Hugverkastofan

Úr Wikipediu, frjálsa alfræðiritinu
Jump to navigation Jump to search
Merki Hugverkastofunnar. Merkið var hannað af Oscar Bjarna.
Merki Hugverkastofunnar

Hugverkastofan er opinber stofnun sem var sett á laggirnar (þá sem Einkaleyfastofan) 1. júlí 1991 og tók þá við hlutverki einkaleyfa- og vörumerkjadeildar iðnaðarráðuneytisins. Skipulag og starfssvið markast af auglýsingu nr. 187/1991 og reglugerð nr. 188/1991 og hún heyrir undir atvinnuvega- og nýsköpunarráðuneytið. Hlutverk stofnunarinnar er að fara með málefni varðandi einkaleyfi, vörumerki, hönnunarvernd, byggðarmerki og önnur hliðstæð réttindi sem kveðið er á um í lögum, reglugerðum og alþjóðasamningum um vernd eignarréttinda á sviði iðnaðar. Stofnuninni ber að veita einstaklingum, stofnunum og fyrirtækjum upplýsingar og ráðgjöf varðandi hugverkaréttindi í iðnaði. Þá ber stofnuninni að stuðla að því að ný tækni og þekking sem felst í skráðum hugverkaréttindum verði aðgengileg almenningi. Hugverkastofan er einnig opinber faggildingaraðili.

Þann 1. júlí 2019 tók Einkaleyfastofan upp nýtt nafn og heitir nú Hugverkastofan. Lög þess efnis voru samþykkt af Alþingi 2. maí 2019.

Enskt heiti Hugverkastofunnar er Icelandic Intellectual Property Office og notast er við skammstöfunina ISIPO í takt við aðrar hugverkastofur og alþjóðastofnanir á sviði hugverkaréttinda.

Á árinu 2018 tók stofnunin við 4.260 vörumerkjaumsóknum, 1.554 einkaleyfaumsóknum og 109 hönnunarumsóknum. Í lok árs voru í gildi 60.770 vörumerkjaskráningar, 7.522 einkaleyfi og 965 hönnunarskráningar á Íslandi.

Forstjóri Hugverkastofunnar er Borghildur Erlingsdóttir, lögfræðingur.

Tenglar[breyta | breyta frumkóða]

Hugverkastofan[1]

Tilvísanir[breyta | breyta frumkóða]

  1. „894/149 stjórnarfrumvarp: heiti Einkaleyfastofunnar“. Alþingi . Sótt 27. mars 2020.