Norræna húsið

Úr Wikipediu, frjálsa alfræðiritinu
Stökkva á: flakk, leita
Séð vestur yfir Reykjavík úr turni Hallgímskirkju, Norræna húsið fyrir miðri mynd

Norræna húsið er stofnun hýst í samnefndu húsi í Vatnsmýrinni í Reykjavík, sem á að stuðla að samvinnu og efla tengsl Íslands og hinna Norðurlandanna.

Byggingin var hönnuð af finnska arkitektinum Alvar Aalto, fullbyggð 1968 og opnuð almenningi þann 24. ágúst sama ár. Þar má finna bókasafn, veitingastaðinn AALTO Bistro og sali, sem leigðir eru til sýninga-, ráðstefnu- og fundahalda — auk ýmissa annara viðburða allan ársins hring. Húsið er opið alla daga vikunnar og almennt enginn aðgangseyrir að neinum viðburðum sem Norræna húsið sjálft stendur fyrir. Rekstur hússins er greiddur sameiginlega af Norrænu ráðherranefndinni.

Norræna húsið er bæði bakhjarl og þátttakandi í helstu menningarviðburðum Íslands svo sem Kvikmyndahátíðinni í Reykjavík, Bókmenntahátíð Reykjavíkur, Iceland Airwaves, Listahátíð Reykjavíkur og Norræna tískutvíæringnum en Norræna húsið átti frumkvæðið að þeim viðburði. Fram að þessu hefur Norræna húsið einnig skipulagt og haft frumkvæði af margvíslegum menningarviðburðum og sýningum.

Bókasafn Norræna hússins er stærst sinnar tegundar á Norðurlöndum. Þar er að finna bækur og blöð á sjö norrænum málum: dönsku, finnsku, færeysku, grænlensku, norsku, samísku og sænsku. Þar er einnig hægt að fá lánaðar hljóðbækur og DVD-myndir og hlaða niður rafbókum í gegnum heimasíðu safnsins. Í safninu er einnig Artótek með grafíkmyndum eftir norræna listamenn, sem hægt er að fá að láni. Barnahellir í bókasafninu er sérsniðinn að þörfum yngri kynslóðarinnar og fjölskyldum þeirra.

Á fyrstu árum Norræna hússins voru kennslustundir í húsinu hjá nemendum við Háskóla Íslands sem lærðu norræn tungumál.

Forstjóri Norræna hússins síðan 1. janúar 2015 er Mikkel Harder fæddur 1967 í Danmörku.

Í kjölfar Alþingiskosninga vorið 2009 fóru viðræður um myndun ríkisstjórnar Samfylkingar og Vinstrihreyfingarinnar - græns framboðs fram í Norræna húsinu.[1]

Tengt efni[breyta | breyta frumkóða]

Tengill[breyta | breyta frumkóða]

Tilvísanir[breyta | breyta frumkóða]