Álfheiður Ingadóttir

Álfheiður Ingadóttir (ÁI)
Alþingismaður
frá til  kjördæmi    þingflokkur 2007 2009  Reykjavíkurkjördæmi suður  Vinstrihreyfingin - grænt framboð 2009 2013  Reykjavíkurkjördæmi norður  Vinstrihreyfingin - grænt framboð
Persónulegar upplýsingar
Fædd	1. maí 1951 (1951-05-01)
Nefndir	Heilbrigðisnefnd, viðskiptanefnd, iðnaðarnefnd, viðskiptanefnd, allsherjarnefnd, velferðarnefnd, efnahagsnefnd, umhverfisnefnd, stjórnskipunar- og eftirlitsnefnd
Æviágrip á vef Alþingis

Álfheiður Ingadóttir (f. 1. maí 1951) er íslenskur stjórnmálamaður og líffræðingur og var alþingismaður Reykvíkinga fyrir Vinstri hreyfinguna - grænt framboð 2007-2013. Álfheiður var heilbrigðisráðherra 1. okt. 2009 til 2. sept. 2010 og formaður þingflokks Vinstri grænna 2012-2013. Álfheiður skipaði 2. sæti á framboðslista VG í Reykjavíkurkjördæmi suður í kosningunum 2013. Álfheiður er gift Sigurmari K. Albertssyni hrl. og eiga þau einn son, Inga Kristján, f. 1991.

Menntun og fyrri störf

Álfheiður lauk grunnskólaprófi frá Melaskóla, landsprófi frá Hagaskóla og stúdentsprófi frá Menntaskólanum í Reykjavík 1971. Hún lauk BS-prófi í líffræði frá Háskóla Íslands 1975 og stundaði nám í þýsku og fjölmiðlun í Freie Universität í Berlín 1976-1977. Hún kenndi líffræði með námi í MR og MH, var blaðamaður við Þjóðviljann 1977-1987, upplýsingafulltrúi Samtaka um kvennaathvarf 1994–1995 og framkvæmdastjóri ráðstefnu norrænna kvennaathvarfa á Íslandi í nóvember 1995. Álfheiður var útgáfustjóri Náttúrufræðistofnunar Íslands 1997-2007 og ritstjóri Náttúrufræðingsins, tímarits Hins íslenska náttúrufræðifélags, 1997-2006 og aftur 2014-2021.

Stjórnmál

Álfheiður hefur lengi tekið virkan þátt í félagsmálum og pólitík. Hún var félagi í Alþýðubandalaginu, tók þátt í myndun Reykjavíkurlistans 1994 og stofnun Vinstri hreyfingarinnar – græns framboðs 1999. Álfheiður var varaborgarfulltrúi AB í Reykjavík 1978-1986 og varaþingmaður 1987-1991. Hún átti sæti í ýmsum nefndum á vegum borgarinnar m.a. í jafnréttisnefnd 1982–1986 og í umhverfismálaráði 1978-1986 og var formaður þess um skeið. Hún sat í nefnd um byggingu Náttúruhúss í Reykjavík 1989–1990 og var formaður nefndar um áhættumat Reykjavíkurflugvallar 1990-1991. Hún gegndi ýmsum trúnaðarstörfum á vegum Reykjavíkurlistans, m.a. í stjórn Sorpu 1994–1998 og í nefnd um mótun orkustefnu Reykjavíkurborgar 2002–2003. Álfheiður var einn þriggja fulltrúa Reykjavíkurborgar í stjórn Landsvirkjunar 2003-2006 þegar borgin seldi hlut sinn til ríkisins.

Álfheiður var kjörin á þing fyrir Vinstri græn 2007. Hún var 5. varaforseti Alþingis frá kosningum 2009 til 2012 að undanskildu því tæpa ári sem hún gegndi embætti heilbrigðisráðherra og þinginu 2012-2013 þegar hún var formaður þingflokks VG. Hún var formaður viðskiptanefndar og velferðarnefndar með hléum 2007-2013 og varaformaður stjórnskipunar- og eftirlitsnefndar frá 2011 til loka kjörtímabilsins.

Álfheiður átti sæti í Norðurlandráði 2009- 2013 og sat í umhverfis- og auðlindanefnd ráðsins þann tíma. Hún var formaður flokkahóps vinstri grænna sósíalista í ráðinu 2011-2012. Álfheiður var formaður Þingvallanefndar 2009-2013.

Heimildir

• Alþingisvefur - æviágrip
• Álfheiður Ingadóttir

Fyrirrennari: Ögmundur Jónasson

Heilbrigðisráðherra (1. október 2009 – 2. september 2010)

Eftirmaður: Guðbjartur Hannesson