Sjómannaskólinn í Reykjavík
Sjómannaskólinn í Reykjavík var kennslustofnun sjómanna sem starfaði fyrst við Öldugötu í Reykjavík („Gamli stýrimannaskólinn“) og síðan við Háteigsveig í Reykjavík. Stýrimannaskólinn í Reykjavík var stofnaður með lögum hinn 22. maí 1890, en skólinn tók til starfa haustið 1891. Vélskóli íslands var stofnaður 1915. Stýrimannaskólinn og síðar Vélskólinn höfðu aðsetur við Háteigsveg frá byggingu skólans, en þann 1. ágúst 2003 tók Menntafélagið ehf við rekstri skólanna og starfa þeir núna sem Tækniskólinn. Í Sjómannaskólahúsinu eru núna skipstjórnarskólinn og margmiðlunarskólinn, auk hluta véltækniskólans, sem eru deildir innan Tækniskólans.
Sigurður Guðmundsson og Eiríkur Einarsson húsameistari teiknuðu hús Sjómannaskólans við Háteigsveg. Lagður var hornsteinn að byggingunni á sjómannadaginn 4. júní 1944 og var skólinn vígður árið 1945. Í blýhólki þeim sem lagður var í hornsteininn liggja uppdrættir hússins og meginatriði að byggingarsögu skólans, skráð á skinn. Veðurstofan hafði aðsetur í skólanum til ársins 1973 en hluti Veðurstofunnar flutti síðan út á Reykjavíkurflugvöll í ársbyrjun 1950.[1] Kennaraháskóli Íslands hafði hluta hússins til afnota um tíma.
Tilvísanir
[breyta | breyta frumkóða]- ↑ „Sjómannaskólinn“. Morgunblaðið - Fasteignablað: F 31. 2006.
