Efnahags- og viðskiptaráðuneyti Íslands

Efnahags- og viðskiptaráðuneytið
Stofnár	2009
Lagt niður	2012
Arftaki	Fjármála- og efnahagsráðuneyti Íslands Atvinnuvega- og nýsköpunarráðuneyti Íslands
Ráðherra	Gylfi Magnússon (2009-2010) Árni Páll Árnason (2010-2011) Steingrímur J. Sigfússon (2012)
Ráðuneytisstjóri	Jónína S. Lárusdóttir
Fjárveiting	3,3 milljarðar króna (2011)
Staðsetning	Sölvhólsgata 7 150 Reykjavík
Vefsíða

Efnahags- og viðskiptaráðuneyti Íslands eða Efnahags- og viðskiptaráðuneytið var eitt af ráðuneytum Stjórnarráðs Íslands frá árinu 2009 til 2012. Æðsti yfirmaður var Efnahags- og viðskiptaráðherra og æðsti embættismaður þess var ráðuneytisstjóri.

Saga

Efnahags- og viðskiptaráðuneytið var formlega stofnað 1. október 2009 en Gylfi Magnússon hafði starfað sem Efnahags- og viðskiptaráðherra frá 1. febrúar sama ár. Sameiningu viðskipta- og efnahagsmála kom í kjölfar efnahagshrunsins á Íslandi 2008 þar sem erlendir sérfræðingar á borð við Kaarlo Jännäri ráðlögðu stjórnvöldum að stofna sér ráðuneyti um þessa tvo málaflokka til að vinna úrbætur á íslensku fjármálaeftirliti.

Áður hafði viðskiptaráðuneyti starfað frá 1939 en efnahagsmálum hafði verið dreift á ýmis ráðuneyti. Ein af afleiðingum sameiningar var sú að Fjármálaeftirlitið og Seðlabanki Íslands heyrðu fyrst undir sama ráðuneytið sem átti að gera ráðamönnum kleift á að hafa betri yfirsýn yfir efnahagslífið í stað þess að það væri klofið milli mismunandi aðila. Á meðan að ráðuneytið starfaði sá það um endurskoðun regulverks og aðhalds með fjármálastarfsemi, losun gjaldeyrishafta og Icesave-deiluna. Einnig sá ráðuneytið um efnahagsáætlun Íslands og Alþjóðagjaldeyrissjóðsins þar til hún lauk 26. ágúst 2011.

Störf

Samkvæmt reglugerð um Stjórnarráð Íslands fór ráðuneytið með þau mál er varða:

• Verslun og viðskipti með vöru og þjónustu, aðra en útflutningsverslun.
• Fjármálamarkað. Vátryggingar og vátryggingastarfsemi.
• Vexti og verðtryggingu.
• Fjárfestingar erlendra aðila. Gjaldeyri.
• Samkeppnismál og óréttmæta viðskiptahætti.
• Hlutafélög, einkahlutafélög, samvinnufélög og önnur félög og sjálfseignarstofnanir, sem stunda atvinnurekstur, þó ekki skráningu þeirra. Firmu.
• Endurreisnar- og þróunarbanka Evrópu (EBRD).

• Fasteignakaup og sölu fasteigna, fyrirtækja og skipa.
• Hugverkaréttindi á sviði iðnaðar, m.a. einkaleyfi, vörumerki og hönnun.
• Seðlabanka Íslands og Alþjóðagjaldeyrissjóðinn (IMF).
• Hagstjórn almennt.
• Mat á þróun og horfum í efnahagsmálum.
• Hagstofu Íslands.
• Endurskoðendur og framkvæmd bókhalds- og ársreikningalaga.

Sjá einnig

• Efnahags- og viðskiptaráðherra Íslands

Tenglar

• Heimasíða Efnahags- og viðskiptaráðuneytis Íslands Geymt 1 febrúar 2010 í Wayback Machine