Heimsmeistaramót landsliða í knattspyrnu karla 1934

Poster

Ítalir fagna heimsmeistaratitlinum 1934

Heimsmeistaramót landsliða í knattspyrnu karla 1934 eða HM 1934 var haldið á Ítalíu dagana 27. maí til 10. júní. Þetta var önnur heimsmeistarakeppnin og sú fyrsta þar sem halda þurfti forkeppni. 32 þátttökulönd skráðu sig til keppni en sextán tóku þátt í lokakeppninni á Ítalíu. Ríkjandi meistarar Úrúgvæ neituðu að taka þátt í keppninni. Heimamenn urðu heimsmeistarar, fyrstir Evrópuþjóða eftir 2:1 sigur á Tékkóslóvakíu í úrslitaleiknum.

Val á gestgjöfum

Þar sem fyrsta heimsmeistarakeppnin hafði verið haldin í Suður-Ameríku þótti stjórnendum Alþjóðaknattspyrnusambandsins rétt að næsta mót færi fram í Evrópu. Tvær þjóðir sóttust eftir upphefðinni: Ítalir og Svíar. Ákvörðunin var tekin á fundi Alþjóðaknattspyrnusambandsins í Stokkhólmi í október 1934 án atkvæðagreiðslu, þar sem Svíar drógu umsókn sína til baka. Fasistastjórn Mussolini lagði mikla áherslu á að halda mótið og hét háum fjárhæðum til undirbúnings keppninnar.

Forkeppni

Frímerki sem ítalska póstþjónustan gaf út vegna heimsmeistaramótsins.

Sigurvegarar HM 1930, Úrúgvæ, voru enn sárir út í Evrópuþjóðir - þar á meðal Ítali - sem flestar sniðgengu keppnina fjórum árum fyrr vegna mikils ferðakostnaðar. Heimsmeistararnir ákváðu því að gjalda líku líkt og sátu heima og urðu þar með einu heimsmeistararnir í sögunni sem ekki freistuðu þess að verja titil sinn.

Alls skráðu 32 lið sig til leiks í forkeppni, en nokkur þeirra drógu sig þó í hlé áður en keppni hófst. Keppt var í tólf riðlum með tveimur til þremur liðum í hverjum. Einn riðillinn var skipaður liðum frá Miðausturlöndum: Tyrklandi, Egyptalandi og liði frá breska valdsvæðinu í Palestínu. Voru þetta fyrstu þáttökuliðin frá Afríku og Asíu. Af úrslitum í forkeppninni vakti helst athygli að lið Júgóslava komst ekki áfram, þrátt fyrir að hafa farið í undanúrslitin fjórum árum fyrr.

Þrátt fyrir að vera gestgjafar, fengu Ítalir ekki öruggt sæti á mótinu. Lið þeirra mætti Grikkjum í forkeppninni. Er þetta eina skiptið sem heimalið hefur þurft að berjast fyrir þátttökurétti á HM.

Lokaleikur forkeppninnar fór fram í Rómarborg fáeinum dögum áður en mótið hófst að viðstöddum 12 þúsund áhorfendum. Þar unnu Bandaríkjamenn 4:2 sigur á Mexíkó.

Þátttökulið

Þessi sextán lönd tóku þátt í mótinu. Tólf komu frá Evrópu, þar af níu sem tóku þátt í sínu fyrsta heimsmeistaramóti. Tvö frá Suður-Ameríku, eitt frá Norður-Ameríku og Egyptaland frá Afríku, en 56 ár áttu eftir að líða uns Egyptar komust aftur í úrslitakeppni HM.

• Argentína
• Austurríki
• Bandaríkin
• Belgía
• Brasilía
• Egyptaland

• Frakkland
• Holland
• Ítalía (gestgjafar)
• Rúmenía
• Spánn

• Sviss
• Svíþjóð
• Tékkóslóvakía
• Ungverjaland
• Þýskaland

Leikvangar

Leikirnir sautján á mótinu fóru fram á átta leikvöngum í jafnmörgum borgum. Mikið var lagt í umgjörð HM, enda leit Benito Mussolini á mótið sem prýðilegt áróðurstæki. Aðsóknin olli skipuleggjendum þó nokkrum vonbrigðum, þannig var ekki uppselt á neinn leik heimamanna nema úrslitin.

Bologna	Flórens	Genúa
Stadio Littoriale	Stadio Giovanni Berta	Stadio Luigi Ferraris
Áhorfendur: 50.100	Áhorfendur: 47.290	Áhorfendur: 36.703
Mílanó	Tórínó	Napólí
Stadio San Siro	Stadio Benito Mussolini	Stadio Giorgio Ascarelli
Áhorfendur: 55.000	Áhorfendur: 28.140	Áhorfendur: 40.000
Stadio Nazionale PNF	Stadio Littorio
Róm	Tríeste
Áhorfendur: 47.300	Áhorfendur: 8.000

Keppnin

Fyrsta umferð

Frá leik Hollendinga og Svisslendinga í fyrstu umferð.

