Skólavörðuholt

Úr Wikipediu, frjálsa alfræðiritinu
Skólavörðuholt: Leifsstyttan og Hallgrímskirkja.

Skólavörðuholt er hæð austan við Tjörnina í Reykjavík og er hæsti punktur í miðborg Reykjavíkur. Efst á Skólavörðuholti er Hallgrímskirkja, helsta kennileiti borgarinnar, og fyrir framan hana er stytta af Leifi Eiríkssyni sem Bandaríkjamenn gáfu Íslendingum í tilefni af Alþingishátíðinni 1930. Skólavörðustígur liggur til austurs upp á holtið frá mótum Bankastrætis og Laugavegar. Á Skólavörðuholti standa líka Listasafn Einars Jónssonar, Iðnskólinn í Reykjavík (Tækniskólinn), Austurbæjarskóli og Vörðuskóli.

Skólavörðuholt hét upphaflega Arnarhólsholt[1] þar sem það er fyrir ofan Arnarhól og var stórgrýttur melur með jökulurð og gott berjaland áður en þar var byggt. Vesturhlíð hæðarinnar er kölluð Þingholt eftir bæ sem þar stóð áður fyrr. Núverandi nafn sitt fékk holtið eftir að Skólavarðan var reist þar árið 1793 en hana reistu skólapiltar úr Hólavallarskóla. [2] Hún var svo endurhlaðin úr tilhöggnu grjóti 1834. Skólavarðan var rifin 1932 til að rýma fyrir styttunni af Leifi Eiríkssyni. Á 3. áratugnum hannaði Guðjón Samúelsson arkitekt það sem kallað var „háborg íslenskrar menningar“, en þá stóð til að Háskóli Íslands myndi rísa á Skólavörðuholti. Hætt var við þær fyrirætlanir þegar borgarstjórn ákvað að bjóða háskólanum lóð á Melunum árið 1930, en lóðin á holtinu þótti of lítil.[3]

Eitt og annað[breyta | breyta frumkóða]

  • Á Skólavörðuholti stóð áður fyrr Listvinahúsið, en þar hélt Guðmundur frá Miðdal til og steypti þar rjúpur, fálka og ketti úr leir og brenndi í ofni. Kjarval vann þar líka um tíma. [4]
  • Á fimmta, sjötta og jafnvel sjöunda áratug 20. aldar tíðkaðist það að selja bíla við styttuna af Leifi Eirikssyni. Menn sem vildu selja bíla sína auglýstu þá til sýnis „við Leifsstyttuna“ á einhverjum tíma dagsins. [5] [6]

Tengt efni[breyta | breyta frumkóða]

Tilvísanir[breyta | breyta frumkóða]

  1. Hvaðan er nafn Arnarhóls komið?“ á Vísindavefnum
  2. Skólavarðan; grein í Lesbók Morgunblaðsins 1979
  3. Atli Þór Ægisson (september 2016). „Akrópólis íslenskrar menningar sem aldrei varð“. RÚV.
  4. Nokkur orð um smáhýsi og andans stórmenni; grein í Sunnudagsblaðinu 1964
  5. Chrystler; smáauglýsing í Morgunblaðinu 1949
  6. Ný Simca-bifreið; smáauglýsing í Morgunblaðinu 1962

Tenglar[breyta | breyta frumkóða]

Puzzle stub.svg  Þessi grein er stubbur. Þú getur hjálpað til með því að bæta við greinina.