Gústaf 6. Adólf

Svíakonungur Bernadotte-ætt
Gústaf 6. Adólf
Ríkisár	29. október 1950 – 15. september 1973
Skírnarnafn	Oscar Fredrik Wilhelm Olaf Gustaf Adolf
Kjörorð	Plikten framför allt
Fæddur	11. nóvember 1882
	Stokkhólmshöll, Stokkhólmi, Svíþjóð
Dáinn	15. september 1973 (90 ára)
	Helsingborg, Svíþjóð
Gröf	Konunglegi grafreiturinn í Solna
Undirskrift
Konungsfjölskyldan
Faðir	Gústaf 5.
Móðir	Viktoría af Baden
Eiginkona	Margrét af Connaught (g. 1905; d. 1920) Lovísa Mountbatten ​(g. 1923; d. 1965)
Börn	Með Lovísu Mountbatten: Gústaf Adólf erfðaprins Sigvard Bernadotte Ingiríður Danadrottning Bertil, hertogi af Hallandi Carl Johann Bernadotte

Gústaf 6. Adólf (Oscar Fredrik Wilhelm Olaf Gustaf Adolf, fæddur 11. nóvember 1882, dáinn 15. september 1973) var konungur Svíþjóðar frá 1950 til dánardags. Hann var af Bernadotte-ætt, elsti sonur Gústafs 5. og konu hans Viktoríu af Baden. Kjörorð Gústafs 6. var: Plikten framför allt (Skyldan öllu æðri).

Gústaf Adólf var 67 ára þegar faðir hans dó og hann tók við konungdæminu. Hann var vinsæll meðal þegna sinna, þótti lítillátur og fremur óformlegur í framgöngu. Hann var vel menntaður og talaði mörg tungumál. Hann var mikill áhugamaður um fornleifafræði og tók þátt í fornleifarannsóknum í Kína, Grikklandi, Kóreu og á Ítalíu. Einnig var hann heiðursmeðlimur í bresku akademíunni. Hins vegar var hann lítill áhugamaður um stjórnmál og var fyrsti sænski konungurinn frá 1772 sem nær ekkert beitti áhrifum sínum á stjórn ríkisins.

Gústaf Adólf kom í opinbera heimsókn til Íslands 29. júní 1957.

Fjölskylda

Fyrri kona Gústafs Adólfs (gift 5. júní 1905) var Margrét af Connaught, dóttir Arthurs hertoga af Connaught, þriðja sonar Viktoríu Bretadrottningar. Hún dó 1. maí 1920 og varð því aldrei drottning. Þann 3. nóvember 1923 giftist Gústaf Adólf svo lafði Lovísu Mountbatten, dóttur Louis prins af Battenberg, sem breytti nafni fjölskyldunnar í Mountbatten í fyrri heimsstyrjöldinni. Hún var einnig afkomandi Viktoríu drottningar. Þau Gústaf Adólf eignuðust eina dóttur sem fæddist andvana en með fyrri konu sinni átti Gústaf Adolf fimm börn:

• Gústaf Adólf erfðaprins (f. 1906, d. í flugslysi 1947).
• Sigvard Bernadotte (1907-2002), sem þurfti að afsala sér konunglegum titlum og erfðatilkalli vegna hjónabands síns. Hann var þekktur iðnhönnuður.
• Ingiríður Danadrottning (1910-2000), sem giftist Friðrik 9. Danakonungi.
• Bertil, hertogi af Hallandi (1912-1997).
• Carl Johann Bernadotte (f. 1916), sem þurfti að afsala sér konunglegum titlum og erfðatilkalli vegna hjónabands síns.

Þar sem Gústaf Adolf erfðaprins lést á meðan faðir hans og afi lifðu var það sonarsonur Gústaf 6., Karl 16. Gústaf, sem erfði krúnuna eftir afa sinn. Gústaf 6. var einnig afi Margrétar Danadrottningar.

Tenglar

• „Gústaf VI Adólf“. Lesbók Morgunblaðsins. 21. nóvember 1965. bls. 2.

Tilvísanir

Fyrirrennari: Gústaf 5.

Svíakonungur (1950 – 1973)

Eftirmaður: Karl 16. Gústaf