Barack Obama
Barack Hussein Obama yngri (fæddur 4. ágúst 1961) er 44. forseti Bandaríkjanna og fyrrverandi fulltrúi Illinois í öldungadeild bandaríska þingsins. Obama sigraði bandarísku forsetakosningarnar árið 2008. Samkvæmt heimildum sögudeildar bandarísku öldungadeildarinnar er Barack fimmti blökkumaðurinn sem setið hefur í öldungadeildinni og sá fyrsti sem gegnt hefur embætti Bandaríkjaforseta. Kona hans er Michelle, fædd Robinson, og eiga þau dæturnar Malia Ann (f. 1998) og Natasha (f. 2001).
Efnisyfirlit |
[breyta] Forsetakosningar 2008
Þann 10. febrúar árið 2007 tilkynnti Obama að hann ætlaði að bjóða sig fram til þess að vera fulltrúi Demókrataflokksins í forsetakosningunum í Bandaríkjunum árið 2008. Aðalkeppinautur hans var Hillary Clinton. Barátta þeirra var löng og tvísýn framan af en eftir því sem á leið jókst forskot Baracks Obama og lauk með því að Hillary Clinton játaði sig sigraða.
Obama sigraði John McCain öldungadeildarþingmann í forsetakosningum 4. nóvember 2008. Hann var settur í embætti 20. janúar 2009. Varaforseti Obama er Joe Biden, öldungadeildarþingmaður.
[breyta] Æska og menntun
Barack Obama fæddist í Honolulu á Hawaii þann 4. ágúst 1961. Faðir hans, Barack Hussein Obama eldri var skiptinemi þar, en hann kom þangað frá Kenýu. Móðir hans, Ann Dunham, kom frá Kansas, nánar tiltekið frá stærstu borg fylkisins, Wichita. Þau voru gift frá 1961 til 1964. Faðir hans fór aftur til Afríku eftir að hafa lokið háskólaprófi og sá son sinn aðeins einu sinni eftir það þegar Barack var 10 ára gamall. Obama eldri fórst í bílslysi 1984.
Eftir skilnaðinn giftist Ann Dunham indónesískum manni, Lolo Soetoro, og bjuggu þau í Jakarta, þar sem Obama gekk í skóla til 10 ára aldurs. Árið 1971 sendi móðir hans hann til Honolulu á Hawaii til afa síns og ömmu, sem ólu hann upp eftir það. Ann skildi við Lolo Soetoro og bjó á Hawaii í 5 ár en fór þá aftur til Indónesíu og starfaði sem mannfræðingur. Hún greindist með krabbamein í legi og eggjastokkum árið 1994 og sneri þá aftur til Hawaii, þar sem hún dó 1995.
Obama lauk skyldunámi í Honolulu og fór eftir það til náms í Los Angeles í tvö ár og síðan til New York, þar sem hann lagði stund á stjórnmálafræði og alþjóðasamskipti við Columbia University og útskrifaðist þaðan 1983 með BA gráðu. Árið 1988 hóf hann nám við Harvard Law School og útskrifaðist með doktorspróf í lögfræði 1991 með miklum heiðri (magna cum laude). Eftir það fluttist hann til Chicago.
[breyta] Friðarverðlaun Nóbels
Obama hlaut friðarverðlaun Nóbels árið 2009.
[breyta] Tenglar
- Frægð og frami Baracks Obama; grein í Fréttablaðinu 2006
- Skrár af Hvíta húsinu fyrir frjálsa notkun undir Creative Commons leyfi
| Fyrirrennari: George W. Bush |
|
Eftirmaður: enn í embætti |
|||
