Stoðir

Úr Wikipediu, frjálsa alfræðiritinu
(Endurbeint frá FL Group)
Jump to navigation Jump to search
Stoðir
Stodir-logo.png
Rekstrarform Almenningshlutafélag
Slagorð Óþekkt
Hjáheiti Óþekkt
Stofnað 10. mars 2005
Stofnandi Óþekkt
Örlög Óþekkt
Staðsetning Reykjavík
Lykilmenn Skarphéðinn Berg Steinarsson, stjórnarformaður
Þorsteinn M. Jónsson,
varaformaður stjórnar
Jón Sigurðsson, fyrrverandi forstjóri
Hannes Smárason, fyrrverandi forstjóri
Starfsemi fjárfestingarfélag
Heildareignir Óþekkt
Tekjur Óþekkt
Hagnaður f. skatta Óþekkt
Hagnaður e. skatta Óþekkt
Eiginfjárhlutfall Óþekkt
Móðurfyrirtæki Óþekkt
Dótturfyrirtæki Óþekkt
Starfsmenn Óþekkt
Vefsíða http://www.stodir.is/

Stoðir ehf. (áður FL Group og enn fyrr Flugleiðir) er fjárfestingarfyrirtæki með sérstaka áherslu á fjárfestingar í flugrekstri og ferðaþjónustu og var um tíma stærst á því sviði á Íslandi. Fyrir 10. mars 2005 hét fyrirtækið Flugleiðir og snerist rekstur þess félags lengst af að mestu um flugsamgöngur. Flugleiðir urðu til árið 1973 við sameiningu flugfélaganna Flugfélags Íslands og Loftleiða. Eftir að nafni fyrirtækisins var breytt í FL Group fór rekstur þess smám saman að snúast meira um fjárfestingar og að lokum dró félagið sig að mestu út úr flugrekstri. Nafni félagsins var aftur breytt árið 2008 og heitir það nú Stoðir eignarhaldsfélag. Félagið fór fram á greiðslustöðvun þann 29. september 2008 eftir að Ríkissjóður Íslands keypti 75% hlut í viðskiptabankanum Glitni sem Stoðir áttu um þriðjungshlut í.

Saga[breyta | breyta frumkóða]

FL Group varð til þann 10. mars árið 2005 þegar Flugleiðum var breytt í FL Group eftir skipulagsbreytingar. Ragnhildur Geirsdóttir tók við sem forstjóri félagsins í maí 2005.[1] Ragnhildur yfirgaf þó félagið í október 2005 og þá tók Hannes Smárason, þáverandi stjórnarformaður, við forstjórastólnum. Á sama tíma var skipulagi fyrirtækisins breytt þannig að fjárfestingastarfsemi varð aðalverkefni þess og stofnuð voru tvö dótturfélög; Icelandair Group, sem tók við alþjóðlegum flugrekstri FL Group, og FL Travel Group, sem tók við innlendri ferðaþjónustu.[2]

Aðskilnaður FL Group frá Icelandair Group varð staðreynd 16. október 2006 þegar FL Group seldi allt hlutafé sitt í félaginu.[3] Á sama tíma var FL Travel Group lagt niður og eignir þess ýmist seldar eða sameinaðar Icelandair Group.[4] Með þessu sagði FL Group í raun skilið við þá arfleifð sem það hafði fengið frá Flugleiðum.

Í desember 2007 lét Hannes Smárason af störfum sem forstjóri félagsins og við tók Jón Sigurðsson þáverandi aðstoðarforstjóri í kjölfar skipulagsbreytinga á félaginu. Þá var það gert kunnugt að FL Group hyggðist auka hlutafé sitt um 64 milljarða, í 180 milljarða króna.[5][6][7]

Í febrúar árið 2008 greindu stjórnendur FL Group frá því að tap fyrirtækisins á árinu 2007 hafi numið 67,3 milljörðum króna, þar af 63,2 milljörðum króna á fjórða ársfjórðungi. Þetta er mesta tap íslensks fyrirtækis á einu ári en stjórnendur fyrirtækisins ráku tapið að mestu til óróa á erlendum fjármálamörkuðum á síðari hluta ársins.[8]

Í júlí 2008 var FL Group breytt í Stoðir eignarhaldsfélag. Á sama tíma keyptu Stoðir 25 milljarða króna hlut í Baugi Group.[9] Þessar breytingar voru tilraun eigenda félagsins til að endurskipuleggja rekstur þess, en á fyrsta ársfjórðungi ársins 2008 tapaði FL Group 47,8 milljörðum króna[10] og á öðrum ársfjórðungi 11,6 milljörðum,[11] samtals tæplega 60 milljörðum á fyrri helmingi ársins 2008.

