Robert F. Kennedy

Robert F. Kennedy
Robert F. Kennedy árið 1964.
Öldungadeildarþingmaður fyrir New York
Í embætti 3. janúar 1965 – 6. júní 1968
Dómsmálaráðherra Bandaríkjanna
Í embætti 21. janúar 1961 – 3. september 1964
Persónulegar upplýsingar
Fæddur	20. nóvember 1925 Brookline, Massachusetts, Bandaríkjunum
Látinn	6. júlí 1968 (42 ára) Los Angeles, Kaliforníu, Bandaríkjunum
Þjóðerni	Bandarískur
Stjórnmálaflokkur	Demókrataflokkurinn
Maki	Ethel Skakel ​(g. 1950)
Trúarbrögð	Kaþólskur
Börn	11
Háskóli	Harvard-háskóli (BA) Virginíuháskóli (LLB)
Starf	Stjórnmálamaður
Undirskrift

Robert Francis Kennedy eða Bobby Kennedy, einnig þekktur sem RFK (20. nóvember 1925 — 6. júní 1968) var bandarískur stjórnmálamaður, dómsmálaráðherra og forsetaframbjóðandi. Hann var yngri bróðir Johns F. Kennedy Bandaríkjaforseta og gegndi embætti dómsmálaráðherra í ríkisstjórn hans á árunum 1961 til 1964. Hann var einn af nánustu samstarfsmönnum forsetans og einn helsti ráðgjafi hans í Kúbudeilunni. Hans er minnst fyrir framlag sitt til réttindabaráttu afrískættaðra Bandaríkjamanna á 6. og 7. áratug 20. aldar.

Kennedy gegndi embætti dómsmálaráðherra undir forsæti Lyndons B. Johnson í níu mánuðu eftir morðið á bróður hans, John F. Kennedy. Hann lét af starfi í september 1964 og varð fulltrúi New York-fylkis á öldungadeild Bandaríkjaþings í nóvember sama ár. Hann var ósammála Johnson um Víetnamstríðið og ýmislegt annað.

Árið 1968 tilkynnti Kennedy að hann sæktist eftir tilnefningu Demókrataflokksins til framboðs í forsetakosningum sama ár. Kennedy var skotinn í eldhúsi Ambassador-hótelsins í Los Angeles, skömmu eftir að hann hafði tilkynnt sigur sinn í undankosningunum í Kaliforníu þann 5. júní 1968 og lést hann daginn eftir.

Stuttu eftir dauða Kennedy var palestínskur innflytjandi að nafni Sirhan Sirhan handtekinn fyrir morðið. Sirhan játaði á sig morðið og var dæmdur til dauða árið 1969 en dómnum var síðar breytt í lífstíðarfangelsi. Sirhan Sirhan hafði verið stuðningsmaður Kennedy en hafði snúist gegn honum þar sem hann hafði þótt hallur undir Ísraelsríki og hafði átt þátt í sölu 50 orrustuþota til Ísraela.