Arsenal F.C.

Arsenal Football Club
Fullt nafn	Arsenal Football Club
Gælunafn/nöfn	Gunners
Stytt nafn	Arsenal F.C.
Stofnað	1886
Leikvöllur	Emirates Stadium
Stærð	60.432
Stjórnarformaður	Peter Hill-Wood
Knattspyrnustjóri	Mikel Arteta
Deild	Enska úrvalsdeildin
2023-2024	2. sæti
Heimabúningur Útibúningur

Arsenal er knattspyrnulið í norðvestur hluta Lundúna. Það var stofnað árið 1886 og hét þá Dial Square en nafnið breyttist fljótt í Royal Arsenal og svo Woolwich Arsenal. Í upphafi var það aðeins skipað starfsmönnum úr hinni konunglegu hergagnasmiðju sem staðsett var á svæðinu. Fyrsti leikurinn var leikinn við lið sem hét Eastern Wanderers og vann Arsenal þann leik 6-0.

Saga

Fyrstu skrefin

Lið Arsenal árið 1888

Þannig hófst í raun saga þessa félags sem er eitt það stærsta í Englandi og var heillengi á árunum fyrir seinna stríð, stærsti klúbbur í heimi. Næsta skref var að skipta um nafn. Liðið hét nú Royal Arsenal. Aðstöðuleysi hindraði þessa stórhuga menn ekki í að halda áfram að spila knattspyrnu. Árið 1891 hafði félagið unnið allar bikarkeppnirnar í London og þar með skotist fram úr eldri liðum á borð við Tottenham og Milwall. En eitthvað vantaði uppá. Stóru liðin að norðan voru enn of sterk fyrir „litla“ Arsenal og það var ekki fyrr en atvinnumennsku var komið á hjá Arsenal að hjólin tóku að snúast af alvöru. Fljótlega voru umsvifin orðin það mikil að liðið varð að eignast leikvang. Fyrsti völlurinn sem Arsenal eignaðist var Manor Field við Manor veg og gátu þeir þar byggt stúku sem þeir gátu verið stoltir af En bakslag kom í þetta ferli þegar hin liðin í Norður Englandi sem hingað til höfðu viljað spila við Arsenal tóku nú uppá því að neita að spila við þá. Á þeim tíma var Arsenal eina liðið í suður-Englandi sem hafði tekið upp atvinnumennsku og það fór illa í hin liðin. Enska knattspyrnusambandið snéri líka baki við þeim svo nú urðu þeir að róa á önnur mið. Reynt var að fá stóru liðin fyrir sunnan til þess að stofna deild en þeir vildu það ekki. Nú voru góð ráð dýr. Arsenal sá nú fram á dökka tíma.

Þeir þurftu að leggja á sig löng og erfið ferðalög til að fá leiki og aðsókn á Manor Ground sem hingað til hafði verið mjög góð, eða um 12 þúsund manns á leik, fór ört dvínandi. Allt virtist vera á niðurleið þegar Henry Norris kom til bjargar. Sá var formaður Fulham og vildi hann yfirtaka Arsenal og flytja það til Craven Cottage sem var heimavöllur Fulham. Stjórn deildakeppninnar var mótfallinn þessari sameiningu svo nú hófst tími uppbyggingar hjá Norris og félögum.

Norris byrjaði á því að kaupa Alf Common sem var fyrsti leikmaðurinn til þess að kosta meira en 100.000 pund en hann breytti litlu og liðið hélt áfram að tapa.

