Feneyjatvíæringurinn
Feneyjatvíæringurinn (eða Tvíæringurinn í Feneyjum) er umfangsmikil alþjóðleg myndlistarsýning helguð samtímalist sem er haldin annað hvert ár (var á oddatöluári en er nú á sléttri tölu vegna Covid) í Feneyjum. Tengd hátíðinni eru líka Kvikmyndahátíðin í Feneyjum og Sýning byggingarlistar í Feneyjum (Mostra di Architettura di Venezia). Tvíæringurinn hefur verið haldinn frá því 1895.
Árið 1907 hófu einstök ríki að reisa sérstaka sýningarskála í Giardini di Castello fyrir listamenn sína og nú eru þar um 30 varanlegir sýningarskálar. Noregur, Svíþjóð og Finnland sameinuðust um einn skála, Norræna skálann, sem Sverre Fehn hannaði árið 1962 en Danmörk var áður búin að reisa skála sem Carl Brummer teiknaði og sem Peter Koch síðar stækkaði. Ísland tók fyrst þátt árið 1960 með verkum Ásmundar Sveinssonar og Jóhannesar Kjarval og sýndi fyrst annaðhvort á alþjóðlegu sýningunni eða sem gestur í danska eða Norræna skálanum. Þegar Finnar ákváðu að taka þátt í Norræna skálanum 1984 tóku Íslendingar eldri timburskála þeirra á leigu. Skálann hannaði Alvar Aalto en honum var aðeins ætlað að standa tímabundið. Árið 2007 ákváðu Finnar að nota hann sjálfir og því sýndi Steingrímur Eyfjörð fyrir Íslands hönd í Palazzo Bianchi Michiel við Canal Grande það ár og Ragnar Kjartansson sýndi þar líka 2009. Árið 2011 sýndu Libia Castro og Ólafur Ólafsson í Palazzo Zenobio og það sama gerði Katrín Sigurðardóttir árið 2013.
Fulltrúar Íslands
[breyta | breyta frumkóða]- 1960 — Jóhannes Sveinsson Kjarval, Ásmundur Sveinsson
- 1972 — Svavar Guðnason, Þorvaldur Skúlason
- 1978 — Sigurður Guðmundsson
- 1980 — Magnús Pálsson
- 1982 — Jón Gunnar Árnason, Kristján Guðmundsson
- 1984 — Kristján Davíðsson
- 1986 — Erró
- 1988 — Gunnar Örn Gunnarsson
- 1990 — Helgi Þorgils Friðjónsson
- 1993 — Hreinn Friðfinnsson, Jóhann Eyfells
- 1995 — Birgir Andrésson
- 1997 — Steina Vasulka
- 1999 — Sigurður Árni Sigurðsson
- 2001 — Finnbogi Pétursson
- 2003 — Rúrí
- 2005 — Gabríela Friðriksdóttir
- 2007 — Steingrímur Eyfjörð (Sýningarstjóri: Hanna Styrmisdóttir)
- 2009 — Ragnar Kjartansson (myndlistarmaður) (Sýningarstjórar: Markús Thór Andrésson, Dorothée Kirch)
- 2011 — Libia Castro & Ólafur Ólafsson (myndlistamaður) (Sýningarstjóri: Ellen Blumenstein)
- 2013 — Katrín Sigurðardóttir (Sýningarstjóri: Mary Ceruti, Ilaria Bonacossa)
- 2015 — Christoph Büchel (Sýningarstjóri: Nína Magnúsdóttir)
- 2017 — Egill Sæbjörnsson (Sýningarstjóri: Stefanie Böttcher)
- 2019 - Hrafnhildur Arnardóttir (Sýningarstjóri: Birta Guðjónsdóttir)
- 2022 - Sigurður Guðjónsson (Enginn tvíæringur var 2021 vegna Covid)
Tenglar
[breyta | breyta frumkóða]
