Grímsey

„Grímsey“ getur einnig átt við Grímsey í Steingrímsfirði á Ströndum.

Grímsey
Þorp
Grímsey Staðsetning Grímseyjar
Hnit: 66°32′47.328″N 18°0′17.824″V
Land	Ísland
Landshluti	Norðurland eystra
Kjördæmi	Norðaustur
Sveitarfélag	Akureyrarbær
Mannfjöldi  (2025)
• Samtals	52
Heiti íbúa	Grímseyingar
Póstnúmer	611
Vefsíða	akureyri.is

Grímsey er eyja 40 km norður af meginlandi Íslands. Þar er lítið þorp sem byggir afkomu sína á sjávarútvegi og er nyrsta mannabyggð Íslands. Norðurheimskautsbaugurinn gengur í gegnum eyjuna norðanverða. Eyjan þekur 5,3 ferkílómetra og rís hæst 105 metra yfir sjávarmál. Samgöngur við eyna byggjast á reglulegum ferjusiglingum frá Dalvík og flugi frá Akureyri. Í eynni hefur verið sjálfvirk veðurathugunarstöð frá 2005. 25. apríl 2009 fór fram kosning í Grímsey og á Akureyri um hvort sveitarfélögin tvö ættu að sameinast og var það samþykkt með meirihluta atkvæða á báðum stöðum. 57 manns bjuggu í eynni árið 2024.

Veður

Í ágúst 2021 mældust 22,3 gráður í eynni sem er met.

Sögulegir atburðir

Grímseyjarför

Aðalgrein: Grímseyjarför

Grímseyjarför var herför feðgarnir Sighvatur Sturluson og Sturla Sighvatsson fóru til Grímseyjar vorið 1222 með um 300 manna lið til að hefna fyrir drápið á Tuma Sighvatssyni eldri þá um veturinn.

Árið 1793 - Sótt

Fuglabjarg í Grímsey

Þetta ár munaði litlu, að Grímsey legðist í auðn. Þá gekk á eyjunni taksótt (pleuritis), sem drap marga fullorðna karlmenn. Var sagt, að aðeins 6 fullfærir karlar væru þar eftir, og voru þeir sendir á báti til meginlandsins til að sækja aukinn liðsafla fyrir eyjarskeggja. En á leiðinni til lands fórst báturinn með öllum mönnunum svo að ekki var annað fullfærra karlmanna eftir í Grímsey en sóknarpresturinn einn.

Miðgarðakirkja

Ný Miðgarðarkirkja nokkrum dögum fyrir vígslu.

Miðgarðakirkja var byggð árið 1867 og endurbætt um miðja 20. öld. Aðfaranótt 22. septembers 2021 brann kirkjan til grunna þegar kviknaði út frá rafmagnstöflu. Menningarverðmæti töpuðust og þar á meðal einstök altaristafla sem Arngrímur Gíslason málaði árið 1879 og kirkjuklukkur frá 1799 og 1852. Söfnun hófst strax fyrir nýja kirkju. Nýja kirkjan var vígð í ágúst 2025.

Myndir

• 
  Byggðin í eyjunni.
• 
  Grímseyjarkirkja (brann 2021).
• 
  Heimskautsbaugur.

Tengt efni

• Grímseyjarflugvöllur

Tenglar

• Um Grímsey; af Grímsey.is