Þann 29. september 2008 var tilkynnt að Stoðir hf. hefði óskað eftir greiðslustöðvun við Héraðsdóm Reykjavíkur[12].

Fjárfestingar[breyta | breyta frumkóða]

Sterling Airlines[breyta | breyta frumkóða]

Flugvél í eigu Sterling Airlines.

FL Group gekk frá kaupum á danska lággjaldaflugfélaginu Sterling Airlines af Fons, eignarhaldsfélagi sem er að hluta í eigu Pálma Haraldssonar, þann 23. október 2005. Kaupverðið var 14,6 milljarðar króna en Fons hafði keypt Sterling í mars 2005 fyrir tæpa fjóra milljarða. FL Group tók við rekstri Sterling í byrjun árs 2006.[13][14][15] Stjórnendur Icelandair voru mótfallnir kaupum FL Group á Sterling því þeir töldu rekstur þess of áhættusaman. Einnig voru stjórnendur Icelandair eindreigið mótfallnir sameiningu Icelandair og Sterling sem upphaflega var markmið FL Group, en frá því var falllið.[16] Þegar FL Group tók við rekstrinum gerðu stjórnendur fyrirtækisins ráð fyrir því að hagnaður Sterling yrði 345 milljónir danskra króna á árinu 2006 en þegar upp var staðið var 200 milljóna danskra króna tap á rekstrinum.[17]

Þann 27. desember 2006 seldi FL Group allt hlutafé sitt í Sterling, fyrir 20 milljarða króna. Kaupandi var hið nýstofnaða fyrirtæki Northern Travel Holding en FL Group á 34% hlut í Northern Travel Holding. Fyrirtækið Fons á 44% hlut í Northern Travel Holding og Sund á 22%.[18]

AMR Corporation[breyta | breyta frumkóða]

FL Group fjárfesti, í desember 2006, í 5,98% hlutabréfa í bandaríska fyrirtækinu AMR Corporation, móðurfélagi flugfélagsins American Airlines. Kaupverð var yfir 400 milljónir dala eða um 29 milljarðar íslenskra króna.[19] Í febrúar 2007 jók FL Group hlut sinn í 8,63% og varð þar með stærsti hluthafinn í fyrirtækinu. Við þetta tilefni sagði Hannes Smárason, þáverandi forstjóri FL Group, að stjórnendur fyrirtækisins bæru miklar væntingar til fjárfestingarinnar.[20] Upp úr áramótum 2007 hækkuðu bréf AMR Corporation og töldu stjórnendur FL Group sig eiga um 10 milljarða króna óinnleystan hagnað af fjárfestingunni þegar gengið var sem hæst, en eftir það fóru bréfin lækkandi og þessi meinti hagnaður var horfinn í marsmánuði 2007.[21] Bréfin héldu áfram að falla á árinu 2007 og í lok nóvember seldi FL Group stærstan hlut eignar sinnar (hélt eftir 1,1%) sem hafði þá rýrnað um 15 milljarða króna á árinu.[22]

Commerzbank[breyta | breyta frumkóða]

Í apríl 2007 tilkynnti FL Group að bankinn hefði fjárfest í hlutabréfum hjá þýska bankanum Commerzbank, öðrum stærsta banka Þýskalands og einum þeim stærsta í Evrópu. Keypt voru bréf að andvirði 63,5 milljarða íslenskra króna eða 723 milljónir evra sem var um 2,99% hlutur í bankanum.[23] Seinna á árinu var hlutur FL Group aukinn í 3,24% og þá var eignin í Commerzbank næststærsta einstaka eign FL Group.[24] Enn var aukið við hlutaeign FL Group og í lok september 2007 nam hlutdeildin 4,25% að andvirði 69 milljarðar króna.[25] Í byrjun árs 2008 seldi FL Group hluti í Commerzbank, lækkaði eignarhlut sinn úr 4,3% í 2,1% og nam tap vegna gengisfalls 2,6 milljörðum króna.[26] Sérstök tilkynning fylgdi fljótlega eftir þar sem tekið var fram sérstaklega að salan hafi ekki verið þvinguð.[27] Nokkrum dögum síðar hafði FL Group lækkað hlutdeild sína í 1,15%.[28]

Aðrar fjárfestingar[breyta | breyta frumkóða]

Fyrirtækið á einnig 22,4% hluta í finnska flugfélaginu Finnair. Í mars 2007 var tilkynnt að FL Group hefði keypt 10% hlut í breska fjárhættuspilafyrirtækinu Inspired Gaming Group PLC á 15,3 milljónir pund, jafnvirði um 2 milljarða króna.[29]