Keppt var með einföldu útsláttarkeppnisfyrirkomulagi. Liðunum var styrkleikaraðað á þann hátt að átta sterkustu þjóðirnar gátu ekki dregist saman í fyrstu umferð. Allir átta leikirnir í fyrstu umferð fóru fram á sama degi og á sama tíma þann 27. maí. Því var ekki um eiginlegan opnunarleik að ræða eins og á flestum heimsmeistaramótum.

Þrjú af liðunum úr efri styrkleikaflokki töpuðu leikjum sínum: Argentína, Brasilía og Holland. Vegna innbyrðis deilna var þó enginn leikmaður úr argentínska liðinu sem hlaut silfurverðlaunin fjórum árum fyrr með á Ítalíu. Öll liðin utan Evrópu féllu úr leik í fyrstu umferð. Egyptar komu þó mjög á óvart og stóðu í sterku ungversku liði. Leikur Ítala og Bandaríkjamanna var algjör einstefna og lauk 7:1, þar sem bandaríski markvörðurinn átti þó stórleik.

• Austurríki 3 : Frakkland 2 (e.framl), Stadio Benito Mussolini, áh. 16.000
• Ungverjaland 4 : Egyptaland 2, Stadio Giorgio Ascarelli, áh. 9.000
• Sviss 3 : Holland 2, Stadio San Siro, áh. 33.000
• Svíþjóð 3 : Argentína 2, Stadio Littoriale Bologna, áh. 14.000
• Þýskaland 5 : Belgía 2, Stadio Giovanni Berta, áh. 8.000
• Spánn 3 : Brasilía 1, Stadio Luigi Ferraris, áh. 21.000
• Ítalía 7 : Bandaríkin 1, Stadio Nazionale PNF, áh. 25.000
• Tékkóslóvakía 2 : Rúmenía 1, Stadio Littorio, áh. 9.000

Fjórðungsúrslit

Allir leikir fjórðungsúrslitanna fóru fram samtímis þann 31. maí. Ítalir og Spánverjar gerðu jafntefli og þurftu að mætast að nýju. Báðar viðureignir liðanna þóttu afar grófar og urðu mikil meiðsli á leikmönnum, þannig þurftu Spánverjar að gera sjö breytingar á liði sínu milli leikjanna tveggja. Spænsku leikmennirnir voru afar ósáttir við dómgæsluna, en tvö mörk voru dæmd af liði þeirra í síðari viðureigninni.

• Tékkóslóvakía 3 : Sviss 2, Stadio Benito Mussolini, áh. 12.000
• Þýskaland 2 : Svíþjóð 1, Stadio San Siro, áh. 3.000
• Austurríki 2 : Ungverjaland 1, Stadio Littoriale Bologna, áh. 23.000
• Ítalía 1 : Spánn 1, Stadio Giovanni Berta, áh. 35.000

Annar leikur:

• Ítalía 1 : Spánn 0, Stadio Giovanni Berta, áh. 43.000

Undanúrslit

Undanúrslitin voru leikin 3. júní. Tékkóslóvakía vann sannfærandi sigur á Þjóðverjum. Oldřich Nejedlý skoraði öll þrjú mörk sinna manna, en hann varð markakóngur keppninnar með alls fimm mörk. Í hinni viðureigninni tókust á þau tvö lið sem sigurstranglegust voru talin. Landslið Austurríkis gekk undir heitinu Wunderteam (ísl. Undraliðið), með Matthias Sindelar fremstan í flokki. Með harðsnúnum varnarleik tókst Ítölum að brjóta niður austurrísku sóknina, auk þess sem leikið var í úrhellisrigningu.

• Tékkóslóvakía 3 : Þýskaland 1, Stadio Nazionale PNF, áh. 15.000
• Ítalía 1 : Austurríki 0, Stadio San Siro, áh. 35.000

Bronsleikur

Leikið var um þriðja sætið á HM 1934, en enginn slíkur leikur fór fram fjórum árum fyrr. Þjóðverjar hömpuðu bronsverðlaununum eftir sigur á grönnum sínum.

• Þýskaland 3 : Austurríki 2, Stadio Giorgio Ascarelli, áh. 7.000

Úrslitaleikur

Grípa þurfti til framlengingar í úrslitaleiknum í Rómarborg. Angelo Schiavio skoraði sigurmarkið og sitt fjórða mark í keppninni.

• Ítalía 2 : Tékkóslóvakía 1 (e.framl.), Stadio Nazionale PNF, áh. 55.000

Markahæstu leikmenn

Oldřich Nejedlý frá Tékkóslóvakíu varð markakóngur keppninnar. Alls voru 70 mörk skoruð af 45 leikmönnum, ekkert þeirra var sjálfsmark.

5 mörk

• Oldřich Nejedlý

4 mörk

• Edmund Conen
• Angelo Schiavio

3 mörk

• Raimundo Orsi
• Leopold Kielholz