Li Keqiang
- Þetta er kínverskt nafn: kenni- eða fjölskyldunafnið er Li, eiginnafnið er Keqiang.
| Li Keqiang | |
|---|---|
| 李克强 | |
_(cropped).jpg) Li Keqiang árið 2019. | |
| Forsætisráðherra Alþýðulýðveldisins Kína | |
| Í embætti 15. mars 2013 – 11. mars 2023 | |
| Forseti | Xi Jinping |
| Forveri | Wen Jiabao |
| Eftirmaður | Li Qiang |
| Persónulegar upplýsingar | |
| Fæddur | 1. júlí 1955 Hefei, Anhui, Kína |
| Látinn | 27. október 2023 (68 ára) Sjanghaí, Kína |
| Stjórnmálaflokkur | Kommúnistaflokkur Kína |
| Maki | Cheng Hong |
| Börn | 1 |
| Háskóli | Háskólinn í Peking |
| Starf | Stjórnmálamaður |
Li Keqiang (kínverska: 李克强; 1. júlí 1955 – 27. október 2023) var kínverskur stjórnmálamaður sem var forsætisráðherra Alþýðulýðveldisins Kína frá 2013 til 2023. Li var hagfræðingur að mennt[1] og var einn af helstu stjórnendum kínverskrar fjárhags-, utanríkis- og öryggisstefnu á ráðherratíð sinni. Hann var jafnframt næstráðandi í fastanefnd stjórnmálanefndar Kommúnistaflokks Kína, sem fer með æðstu völd í landinu. Li var einn af helstu leiðtogum „fimmtu valdakynslóðar“ Alþýðulýðveldisins ásamt aðalritaranum og forsetanum Xi Jinping.
Li komst til metorða með starfi sínu í ungliðahreyfingu Kommúnistaflokksins. Frá 1998 til 2004 var Li landstjóri Henan og flokksritari héraðsdeildar flokksins þar. Frá 2004 til 2007 var hann flokksritari í Liaoning, sem var æðsta stjórnmálaembætti héraðsins. Frá 2008 til 2013 var Li aðstoðarforsætisráðherra[2] í ríkisstjórn Wen Jiabao og fór fyrir ráðuneyti sem sneri meðal annars að fjárhagsþróun, verðstýringu, loftslagsbreytingum og þjóðhagfræðistjórn.
Vegna reynslu sinnar úr ungliðahreyfingunni var gjarnan litið á Li sem bandamann fyrrum flokksleiðtogans Hu Jintao. Li varð forsætisráðherra árið 2013 og stóð fyrir forgangsbreytingu kínversku stjórnarinnar úr áherslu á útflutningsþróun í aukna áherslu á neyslu innanlands. Li var einnig einn helsti hvatamaðurinn að „dýpkandi umbótum“ sem tilkynntar voru haustið 2013.
Eftir að Xi Jinping varð forseti Kína var Li Keqiang eini meðlimurinn í flokksráði Kommúnistaflokksins sem ekki var í innsta hring Xi. Li tapaði sæti sínu í fastanefnd stjórnmálanefndar flokksins í október 2022 og var leystur af hólmi sem forsætisráðherra af bandamanni Xi, Li Qiang, í mars næsta ár.[3][4]
Li Keqiang lést úr skyndilegu hjartaáfalli í Sjanghaí þann 27. október 2023, innan við ári eftir að hann lét af embætti forsætisráðherra.[5]
Tilvísanir
[breyta | breyta frumkóða]- ↑ „Staðfestu skipun Li Keqiang í embætti forsætisráðherra Kína“. Vísir. 23. október 2013. Sótt 23. október 2018.
- ↑ „Umbætur mega ekki bíða“. Morgunblaðið. 19. mars 2012. bls. 14.
- ↑ Atli Ísleifsson (27. október 2023). „Fyrrverandi forsætisráðherra Kína látinn“. Vísir. Sótt 27. október 2023.
- ↑ „Náinn bandamaður Xi verður forsætisráðherra“. mbl.is. 11. mars 2023. Sótt 14. mars 2023.
- ↑ „Fyrrverandi forsætisráðherra Kína látinn“. mbl.is. 27. október 2023. Sótt 27. október 2023.
| Fyrirrennari: Wen Jiabao |
|
Eftirmaður: Li Qiang | |||
Forsætisráðherrar Alþýðulýðveldisins Kína | ||
|---|---|---|
 | ||