Fáskrúðsfjörður

Fáskrúðsfjörður
Þorp
Fáskrúðsfjörður Staðsetning Fáskrúðsfjarðar
Hnit: 64°56′6″N 14°2′40″V
Land	Ísland
Landshluti	Austurland
Kjördæmi	Norðaustur
Sveitarfélag	Fjarðabyggð
Mannfjöldi  (2026)
• Samtals	707
Heiti íbúa	Fáskrúðsfirðingar
Póstnúmer	750
Vefsíða	fjardabyggd.is

Gamli Franski spítalinn við Fáskrúðsfjörð.

Fáskrúðsfjörður (áður nefnt Búðir eða Búðakauptún) er þorp á Austfjörðum sem stendur við samnefndan fjörð og er hluti af sveitarfélaginu Fjarðabyggð. Íbúar á Fáskrúðsfirði voru 735 árið 2024.

Saga

Verslun hófst á Búðum upp úr 1880 og tók fljótlega að myndast kauptún sem byggt er í landi jarðarinnar Búða. Fyrsti kaupmaður sem verslaði hér, hét Friðrik Wathne, en árið 1888 setti Carl D. C. Tulinius, kaupmaður á Eskifirði, upp útibú á staðnum.

Fyrir aldamótin 1900 og fram undir 1935 voru Búðir helsta bækistöð franskrar skútuútgerðar á Austfjörðum. Þar var franskur konsúll, franskt sjúkrahús og frönsk kapella.

Frá seinni hluta 19. aldar fram til 1935 var þar aðalmiðstöð franskra sjómanna sem stunduðu veiðar við austurströnd Íslands. Bærinn er vel þekktur fyrir þessa frönsku arfleifð og sterk tenging er við vinbæ Fáskrúðsfjarðar í norður Frakklandi, Gravelines (þaðan komu flestir sjómennirnir sem veiddu við Ísland). Rétt fyrir utan bæinn er grafreitur franskra og belgískra sjómanna sem létust við Íslandsstrendur.

Jarðgöng tengja Fáskrúðsfjörð og Reyðarfjörð, en lengri leiðin, vegur 955 sem liggur með ströndinni, er einstaklega falleg og hana er skemmtilegt að keyra á góðum degi. Eyjan Skrúður er staðsett undan strönd fjarðarins. Henni tengjast fjölmargar þjóðsögur auk þess sem eyjan er þekkt fyrir fjölskrúðugt fuglalíf, en þar er sérstaklega mikið um lunda og súlur. Umhverfis eyjuna eru háir klettar svo það þarf vænan skammt af hugrekki til að heimsækja hana en í klettabeltinu er hellir þar sem sjómenn áttu það til að leita skjóls í óveðri.

Tenglar

• Bækistöðvar Fransmanna á Íslandi; 1. grein í Lesbók Morgunblaðsins 1965
• Bækistöðvar Fransmanna á Íslandi; 2. grein í Lesbók Morgunblaðsins 1965
• Fáskrúðsfjörður; East.is

  Þessi Íslandsgrein sem tengist landafræði er stubbur. Þú getur hjálpað til með því að bæta við greinina.