Sala á leikmönnum var óumflýjanleg því skuldir félagsins voru háar. Ekki hefur það verið til þess að styrkja liðið og árið 1912 gerðist svo hið umflýjanlega, Arsenal féll í aðra deild eftir að lenda í neðsta sæti 1. deildar. Norris brást skjótt við og leitaði nú um allt að stað fyrir nýjan leikvang fyrir félagið. Norris hafði augastað á svæði í norðurhluta London þar sem Highbury reis svo síðar. Deildarstjórnin tók líka skýrt fram að norður-London væri nægilega stórt svæði fyrir tvö lið, Tottenham og Arsenal. Fyrsti leikurinn á Highbury var spilaður í apríl 1913. Leicester Fosse voru lagðir að velli 2-1. Þá hafði Norris breytt nafninu og nú hét liðið Arsenal. Segja má að Norrris hafi tekið fyrstu skrefin í þá átt að gera Arsenal að því stórveldi sem það var á árunum eftir stríð.

Árið 1919 spilaði hann svo loks út stærsta trompinu. Stjórn deildarinnar hafði ákveðið að fjölga um tvö lið í efstu deild. Norris sá að ef Arsenal ætti að lifa af þá yrðu þeir að fá þennan séns. Norris sem nú var kominn með aðalstign og átti sæti á þinginu notaði öll sín áhrif til þess að koma Arsenal á framfæri. Hann benti mönnum á að Arsenal hafði lengi spilað í efstu deild og fannst því að þeir ættu sætið skilið. Það kom svo á daginn að Derby og Preston, tvö efstu lið 2.deildar fengu sitt sæti ásamt Chelsea F.C. og þá var komið að því. Hvort yrði það Arsenal eða Tottenham sem hlyti aukasætið? Norris hafði áunnið sér stuðning forseta deildarkeppninnar og hann flutti snjalla ræðu sem varð til þess að Arsenal hreppti hnossið. En lífið brosti ekki við Arsenal. Norris reyndi allt sem hann gat en bág fjárhagsstaða og slakur árangur gerðu illt verra. Markmið Norris um að gera Arsenal að stærsta liði Englands hafði ekki tekist og hann ákvað að segja af sér. Hann auglýsti eftir nýjum framkvæmdarstjóra og sagði svo af sér. En hugsjónir hans höfðu orðið stjórnarmönnum í Arsenal hvatning til að gera betur og næstu ár skyldu verða ár uppbyggingar.

Rígar

Rígurinn við Tottenham Hotspur

Arsenal sækir að marki Tottenham

Arsenal á í langvinnum ríg við Tottenham Hotspur. Þar sem liðin eru bæði frá norðurhluta London er leikur liðanna kallaður borgarslagurinn í Norður-London (North London derby). Upphaf rígsins má rekja til ársins 1913 þegar Arsenal rambaði á barmi gjaldþrots og Norris auk Williams Halls fluttu liðið frá Woollett til Norður-London. Nýr heimavöllur Arsenal var aðeins sex kílómetrum frá velli Tottenham. Stuðningsmenn Tottenham voru ekki ánægðir með þetta og litu á þetta sem innrás inn í hverfi þeirra. Einnig líkaði þeim illa að talað var um Arsenal og Tottenham sem tvö frá Norður-London. Enn þann dag í dag segja sumir stuðningsmenn Tottenham að Arsenal sé ekki lið frá Norður-London og að Arsenal ætti að fara aftur til Woollett.

Einn eftirminnilegasti leikur liðanna var spilaður árið 1935 á heimavelli Tottenham. Arsenal vann leikinn 6-0 og er það stærsti sigur Arsenal á Tottenham hingað til.

Bikarar

Gamla enska 1. deild/Premier League

(13): 1930–31, 1932–33, 1933–34, 1934–35, 1937–38, 1947–48, 1952–53, 1970–71, 1988–89, 1990–91, 1997–98, 2001–02, 2003–04

FA-bikarinn

(14): 1929–30, 1935–36, 1949–50, 1970–71, 1978–79, 1992–93, 1997–98, 2001–02, 2002–03, 2004–05, 2013–14, 2014–15, 2016–17, 2019–20

EFL-bikarinn

(2) 1986–87, 1992–93

Samfélagsskjöldurinn

(17): 1930, 1931, 1933, 1934, 1938, 1948, 1953, 1991†, 1998, 1999, 2002, 2004, 2014, 2015, 2017, 2020, 2023