Tækniskólinn
| |
| Einkunnarorð | „Skóli atvinnulífsins“ |
|---|---|
| Stofnaður | 2008 |
| Tegund | Framhaldsskóli |
| Skólameistari | Hildur Ingvarsdóttir |
| Nemendafélag | Nemendasamband Tækniskólans (NST) |
| Staðsetning | Skólavörðuholt, Háteigsvegur, Hafnarfjörður |
| Gælunöfn | Tæknó, Tskóli |
| Heimasíða | tskoli.is |
Tækniskólinn er íslenskur framhaldsskóli stofnaður 1. júlí árið 2008 með sameiningu Iðnskólans í Reykjavík og Fjöltækniskólans. Tækniskólinn tók yfir rekstur og hlutverki Iðnskólans í Hafnarfirði frá og með 1. ágúst 2015.
Tækniskólinn er einkarekinn skóli og er rekstrarfélagið í eigu aðila atvinnulífsins, Samtaka fyrirtækja í sjávarútvegi (SFS), Samtaka iðnaðarins (SI), Samorku og Iðnaðarmannafélagsins í Reykjavík (IMFR).
Um Tækniskólann
[breyta | breyta frumkóða]Tækniskólinn er stærsti framhaldsskóli landsins og byggir á langri og merkri sögu sem tengist atvinnulífi landsins á marga vegu.[1]
Hlutverk skólans er að bjóða upp á fjölbreytt og framsækið nám í góðu samstarfi við atvinnulífið og að efla nemendur til persónulegs þroska og virkrar þátttöku í samfélaginu.[1] Kjarnastarfsemi skólans er framhaldsskóli með áherslu á tækni- starfs- og iðnnám. Tækniskólinn leggur áherslu á öflug tengsl við atvinnulífið og að vera í forystu við innleiðingu á bestu kennsluaðferðum hverju sinni.
Námsframboð
[breyta | breyta frumkóða]Tækniskólinn skiptist í sjö undirskóla, hver með sinn skólastjóra. Í hverjum undirskóla eru gjarnan margar námsbrautir. Undirskólar Tækniskólans eru eftirtaldir:
- Byggingatækniskólinn
- Hönnunar- og handverkskólinn
- Raftækniskólinn
- Skipstjórnarskólinn
- Tæknimenntaskólinn
- Upplýsingatækniskólinn
- Véltækniskólinn
Starfsemi
[breyta | breyta frumkóða]
Kennt er í byggingu skólans á Skólavörðuholti, við Flatahraun í Hafnarfirði og í Sjómannaskólahúsinu á Háteigsvegi. Byggingartækniskólinn hefur auk þess aðstöðu í Skeljanesi og í Gjótuhrauni í Hafnarfirði. Verkleg kennsla flugvirkjunar er í Árleyni og hljóðtækni er kennd í húsnæði Sýrlands ehf. við Vatnagarða.
Áður var Upplýsingatækniskólinn til húsa í Vörðuskóla en starfsemi hans var flutt á Háteigsveg þann 22. mars 2019, eftir að skoðun Vörðuskóla á vegum Ríkiseigna leiddi í ljós að „full ástæða [væri] til að skoða betur“ tiltekin rými vegna slæmra loftgæða og sveppagróa. Tekin var ákvörðun um að skoða aðstæður nánar og ráðast í framhaldinu í viðeigandi viðgerðir.[2]
Heimildir
[breyta | breyta frumkóða]- 1 2 Ólafsdóttir, Anna Kristín (3 ágúst 2021). „Um Tækniskólann | Tækniskólinn“. Sótt 16 febrúar 2026.
- ↑ „Fundu gró og sveppahluti í Vörðuskóla“. www.mbl.is. Sótt 5 október 2019.