Björn Ingi Hrafnsson

Björn Ingi Hrafnsson (f. 5. ágúst 1973) er aðstoðarmaður formanns Miðflokksins, Sigmundar Davíðs Gunnlaugssonar.

Björn er fyrrum fjölmiðlamaður, útgefandi og stjórnarformaður Vefpressunnar sem átti hluti í fjölda fjölmiðla. Fjölmiðlaveldi hans sligaðist þó undan skuldum og var tekið til gjaldþrotaskipta árið 2017. Hann er einnig fyrrverandi borgarfulltrúi Framsóknarflokksins í Reykjavík, var aðstoðarmaður forsætisráðherra og aðstoðarmaður utanríkisráðherra og umsjónarmaður sjónvarpsþáttarins Eyjunnar. Hann rak fréttamiðilinn Viljann.

Ævi

Björn Ingi fæddist í Hveragerði og ólst þar upp, en einnig á Flateyri, Akranesi og í Reykjavík. Foreldrar hans eru Hrafn Björnsson (f. 1945) og Björk Gunnarsdóttir (f. 1948). Árið 2001 kvæntist Björn Ingi Hólmfríði Rós Eyjólfsdóttur hjúkrunarfræðingi (f. 1976) og eiga þau tvo syni. Seinni eiginkona Björns Inga er Kolfinna Von Arnardóttir og eiga þau tvö börn. Björn Ingi er stúdent frá Menntaskólanum við Hamrahlíð árið 1993. Eftir það starfaði hann við fjölmiðla og víðar, og nam sagnfræði við Háskóla Íslands, án þess þó að ljúka prófi.

Starfsferill

Björn var þingfréttaritari Morgunblaðsins til 2002, þegar hann gerðist skrifstofustjóri þingflokks Framsóknarflokksins, sem hann var til 2003. Árin 2002-2004 var hann varaformaður Varðbergs, samtaka um vestræna samvinnu. Sama ár tók hann sæti í miðstjórn SUF frá 2002, og 2003 varð hann aðstoðarmaður Halldórs Ásgrímssonar, utanríkisráðherra 2003-2004 sem síðar varð forsætisráðherra 2004-2006. Árin 2003-2005 var Björn stjórnarformaður Þróunarsamvinnustofnunar Íslands. Kjörtímabilið 2003-2007 var Björn í 2. sæti á lista Framsóknarflokksins í Reykjavíkurkjördæmi suður og var því varaþingmaður Jónínu Bjartmarz.

Deilur um Orkuveitu Reykjavíkur

Aðalgrein: Deilur um Orkuveitu Reykjavíkur, október 2007

Fyrir sveitarstjórnarkosningar á Íslandi 2006 bar hann sigurorð af Óskari Bergssyni og Önnu Kristinsdóttur í prófkjöri. Náði hann í kjölfarið kjöri sem eini borgarfulltrúi Framsóknarflokksins, með 6% atkvæða þvert á allar skoðanakannanir.^{[heimild vantar]} Myndaði hann borgarstjórnarmeirihluta með Sjálfstæðisflokknum, sem hélt til 11. október 2007, þegar hann sleit samstarfinu eftir harðar deilur um Orkuveitu Reykjavíkur, Geysi Green Energy og Reykjavik Energy Invest. Meðan á þeirri samvinnu stóð var Björn formaður borgarráðs, varaforseti borgarstjórnar, formaður Íþrótta- og tómstundaráðs, stjórnarformaður Faxaflóahafna og varaformaður stjórnar Orkuveitu Reykjavíkur.

Þann 24. janúar 2008 sagði Björn af sér sem borgarfulltrúi og við tók Óskar Bergsson. Vikuna sem á undan var gengin var Björn harðlega gagnrýndur af samflokksmanninum Guðjóni Ólafi Jónssyni, fyrrverandi þingmanni, vegna fatakaupa fyrir borgarstjórnarkosningarnar 2006. Björn Ingi kvaðst í tilkynningu ekki lengur geta starfað undir slíkum kringumstæðum og að Framsóknarflokkurinn þyrfti að hætta eilífum innanflokkserjum, ætlaði hann sér forystuhlutverk í íslenskum stjórnmálum.

Björn Ingi var ráðinn ritstjóri Markaðarins, viðskiptarits Fréttablaðsins, og yfirmaður viðskiptaumfjöllunar Stöðvar 2 í apríl 2008. Hann hætti síðar störfum hjá 365 miðlum, til að stofna vefritið Pressuna.

Í maí 2010 var hann kjörinn formaður Íþróttafélags Reykjavíkur.

Björn Ingi hefur skrifað þrjár bækur, þar af eina rafbók. Fram í sviðsljósið, Barist fyrir frelsinu og rafbók um upphaf kvikmyndasýninga á Íslandi.

Ritstörf

• Björn Ingi Hrafnsson: Fram í sviðsljósið - Endurminningar Halldórs G. Björnssonar, Mál og menning, Reykjavík 2001, ISBN 9979-3-2257-8.
• Björn Ingi Hrafnsson: Barist fyrir frelsinu - áhrifamikil saga Guðríðar Örnu Ingólfsdóttur og Hebu Shahin og ævintýralegur flótti þeirra frá Egyptalandi, Vaka-Helgafell, Reykjavík 2002, ISBN 9979-2-1652-2 (innbundin) og 9979216921 (óinnbundin).

Heimildir

• Æviágrip á bloggi Björns Inga
• Mbl.is: Vilhjálmur: Ákvörðun Björns Inga um samstarfsslit fyrirvaralaus
• Mbl.is: Björn Ingi: Handsalaði ekki samkomulag um áframhaldandi samstarf
• Mbl.is: Vilhjálmur: Vorum að nálgast niðurstöðu
• Mbl.is: Vilhjálmur verður borgarstjóri fram á þriðjudag
• Mbl.is: „Fyrrum minnihluti bjargaði Birni Inga fyrir horn"
• Yfirlýsing Björns Inga um afsögn úr borgarstjórn Geymt 14 mars 2008 í Wayback Machine

Tenglar

• Heimasíða Björns Inga Hrafnssonar Geymt 12 október 2007 í Wayback Machine
• „Leið Björns Inga til áhrifa“; grein af Stundinni 2015
• „Tilfinningaríkur kjarkmaður“; grein í DV 2007
• „Krónprins Framsóknar“; grein í Fréttablaðinu 2007