Björgvin Gíslason

Úr Wikipediu, frjálsa alfræðiritinu
Björgvin Gíslason
Björgvin Gíslason var valinn gítarleikari ársins 1976
Björgvin Gíslason var valinn gítarleikari ársins 1976
Upplýsingar
FæddurBjörgvin Gíslason
1951
Dáinn2024
StörfGítarleikari
HljóðfæriGítar
Öræfarokk - Björgvin Gíslason 1977.
Öræfarokk - Björgvin Gíslason 1977 - Bakhlið.
Glettur - Björgvin Gíslason 1981.
Örugglega - Björgvin Gíslason 1983.
Örugglega - Björgvin Gíslason 1983 - Bakhlið.
Magic Key - Náttúra 1972 - Textablað.
Náttúra 1970 - 1971 - Pétur Kristjánsson, Björgvin Gíslason, Sigurður Árnason, Sigurður Rúnar Jónsson og Rafn Haraldsson

Björgvin Gíslason (f. 4. september, 1951 d. 6. mars 2024) í Reykjavík var íslenskur tónlistarmaður.

Æviágrip[breyta | breyta frumkóða]

Björgvin fæddist í Reykjavík 4. september 1951 og ólst þar upp. Hann var í ýmsum hljómsveitum á unglingsárum sínum, þar á meðal Flamingó, Falcon, Zoo og Opus 4. Síðar lék hann meðal annars í hljómsveitunum Náttúra, Pelican, Paradís og Póker. Hann gaf einnig út nokkrar sólóplötur.

Björgvin var sjálflærður að mestu. Aðalhljóðfæri hans var gítar en hann lék einnig á fjölmörg önnur hljóðfæri, einkum indverskan sitar, píanó og hljómborð.[1]

Tónlistarferill[breyta | breyta frumkóða]

Árið 1967 gekk Björgvin til liðs við hljómsveitina Pops með þeim Pétri Kristjánssyni, Birgi Hrafnssyni og Ólafi Sigurðssyni. Pops náði nokkrum vinsældum og kom fram á einni lítilli plötu sem undirleikarar hjá Flosa Ólafssyni.

Náttúra[breyta | breyta frumkóða]

Árið 1969 var hljómsveitin Náttúra var stofnuð. Björgvin var þar sólógítarleikari og í hljómsveitinni voru auk hans Sigurður Árnason bassaleikari, Jónas R. Jónsson söngvari og þverflautuleikari og Rafn Haraldsson trommuleikari. Hljómsveitin varð strax óhemjuvinsæl á skemmtistöðum. Náttúra starfaði í fjórum útgáfum næstu ár og 1972 kom út stóra platan Magic Key. Kjölfestan í hljómsveitinni voru alla tíð þeir Björgvin og Sigurður bassaleikari, en þau sem komu og fóru þessi fjögur ár voru Sigurður Rúnar Jónsson hljómborðs- og fiðluleikari, Pétur Kristjánsson söngvari, Áskell Másson slagverksleikari, Jóhann G. Jóhannsson söngvari og gítarleikari, Shady Owens söngkona, Ólafur Garðarsson trommuleikari, og Karl Sighvatsson hljómborðsleikari.

Pelican[breyta | breyta frumkóða]

Vorið 1973 byrjaði stofnaði Pétur Kristjánsson nýtt rokkband, Pelican, með þeim Ásgeiri Óskarssyni, Ómari Óskarssyni, Jóni Ólafssyni og Björgvini. Hljómsveitin náði fljótt svipuðum vinsældum og Náttúra. Til að fylgja eftir frægðinni var farið í spilamennsku til Bandaríkjanna. Þar var tekin upp platan Uppteknir, sem jók enn vinsældirnar heima fyrir, og fljótlega fylgdi önnur stór plata, Lítil fluga, en skömmu síðar var hljómsveitin lögð niður.

Paradís[breyta | breyta frumkóða]

Hljómsveitin Paradís var reist úr rústum Pelican árið 1976. Söngvari var Pétur Kristjánsson og aðrir meðlimir Björgvin Gíslason, Ásgeir Óskarsson, Gunnar Hermannsson, Nikulás Róbertsson og Pétur Hjaltested. Þegar Paradís gaf út stóra plötu árið 1976 skrifaði Ásgeir Tómasson lofsamlega um hljóðfæraleikinn í dómi í Dagblaðinu en taldi textana innihaldslitla.[2]

Hljómsveitin Paradís hefur náð slíkum vinsældum hjá íslenskum táningum, að annað eins hefur ekki gerst síðustu árin síðan Hljómar og síðar Ævintýri voru og hétu. Það er því svo sannarlega mikill fengur fyrir þessa táninga að fá þessa fyrstu LP plötu hljómsveitarinnar í hendur. … Það er fyrst og fremst góður hljóðfæraleikur sem gerir þessa fyrstu LP plötu Paradísar að því sem hún er.

