Karlalandslið Fílabeinsstrandarinnar í knattspyrnu

Fílbeinstrendíska karlalandsliðið í knattspyrnu

Gælunafn	Les Éléphants(Fílarnir)
Íþróttasamband	Fílbeinstrendíska knattspyrnusambandið
Álfusamband	CAF
Þjálfari	Jean-Louis Gasset
Fyrirliði	Serge Aurier
FIFA sæti   Hæst   Lægst	49 (21. desember 2023) 12 (Febrúar 2013, apríl-maí 2013) 75 (mar-maí 2004)
Heimabúningur Útibúningur
Fyrsti landsleikur
3-2 gegn Dahomey ( 13.apríl, 1960)
Stærsti sigur
11-0 gegn Mið-Afríkulýðveldinu (27.desember 1961)
Mesta tap
5-0 gegn Hollandi (4.júní 2017)
Heimsmeistaramót
Keppnir	3 (fyrst árið 2006)
Besti árangur	Riðlakeppni
Afríkubikarinn
Keppnir	25 (fyrst árið 1965)
Besti árangur	Meistarar (1992, 2015)

Fílbeinstrendíska karlalandsliðið í knattspyrnu eða Fílarnir eins og þeir eru oft kallaðir er stjórnað af knattspyrnusambandi Fílabeinsstrandarinnar. Til ársins 2005 var stærsta afrek liðsins sigur í Akríkukeppninni árið 1992. Frá 2006 til 2015 var blómaskeið landsliðsins sem komst í úrslitakeppni þriggja Heimsmeistaramóta í röð og varð að lokum Afríkumeistari árið 2015.

Saga

Fílabeinsströndin öðlaðist sjálfstæði árið 1960 og lék þegar sama ár sinn fyrsta landsleik, gegn Benín sem þá gekk raunar undir nafninu Dahomey. Liðið tók fyrst þátt í Afríkukeppninni árið 1965 og vann til bronsverðlauna og endurtók svo leikinn þremur árum síðar.

Fyrsti Afrikumeistaratitllinn vannst árið 1992 í móti sem haldið var í Senegal. Grípa þurfti til vítaspyrnukeppni í bæði undanúrslitum og úrslitaleik keppninnar á móti Kamerún og Gana. Sú seinni rataði í sögubækur sem fyrsta vítaspyrnukeppni á stórmóti þar sem allir leikmenn þurftu að taka spyrnu. Velgengnin í Afríkumótinu skilaði sér þó ekki í forkeppni HM þar sem Fílabeinsströndinni tókst ekki að tryggja sér sæti í úrslitum fyrr en á HM 2006 í Þýskalandi.

Fyrsta heimsmeistaramótið

Fílabeinsströndin komst á HM 2006 þrátt fyrir að hafa lent í afar þungum riðli í undankeppninni með bæði Kamerún og Egyptalandi. Þessi árangur náðist á sama tíma og blóðug borgarastyrjöld geysaði í landinu og varð frammistaða landsliðsins og ekki hvað síst ákall fyrirliðans Didier Drogba til þess að vopnahlé komst á og friðarsamningar hófust.

Í upphafi ársins 2006 hélt Fílabeinsströndin á Afríkumótið í Egyptalandi og hafnaði þar í öðru sæti eftir tap í vítaspyrnukeppni gegn heimamönnum í úrslitum.

Eftirvæntingin fyrir keppnina í Þýskalandi um sumarið var mikil enda liðið talið líklegt til afreka. Fílabeinsströndinni var raðað í annan styrkleikaflokk sem gaf frekar vonir um góðan árangur. Að flestra mati reyndist riðill þeirra þó sá langsterkasti í keppninni, þar sem finna mátti lið Argentínu, Hollands og Serba & Svartfellinga.

Fyrsti leikurinn, gegn Argentínu tapaðist 2:1 eftir harða baráttu. Sömu úrslit urðu upp á teningnum gegn Hollandi og því ljóst að HM-ævintýrið væri úr sögunni að þessu sinni. 3:2 sigur gegn Serbum & Svartfellingum, þar sem liðið lenti 0:2 undir, reyndist ekki mikil sárabót. Liðinu var þó tekið með kostum og kynjum við heimkomuna, einkum þó Drogba sem var nánast í dýrlingatölu í heimalandinu.

HM í Afríku

HM 2010 fór fram í Suður-Afríku og var það í fyrsta sinn sem keppnin var haldin í Afríku. Bundu margir von við að lið frá heimsálfunni myndu njóta góðs af staðsetningunni og var talað um að þau væru í raun öll á heimavelli. Fáeinum mánuðum fyrir úrslitakeppnina réð Fílabeinsströndin Sven-Göran Eriksson fyrrum landsliðsþjálfara Englands til að stýra liðinu. Líkt og fjórum árum fyrr var riðillinn strembinn, með stórliðum Brasilíu og Portúgal auk Norður-Kóreu sem var óskrifað blað.

Fílabeinsströndin og Portúgal gerðu markalaust jafntefli í fyrsta leik. Í annarri umferð unnu Brasilíumenn 3:1 sigur á Fílabeinsströndinni á sama tíma og portúgalska liðið skellti Norður-Kóreu 7:0. Þar með var ljóst að mikið þyrfti að ganga á til að Fílabeinsströndin kæmist áfram. Liðið komst í 2:0 eftir tuttugu mínútna leik á móti Norður-Kóreu og vonarglæta virtist vera að kvikna, en ekki tókst að bæta við nema einu marki á sama tíma og hin liðin í riðlinum skildu jöfn. Fílabeinsströndin var fallin úr leik og stóð ekki undir æntingum frekar en önnur Afríkulið í keppninni. Í Afríkumótinu tveimur árum síðar komst liðið í úrslitaleikinn en tapaði í vítaspyrnukeppni fyrir spútnikliði Sambíu án þess að fá á sig eitt einasta mark í keppninni.

Vonbrigði í Brasilíu

Fílabeinsströndin komst í sína þriðju úrslitakeppni HM í röð og þá síðustu til þessa dags á HM 2014 í Brasilíu. Liðið var talið líklegt til afreka og jókst sú bjartsýni þar sem riðill Fílabeinsstrandarinnar var talinn frekar þægilegur. Fyrsti leikurinn vannst, 2:1 gegn Japönum. Við tók jafnstórt tap gegn Kólumbíu og mátti því heita öruggt að jafntefli í lokaviðureigninni gegn Grikkjum myndi koma Fílabeinsströndinni áfram í næstu umferð. Grikkir tóku forystuna en Wilfried Bony jafnaði metinn þegar um stundarfjórðungur var eftir. Sætið í 16-liða úrslitum virtist í höfn þegar Grikkir stálu öllum stigunum með marki á þriðju mínútu uppbótartíma og afríska liðið sat eftir með sárt ennið.

Árangur í Afríku

Árið 2015 var Afríkumótið haldið í Miðbaugs-Gíneu. Fílabeinsströndin fór í úrslit gegn Gana. Úrslitaleiknum lauk með markalausu jafntefli. Grípa þurfti til vítaspyrnukeppni þar sem fíbeinstrendingar misnotuðu tvær fyrstu spyrnurnar en skoruðu svo úr níu í röð og urðu Afríkumeistarar í annað sinn í sögunni.

Liðið endurtók leikinn þegar það vann Nígeríu 2:1 í úrslitum Afríkukeppninnar 2024.