Sjómannaskólinn í Reykjavík

Sjómannaskólinn í Reykjavík.

Sjómannaskólinn í Reykjavík er stórhýsi sem stendur við Háteigsveg. Húsið var byggt yfir tvær menntastofnanir sjómanna, Stýrimannaskólann í Reykjavík og Vélskóla Íslands. Stýrimannaskólinn í Reykjavík var stofnaður með lögum hinn 22. maí 1890, en skólinn tók til starfa haustið 1891 og var fyrst til húsa við Öldugötu í Reykjavík í húsnæði sem lengi var kallað „Gamli stýrimannaskólinn“. Vélskóli Íslands var stofnaður 1915. Stýrimannaskólinn og síðar Vélskólinn höfðu aðsetur við Háteigsveg frá byggingu skólans. Þann 1. ágúst 2003 tók Menntafélagið ehf. við rekstri skólanna og starfa þeir núna sem Tækniskólinn. Í Sjómannaskólahúsinu eru núna skipstjórnarskólinn og margmiðlunarskólinn, auk hluta véltækniskólans, sem eru deildir innan Tækniskólans.

Misskilnings gætir að nafnið Sjómannaskólinn eigi við þær menntastofnanir sem húsið var byggt yfir, en hið rétta er að þetta er nafn byggingarinnar.

Sigurður Guðmundsson og Eiríkur Einarsson húsameistari teiknuðu hús Sjómannaskólans við Háteigsveg. Lagður var hornsteinn að byggingunni á sjómannadaginn 4. júní 1944 og var skólinn vígður árið 1945. Í blýhólki þeim sem lagður var í hornsteininn liggja uppdrættir hússins og meginatriði að byggingarsögu skólans, skráð á skinn. Veðurstofan hafði aðsetur í skólanum til ársins 1973 en hluti Veðurstofunnar flutti síðan út á Reykjavíkurflugvöll í ársbyrjun 1950. Kennaraháskóli Íslands hafði hluta hússins til afnota um tíma.

Í turni hússins var viti sem var eitt af innsiglingarljósum fyrir Reykjavíkurhöfn. Áður var siglingaljós á hitaveitutönkunum á Rauðarárholti. Árið 2009 kom í ljós að nýbyggð háhýsi við Borgartún skyggðu á ljósið. Tíu árum síðar var nýr viti tekinn í notkun við Sæbraut, í stað vitans í Sjómannaskólanum. Í turninum eru nú fjarskiptaloftnet og ratsjá sem eru notuð í kennslu.

Tilvísanir

  Þessi skólagrein er stubbur. Þú getur hjálpað til með því að bæta við greinina.