigðir eru til sýninga-, ráðstefnu- og fundahalda — auk ýmissa annara viðburða allan ársins hring. Húsið er opið alla daga vikunnar nema mánudaga og almennt enginn aðgangseyrir að neinum viðburðum sem Norræna húsið sjálft stendur fyrir. Rekstur hússins er greiddur sameiginlega af Norrænu ráðherranefndinni.

Norræna húsið er bæði bakhjarl og þátttakandi í helstu menningarviðburðum í Reykjavík og skipuleggur margvíslega menningarviðburði og sýningar.

Bókasafn Norræna hússins er stærst sinnar tegundar á Norðurlöndum. Þar er að finna bækur og blöð á sjö norrænum málum: dönsku, finnsku, færeysku, grænlensku, norsku, samísku og sænsku. Þar er einnig hægt að fá lánaðar hljóðbækur og DVD-myndir. Í safninu er einnig Artótek með grafíkmyndum eftir norræna listamenn, sem hægt er að fá að láni. Barnabókasafnið er á neðri hæð bókasafnsins og eru þar haldnar sýningar, sögustundir og margvíslegar fjölskyldusmiðjur allt árið.

Á fyrstu árum Norræna hússins voru kennslustundir í húsinu hjá nemendum við Háskóla Íslands sem lærðu norræn tungumál.

Forstjóri Norræna hússins síðan 2. janúar 2019 er Sabina Westeholm.

Í kjölfar Alþingiskosninga vorið 2009 fóru viðræður um myndun ríkisstjórnar Samfylkingar og Vinstrihreyfingarinnar - græns framboðs fram í Norræna húsinu.

Tengt efni

• Norðurlandahúsið í Færeyjum.
• Norræna ráðherranefndin
• Norræna stofnunin í Finnlandi
• Barna- og unglingabókmenntaverðlaun Norðurlandaráðs

Tengill

• Heimasíða Norræna hússins Geymt 15 desember 2007 í Wayback Machine
• Heimasíða AALTO Bistro Geymt 14 apríl 2016 í Wayback Machine