Vigdís Hauksdóttir

Vigdís Hauksdóttir (VigH)
Fæðingardagur:	20. mars 1965 (1965-03-20)
Fæðingarstaður:	Selfoss
8. þingmaður Reykjavíkurkjördæmis suður
Flokkur:	Framsóknarflokkurinn
Nefndir:	Stjórnskipunar- og eftirlitsnefnd
Þingsetutímabil
2009-2016	í Reykv. s. fyrir Framsfl.
✽ = stjórnarsinni
Tenglar
Æviágrip á vef Alþingis – Vefsíða

Vigdís Hauksdóttir (f. 20. mars 1965) er íslenskur lögfræðingur, fyrrverandi þingmaður Reykjavíkurkjördæmis suður fyrir Framsóknarflokkinn og fyrrverandi formaður fjárlaganefndar. Hún var einnig ritari þingflokks Framsóknarmanna og formaður Heimssýnar-hreyfingar sjálfstæðissinna í Evrópumálum. Vigdís sat í miðstjórn Framsóknarflokksins um árabil og gegndi ýmsum trúnaðarstörfum fyrir flokkinn en eftir klofning flokksins með úrsögn Sigmundar Davíðs Gunnlaugssonar úr honum gekk hún í Miðflokkinn og situr nú sem borgarstjórnarfulltrúi flokksins í Reykjavík.

Vigdís er af mörgum talin umdeildur stjórmálamaður. Hún hefur lýst sjálfri sér sem hægrisinnaðri og er jafnvel sögð íhaldsöm. Vigdís er almennt mótfallin ríkisafskiptum og vill draga úr bótagreiðslum í íslenska velferðarkerfinu. Hún er mótfallin aðild Íslands að ESB í samræmi við samþykktir Framsóknarflokksins og Miðflokksins. Vigdís hefur stutt lækkun framlags Íslendinga til þróunarsamvinnu.

Ævi

Vigdís fæddist á Selfossi og er dóttir Hauks Gíslasonar, bónda á Stóru-Reykjum í Hraungerðishreppi, og Sigurbjargar Geirsdóttur. Vigdís starfaði í Blómavali 1984–1991 og var jafnframt fyrsti fagdeildarstjóri og kennari við blómaskreytingabraut Garðyrkjuskóla ríkisins á Reykjum í Ölfusi 1988–1991. Hún var eigandi Blómabúðar Reykjavíkur, Hótel Sögu, 1991–1995 og verslunarinnar Jóns Indíafara í Kringlunni 1995–1997.

Vigdís starfaði sem aðstoðarkennari í skattarétti við viðskiptadeild Háskólans á Bifröst 2008 og sem lögfræðingur hjá Alþýðusambandi Íslands frá 2008 þar til hún bauð sig fram til Alþingis árið 2009.

Þingstörf

Vigdís var kosin í Alþingiskosningar 2009. Snemma á þingferli hennar kom það nokkrum sinnum fyrir að Vigdís mismælti sig eða fór rangt með málshætti. Fyrir vikið beindist nokkur athygli að henni. Meðal annars birti fjölmiðlamaðurinn Egill Helgason myndband þar sem búið var að klippa saman nokkur slík atriði. Landsstjórn Landssambands framsóknarkvenna ályktaði af því tilefni að Egill legði Vigdísi í einelti sem væri sérlega slæmt þar sem hann væri starfsmaður Ríkisútvarpsins og ætti hann að láta af því og biðja Vigdísi afsökunar. Í viðtali í blaðinu Fréttatímann í byrjun árs 2013 sagði Vigdís að sér þætti stundum erfitt að lesa athugasemdir sums fólks í sinn garð á opinberum vettvangi, sér í lagi þar sem barnsfaðir hennar dó um þetta leyti: „Fólk áttar sig ekki á því að á bak við hverja manneskju er heimilislíf og tilfinningar“ sagði hún.

Þann 13. mars 2012 setti Vigdís skilaboð á Facebook-vef sínum af lokuðum vinnufundi Alþingis og taldi forseti þingsins að hún hefði þar með brotið þingsköp. Vigdís mótmælti þessum úrskurði forseta þingsins þar sem hún taldi sig hvorki hafa vitnað beint í gest nefndarinnar né nefndarmann.

Borgarfulltrúi

Vigdís var oddviti Miðflokksins í Reykjavík í sveitarstjórnarkosningunum árið 2018. Hún náði kjöri ein Miðflokksmanna.

Tengill

• Æviágrip Alþingis
• Heimasíða Vigdísar
• Magnús Halldórsson. (12. desember 2013) Bjartsýn á að landið taki að rísa. Kjarninn. Skoðuð 14. desember 2020
• Leggja má niður eftirlitsstofnanir: Hafa brugðist sínu hlutverki, en þó þarf að halda Fjármálaeftirlitinu Geymt 2013-03-04 í Wayback Machine, Dv.is 6. júlí 2012
• Látlaus gagnrýni Vigdísar á embættismenn