Grímsey (Steingrímsfirði)
Grímsey á Steingrímsfirði er stærsta eyjan úti fyrir Ströndum. Hún er 773 hektarar að stærð. Í Grímsey var fyrrum býli og fram á 20. öld höfðu menn vetursetu á eyjunni og verbúðir. Í upphafi 20. aldar voru refir aldir í eyjunni og síðan veiddir þegar mest fékkst fyrir skinnin. Í eyjunni var reistur viti 1915 og síðan endurbyggður 1949, en hann varð fyrir smávægilegum skemmdum eftir að þýsk herflugvél hafði skotið að honum í síðari heimsstyrjöld.[1] Ljóseinkenni hans er Fl WRG 10s (blikkljós í hvítum rauðum og grænum geira á 10 sekúndna fresti).[2]
Í Grímsey er mikil lundabyggð. Áætlað er að þar séu 23 þúsund pör af lundum eða 1% íslenska lundastofnsins.[3] Frá Drangsnesi eru áætlunarferðir út í Grímsey yfir sumartímann. Það er rétt um 10 mínútna sigling.[4]
Í Landnámabók er Grímsey sögð hafa fengið nafn af Grími Ingjaldssyni Hróaldssonar úr Haddingjadal, sem þar hafði vetursetu og drukknaði í róðri um veturinn.[5]
Vélbáturinn Hrefna II frá Hólmavík fann við eyna leðurskjaldböku 1963 og er það eina dæmið um að skjaldbaka hafi fundist náttúrlega við Ísland.[6]
Tilvísanir
[breyta | breyta frumkóða]- ↑ Aðalskipulag Kaldrananeshrepps 2010-2030 (Report). bls. 36.
- ↑ Vitaskrá (PDF). Landhelgisgæsla Íslands. 2025. bls. 22.
- ↑ „Grímsey á Steingrímsfirði“. Náttúrufræðistofnun. Sótt 24.1.2026.
- ↑ „Siglingar út í Grímsey“. drangsnes.is. Sótt 24.1.2026.
- ↑ „26. kafli“. Landnámabók.
- ↑ Jón Már Halldórsson (5.5.2020). „Hvaða tegund af skjaldböku fann Einar Hansen á Hólmavík árið 1963?“. Vísindavefurinn.
Þessi Íslandsgrein sem tengist landafræði er stubbur. Þú getur hjálpað til með því að bæta við greinina.