Neskirkja
| Neskirkja | ||
 | ||
| Reykjavík (maí 2025) Eysteinn Guðni Guðnason | ||
| Almennt | ||
| Prestakall: | Nesprestakall | |
|---|---|---|
| Arkitektúr | ||
| Arkitekt: | Ágúst Pálsson | |
| Efni: | Steinsteypa | |
Neskirkja er í Nesprestakalli, Reykjavíkurprófastsdæmi vestra. Kirkjan var vígð á pálmasunnudag þann 14. apríl 1957. Sr. Ásmundur Guðmundsson (1888-1969), biskup, vígði kirkjuna. Neskirkja er í Nessókn og sækir nafn sitt til landnámsbýlisins Nes við Seltjörn þar sem talið er að kirkja hafi staðið frá því á 11. öld. Síðasta kirkjan sem stóð á Nesi var aflögð með konungsúrskurði 1797 þegar sóknin var sett undir Reykjavíkursókn, en þá sóttu allir íbúar Reykjavíkursóknar nýstofnaða Dómkirkju í Reykjavík.. Nessókn var stofnuðu þann 21. október árið1940 þegar Reykjavíkursókn var skipt upp í Dómsókn, Nessókn, Hallgrímssókn og Laugarnessókn. Neskirkja var sóknarkirkja Seltirninga frá á níunda áratuginn, en þá var Seltjarnarneskirkja reist.
Fjórum árum eftir stofnun sóknarinnar var efnt til samkeppni og teikningu kirkjunnar og hlaut arkitektinn Ágúst Pálsson (1893-1967), fyrstu verðlaun. Kirkjan er oft talin vera fyrsta nútímakirkjan hér á landi enda var strax gert ráð fyrir fjölbreytilegu safnaðarstarfi í henni og kjallara hennar. Hönnun Ágústar þótti afskaplega nýstárleg og olli talsverðum deilum og um tíma leit út fyrir að ekki yrði að byggingu hennar. Blessunarlega fór svo að kirkjan var reist og markaði bygging hennar tímamótum í íslenskri byggingarsögu. Kirkjan er ósamhvef, asymmetrísk og er aðalinngangur hennar frá norðri en ekki vestri eins og í flestum kirkjum á Íslandi. Í forkirkju er steindur gluggi eftir Gerði Helgadóttur (1928-1975) og er hann gjöf Kvenfélags Neskirkju til að minnast 25 ára afmælis safnaðarins. Þar er einnig útskorið Kristslíkneski eftir Ágúst Sigurmundsson (1904-1965). Skírnarfontur er gjöf frá Þór Sigmundssyni, steinsmiði sem var vígður 2009. Ytra byrði Neskirkju er friðað. Upphaflega var þýskt 21. radda orgel í kirkjunni, en árið 1999 var sett upp nýtt 31. radda orgel í kirkjuna frá orgelsmiðnum Fritz Noack. Organisti Neskirkju er Steingrímur Þórhallsson.
Fyrsti prestur kirkjunnar var Jón Thorarensen og þjónaði hann söfnuðinum frá 1940 til 1972. Frank M. Halldórsson var kosinn árið 1963 sem sóknarprestur þegar sóknin var gerð að tvímenningsprestakalli og þjónaði hann til 2004. Árið 1972 tók Jóhann S. Hlíðar við embætti af sr. Jóni og þjónaði hann til ársins 1975. Guðmundur Óskar Ólafsson þjónaði við kirkjuna frá árinu 1975 til 1994. Halldór Reynisson kom til starfa árið 1994 og þjónaði með hléum til ársins 2001. Örn Bárður Jónsson hóf störf í söfnuðinum árið 1998, hann var valinn prestur 2001 og sóknarprestur árið 2004 og þjónaði til ársins 2016. Árið 2004 var Sigurður Árni Þórðarson valinn og þjónaði til ársloka 2014. Skúli Sigurður Ólafsson kom til starfa árið 2014 sem prestur og var valinn sóknarprestur í febrúarbyrjun 2016. Steinunn Arnþrúður Björnsdóttir var valinn prestur árið 2016 og þjónaði til ársins 2025. Jón Ómar Gunnarsson var valinn prestur í apríl 2025 og hóf störf við Nesprestakall þann 1. júlí 2025.
Tenglar