Stjórn FL Group[breyta | breyta frumkóða]

Varamenn:

Tilvísanir[breyta | breyta frumkóða]

  1. „Allir starfsmenn Flugleiða fá hlutabréf í félaginu“. Mbl.is (10.03. 2005), skoðað þann 31. ágúst 2008.
  2. „Hannes ráðinn forstjóri FL Group í stað Ragnhildar“. Mbl.is (19.10. 2005), skoðað þann 31. ágúst 2008.
  3. „Þrír fjárfestahópar kaupa meirihlutann í Icelandair Group“. Mbl.is (16.10. 2006), skoðað þann 31. ágúst 2008.
  4. „Samgöngur.is“, skoðað þann 31. ágúst 2008.
  5. „FL Group increases equity by up to ISK 64 billion, reaching ISK 180 billion in total equity“, skoðað þann 4. desember 2007.
  6. „FL Group: Skipt um forstjóra“, skoðað þann 4. desember 2007.
  7. „Hannes: Eðlilegt að víkja“, skoðað þann 4. desember 2007.
  8. „67,3 milljarða tap á FL Group“. Mbl.is (13.02. 2008), skoðað þann 31. ágúst 2008.
  9. „FL Group verður Stoðir“. Mbl.is (04.07. 2008), skoðað þann 31. ágúst 2008.
  10. Sigurður Mikael Jónsson, „FL Group tapaði 47,8 milljörðum“. DV (08.05. 2008), skoðað þann 31. ágúst 2008.
  11. „Stoðir tapaði 11,6 milljörðum króna á öðrum ársfjórðungi“. Viðskiptablaðið (29.08. 2008), skoðað þann 31. ágúst 2008.
  12. „Stoðir óska eftir greiðslustöðvun“. mbl.is (29. september 2008), skoðað þann 29. september 2008.
  13. „FL Group gengur frá kaupum á danska flugfélaginu Sterling“. Mbl.is (23.10. 2005), skoðað þann 31. ágúst 2008.
  14. „Viðræður um Sterling á lokastigi“. Mbl.is (22.10. 2005), skoðað þann 31. ágúst 2008.
  15. „FL Group tekur við rekstri Sterling“. Mbl.is (05.01. 2006), skoðað þann 31. ágúst 2008.
  16. Arnór Gísli Ólafsson, „Stjórnendur Icelandair lögðust gegn kaupum á Sterling Airlines“. Mbl.is (02.02. 2006), skoðað þann 31. ágúst 2008.
  17. „Tap á rekstri Sterling á síðasta ári“. Mbl.is (14.02. 2007), skoðað þann 31. ágúst 2008.
  18. „FL Group selur Sterling fyrir 20 milljarða“. Mbl.is (27.12. 2006), skoðað þann 31. ágúst 2008.
  19. „FL Group kaupir nærri 6% hlut í móðurfélagi American Airlines“. Mbl.is (26.12. 2006), skoðað þann 31. ágúst 2008.
  20. „FL Group komið með 8,63% í AMR og er stærsti hluthafinn“. Mbl.is (22.02. 2007), skoðað þann 31. ágúst 2007.
  21. „Meintur hagnaður FL af AMR horfinn“. Mbl.is (29.03. 2007), skoðað þann 31. ágúst 2007.
  22. „FL Group selur bréf sín í AMR“. Mbl.is (30.11. 2007), skoðað þann 31. ágúst 2007.
  23. „FL Group kaupir hlut í Commerzbank fyrir 63,5 milljarða“. Mbl.is (27. apríl 2007), skoðað þann 9. apríl 2009.
  24. „FL Group með 3,24% hlut í Commerzbank“. Mbl.is (2. ágúst 2007), skoðað þann 9. apríl 2009.
  25. „FL Group með 4,25% í Commerzbank“. Mbl.is (26. september 2007), skoðað þann 9. apríl 2009.
  26. „FL Group selur í Commerzbank“. Mbl.is (15. janúar 2008), skoðað þann 9. apríl 2009.
  27. „Ekki þvinguð sala í Commerzbank“. Mbl.is (17. janúar 2008), skoðað þann 9. apríl 2009.
  28. „FL selur enn í Commerzbank“. Mbl.is (21. janúar 2008), skoðað þann 9. apríl 2009.
  29. „FL Group kaupir hlut í bresku spilakassafélagi“, skoðað þann 3. mars 2007.

Heimildir[breyta | breyta frumkóða]

Tenglar[breyta | breyta frumkóða]

Stoðir í fjölmiðlum