Öræfarokk og blús[breyta | breyta frumkóða]

Fyrsta sólóplata Björgvins, Öræfarokk, kom út hjá SG hljómplötum árið 1977. Hún fékk góða dóma hjá gagnrýnendum en fá eintök seldust. Gagnrýnandi Þjóðviljans, Jens Guðmundsson, skrifaði um plötuna í ágúst 1977 að hún væri það „athyglisverðasta sem út hefur komið það sem af er árinu“.[3]

Glettur[breyta | breyta frumkóða]

Önnur sólóplata Björgvins, Glettur, kom út hjá útgáfunni Steinar árið 1981.

Örugglega[breyta | breyta frumkóða]

Þriðja sólóplatan, Örugglega, kom út hjá útgáfunni Steinar árið 1983. Hljómplötugagnrýnandi DV TT skrifaði gagnrýni um plötuna í apríl 1983.

Slettur[breyta | breyta frumkóða]

Tvöfalda albúmið Slettur er sjötta og sjöunda sólóplata Björgvins og kom út 2015.

Björgvin hér og Björgvin þar[breyta | breyta frumkóða]

Þegar hljómsveitirnar Paradís og Póker ákváðu að freista gæfunnar í Bandaríkjunum sagði Björgvin skilið við þær og spilaði þá um tíma blús með blúsgoðsögninni Clarence "Gatemouth" Brown(en), meðal annars á tónleikaferðalagi 1981.[4]

Við þetta bættist dvöl í ýmsum hljómsveitum. Meðal þeirra voru Íslensk kjötsúpa, Das Kapital, Deild eitt, Frakkar, Friðryk, Þrír á palli, Aukinn þrýstingur, Mannakorn, Leikhúsband í Síldin kemur, síldin fer, Band með Megasi, Gömlu brýnin, KK Band, Hljómsveit Stefáns P., Blái fiðringurinn, Strákarnir og dúettinn VIÐ.

Afmælistónleikar[breyta | breyta frumkóða]

Björgvin Gíslason varð sextugur þann 4. september 2011. Af því tilefni hélt hann hátíðartónleika í Austurbæ (Austurbæjarbíói) sama dag. Tónlistarspekúlant Fréttablaðsins Trausti Júlíusson var á staðnum og sagði meðal annars þetta um tónleikana:[5]

Björgvin lék á als oddi. Hann ljómaði af gleði, sagði skemmtisögur á milli laga og fór að sjálfsögðu hamförum á gítarinn eins og honum er einum lagið. Þeir sem hafa séð til Björgvins á tónleikum vita að spilagleði og innlifun eru hans aðalsmerki. Hann er ótrúlega fær og lipur gítarleikari, en svipbrigðin og sviðstaktarnir eru líka órjúfanlegur partur af ímynd hans.

Útgefið efni[breyta | breyta frumkóða]

SG-hljómplötur[breyta | breyta frumkóða]

Breiðskífur

  • SG 105 - Björgvin Gíslason - Öræfarokk (1977)

Steinar[breyta | breyta frumkóða]

Breiðskífur

  • Steinar 051 - Björgvin Gíslason - Glettur (LP, 1981)
  • Steinar 065 - Björgvin Gíslason - Örugglega (LP, 1983)

CD

ÁÁ Records[breyta | breyta frumkóða]

Breiðskífur

  • ÁÁ 018 - Pelican - Uppteknir (LP, 1974)
  • ÁÁ 037 - Íslensk kjötsúpa - Íslensk kjötsúpa (LP, 1979)

45 snúninga

  • ÁÁ 017 - Pelican - Jenny darling // My glasses (7”, 1974)
  • ÁÁ 019 - Pelican - Time // Instrumental love song (7”, 1974)

Eigin útgáfa[breyta | breyta frumkóða]

Aðrar útgáfur[breyta | breyta frumkóða]

Breiðskífur

  • NTR 008 - Náttúra – Magic Key 1972
  • PEL 002 - Pelican – Lítil fluga 1975
  • PAR 002 - Paradís - Paradís 1976
  • SAF 001 - 1984 - Frakkar 1984

45 snúninga

CD

NET

  • bio - Björgvin Gíslason - 2001 (Sóló) - Kom út í 50 tölusettum eintökum fyrir fjölskylduna (var ókeypis á netinu).

Tilvísanir[breyta | breyta frumkóða]

  1. „ZOO“. www.bjorgvingislason.com. Sótt 5. janúar 2024.
  2. „Dagblaðið - 219. tölublað (01.10.1976) - Tímarit.is“. timarit.is. Sótt 5. janúar 2024.
  3. „Þjóðviljinn - 181. tölublað (20.08.1977) - Tímarit.is“. timarit.is. Sótt 5. janúar 2024.
  4. „1977-1981“. www.bjorgvingislason.com. Sótt 5. janúar 2024.
  5. „Fréttablaðið - 207. tölublað (06.09.2011) - Tímarit.is“. timarit.is. Sótt 5. janúar 2024.

Tenglar[breyta | breyta frumkóða]