Barrtré

Barrtré Tímabil steingervinga: Moscovian til nútíma
Barrskógar geta þakið stór svæði þrátt fyrir að vera með fáar tegundir, svo sem þessi í Fossafjöllum í vesturhluta Norður-Ameríku.
Vísindaleg flokkun
Veldi: Heilkjörnungar (Eukaryota) Ríki: Jurtaríki (Plantae) Fylking: Berfrævingar (Pinophyta) Flokkur: Pinopsida
Ættir og undirættir
Cordaitales † Pinales Pinaceae Araucariaceae Podocarpaceae Sciadopityaceae Cupressaceae Cephalotaxaceae Taxaceae Vojnovskyales † Voltziales †
Samheiti
Coniferophyta Coniferae

Barrtré eru plöntur af ætt berfrævinga (Pinophyta). Flest eru þau sígræn.

Barrskógabeltið eða taiga á erlendum málum, þekur stórt svæði á norðurhveli jarðar, aðallega í Rússlandi og Kanada. Tiltölulega fáar tegundir trjágróðurs þekja mikil svæði í norðlægum barrskógum. Þær eru af fjórum meginættkvíslum; lerki (Larix), greni (Picea), þinur (Abies) og fura (Pinus). Í Norður-Ameríku eru tvær tegundir af þin og tvær tegundir af greni ríkjandi en í Skandinavíu og vestur Rússlandi er skógarfuran (Pinus sylvestris) afar útbreidd.

Stærsta tré í heimi, fjallarauðviðurinn (Sequoiadendron giganteum, áður þekkt sem risafura) er barrtré og einnig það hæsta; strandrauðviður (Sequoia sempervivens).

Lýsing

Barrtré hafa löng og mjó, nálarlaga eða hreisturlaga laufblöð sem eru kölluð barr. Barrið er í raun upprúlluð laufblöð. Flest barrtré vaxa meira upp en til hliðar og eru því oft eins og keila í laginu. Barrtré þurfa ekki eins mikið vatn og lauftré og geta því vaxið þar sem lauftré þrífast ekki. Sumt barr hefur vaxkennda húð á yfirborðinu sem verndar það.

Barr inniheldur líka ýmis efni sem virka eins og frostlögur. Það þolir því vel kulda og flest barrtré halda því barrinu á veturna. Trén eru þess vegna græn á litinn allan ársins hring. Margar mismunandi gerðir eru til af barrtrjám.

Á Íslandi eru fura, greni og lerki algengust. Lerki er sérstakt af því að það fellir barrið á haustin. Eina upprunalega barrtréð eftir síðustu ísöld á Íslandi er einir sem, ólíkt flestum öðrum barrtrjám, myndar ekki alvöru köngla. Ýmsar tegundir hafa verið reyndar í skógrækt.

Listi barrtrjáa sem ræktuð hafa verið á Íslandi

(Listinn er ekki tæmandi)

• Alaskasýprus
• Apahrellir
  
• Balkanfura
• Balsamþinur
• Bosníufura
• Bergfura
• Blágreni
  
• Broddfura
  
• Broddgreni
  
• Dáríulerki
• Degli
  
• Einir
• Glæsiþinur
• Gráfura
• Evrópulerki
  
• Fjallafura
• Fjallalerki
• Fjallaþinur
  
• Fjallaþöll
• Himalajaeinir
• Hvítgreni
  
• Hvítþinur
  
• Japanslerki
• Klettafura
• Kanadalífviður
• Kóreulífviður
• Kóreuþinur
• Lindifura
• Marþöll
• Mýralerki
• Nordmannsþinur
• Rauðgreni
  
• Risalerki
• Risalífviður
  
• Rússalerki
• Sifjalerki
• Sitkabastarður
  
• Sitkagreni
  
• Skógarfura
• Stafafura
  
• Síberíulerki
• Síberíuþinur
  
• Svartgreni
  
• Sveigfura
• Ýviður

Tengt efni

Lauftré