Alþingiskosningar 1933

Alþingiskosningar 1933 voru kosningar til Alþingis sem voru haldnar 16. júlí 1933. Efnt var til kosninga í samræmi við reglur um breytingar á stjórnarskrá, en Alþingi hafði samþykkt nýja kjördæmaskipan sem átti að tryggja þingmannafjölda í samræmi við fylgi á landsvísu. Kosið var í síðasta sinn eftir gömlu reglunum og áætlað að ganga sem fyrst aftur að kjörborðinu og kjósa eftir nýja kerfinu. Kosningaréttur var miðaður við 25 ár og þiggjendur sveitastyrks gátu ekki kosið. Fjöldi á kjörskrá var 53.327 eða tæp 47% íbúa landsins. Kosningaþátttaka var 70,1%.

Þetta voru aðrar alþingiskosningarnar sem Sjálfstæðisflokkurinn bauð fram í eftir að hann var myndaður með samruna Frjálslynda flokksins og Íhaldsflokksins í maí árið 1929. Kosningasigur flokksins var sá mesti í sögu hans en hann hlaut tæpan helming atkvæða.

Eftir kosningarnar sat „samstjórn lýðræðissinna“ áfram við völd, en það var samsteypustjórn Framsóknarflokks og Sjálfstæðisflokks. Framsóknarmenn höfðu þrjá ráðherra en Sjálfstæðismenn einn.

Niðurstöður

Niðurstöður kosninganna voru þessar:

Flokkur		Formaður	Atkvæði	%	+/-	Þingmenn	+/-	% þingm.
Alþýðuflokkurinn		Jón Baldvinsson	6.864,5	19,2	+3,5	4 (1)		11,1
Framsókn		Ásgeir Ásgeirsson	8.530,5	23,9	-11,1	14 (2)	-9	38,9
Sjálfstæðisflokkurinn		Jón Þorláksson	17.131,5	48,0	+4,7	17 (3)	+2	47,2
Kommúnistaflokkurinn		Brynjólfur Bjarnason	2.673,5	7,5	+4,5	0
Aðrir og utan flokka			480	1,4		1	+1	2,8
Alls			35.680	100		36 (6)	-6

Fjöldi landskjörinna þingmanna í sviga.

Tengt efni

Kosningasaga

Fyrir: Alþingiskosningar 1931

Alþingiskosningar

Eftir: Alþingiskosningar 1934