Minsk

Minsk

Мінск (hvítrússneska)

Минск (rússneska)
Minsk Мінск (hvítrússneska); Минск (rússneska);
Höfuðborg
	Sigurtorgið í Minsk
	Fáni Skjaldarmerki
	Minsk Staðsetning í Hvíta-Rússlandi
	Hnit: 53°54′8.086″N 27°33′42.613″A / 53.90224611°N 27.56183694°A
Land	Hvíta-Rússland
Flatarmál
• Samtals	409,53 km2
Hæð yfir sjávarmáli	280,6 m
Mannfjöldi (2025)
• Samtals	1.996.730
• Þéttleiki	4.900/km2
Tímabelti	UTC+03:00 (MSK)
Póstnúmer	220001-220141
Svæðisnúmer	+375 17
ISO 3166 kóði	BY-HM
Vefsíða	minsk.gov.by

Minsk (hvítrússneska: Менск /mʲensk/, Мінск /mʲinsk/; rússneska: Минск /mʲinsk/) er höfuðborg Hvíta-Rússlands. Íbúafjöldi er áætlaður um 1.996.730 (2025).^[1] Minsk hýsir meðal annars höfuðstöðvar Samveldis sjálfstæðra ríkja sem er samstarfsvettvangur fyrrum Sovétlýðvelda.

Minsk var stofnuð af Austur-Slövum á 9. öld og var síðan hluti af Polatsk-furstadæminu undir lok 10. aldar. Árið 1129 var furstadæmið innlimað af Garðaríki en 1146 varð það aftur sjálfstætt. 1242 varð borgin hluti af Stórfurstadæminu Litáen og síðan Pólsk-litáíska samveldinu. Borgin var lögð í rúst í nokkrum meiriháttar styrjöldum á 17. og 18. öld (Pólsk-rússneska stríðið, Norðurlandaófriðurinn mikli) og var að lokum innlimuð af Rússum 1793. Borgin óx hratt á 19. öld og járnbrautin milli Moskvu og Varsjár var lögð um hana 1846. Fyrir Síðari heimsstyrjöldina var íbúafjöldinn kominn í um 300 þúsund. Þjóðverjar náðu borginni á sitt vald skömmu eftir innrásina í Sovétríkin sumarið 1941 og hernámsliðið notaði borgina sem höfuðstöðvar. 1944 náðu Sovétmenn síðan borginni aftur eftir mikla bardaga þar sem meirihluti hennar var lagður í rúst og íbúafjöldinn um 50 þúsund. Eftir stríðið var borgin endurreist með byggingum í sovéskum stíl. 1972 náði íbúafjöldinn einni milljón. 1990 varð borgin höfuðborg hins nýstofnaða Hvíta-Rússlands.