Orkuveita Reykjavíkur

Úr Wikipediu, frjálsa alfræðiritinu
Stökkva á: flakk, leita
Orkuveita Reykjavíkur
Vincent Willem van Gogh 034.jpg
Rekstrarform Sameignarfélag
Slagorð Óþekkt
Hjáheiti Óþekkt
Stofnað Fáni Íslands Reykjavík, Íslandi (1999)
Staðsetning Reykjavík, Íslandi
Lykilmenn Bjarni Bjarnason (forstjóri)

Haraldur Flosi Tryggvason (stjórnarformaður)

Starfsemi Hitaveita, vatnsveita, raforka, fráveita og gagnaflutningar
Heildareignir Óþekkt
Tekjur Óþekkt
Hagnaður f. skatta Óþekkt
Hagnaður e. skatta Óþekkt
Eiginfjárhlutfall Óþekkt
Móðurfyrirtæki Óþekkt
Dótturfyrirtæki Óþekkt
Starfsmenn 420 (2015)
Vefsíða www.or.is

Orkuveita Reykjavíkur er íslenskt sameignarfyrirtæki í eigu Reykjavíkurborgar, Akranesbæjar og Borgarbyggðar. Orkuveitan starfar á grundvelli laga nr. 139/2001 um stofnun sameignarfyrirtækis um Orkuveitu Reykjavíkur. Kjarnastarfsemi Orkuveitunnar felst í rekstri rafveitu, hitaveitu, vatnsveitu og fráveitu.

Auk þess annast dótturfélög framleiðslu og sölu á rafmagni (Orka náttúrunnar) og rekstur ljósleiðara (Gagnaveita Reykjavíkur).

Skipulag[breyta | breyta frumkóða]

OR er sameignarfélag í eigu þriggja sveitarfélaga; Reykjavíkurborgar (94%), Akraneskaupstaðar (5%) og Borgarbyggðar (1%). Framkvæmdastjórar sveitarfélaganna; borgarstjórinn í Reykjavík, bæjarstjórinn á Akranesi og sveitarstjóri Borgarbyggðar, fara með atkvæði þeirra á aðalfundi. Haraldur Flosi Tryggvason er stjórnarformaður Orkuveitu Reykjavíkur. Aðrir stjórnarmenn eru Brynhildur Davíðsdóttir varaformaður, Gylfi Magnússon, Kjartan Magnússon, Áslaug Friðriksdóttir og Valdís Eyjólfsdóttir. Björn Bjarki Þorsteinsson er áheyrnarfulltrúi Borgarbyggðar. Ný stjórn var kosin af sveitarstjórnum eigenda OR í júní 2014.

Forstjóri Orkuveitunnar er Bjarni Bjarnason og framkvæmdastjórar móðurfélagsins eru þrír: Ingvar Stefánsson, framkvæmdastjóri fjármála, Skúli Skúlason, framkvæmdastjóri þjónustu, og Hildigunnur Thorsteinsson, framkvæmdastjóri þróunar.

Forstjórar Orkuveitunnar frá upphafi:[breyta | breyta frumkóða]
  • Guðmundur Þóroddsson, 1999-2008 (en í leyfi vegna starfa fyrir Reykjavík Energy Invest frá hausti 2007).
  • Hjörleifur Kvaran 2008-2010 (og leysti áður Guðmund Þóroddsson af frá 2007).
  • Helgi Þór Ingason, ágúst 2010-febrúar 2011 (ráðinn til bráðabirgða).
  • Bjarni Bjarnason, síðan í febrúar 2011.

Starfsemi[breyta | breyta frumkóða]

Hitaveita[breyta | breyta frumkóða]

Á höfuðborgarsvæðinu rekur Orkuveitan stærstu jarðhitaveitu í heimi auk smærri veitna á sunnan- og vestanverðu landinu. Stærsta uppspretta vatns í hitaveiturnar er Nesjavallavirkjun, sem hefur 300 MW varmaafl. Í fjölda lághitasvæða, þar sem Reykjadalur í Mosfellsbæ telur mest, eru sótt 600 MW afls og í Hellisheiðarvirkjun eru framleidd 133 MW af heitu vatni.

Rafveita[breyta | breyta frumkóða]

Raforkudreifing Orkuveitunnar nær til liðlega helmings landsmanna í fimm sveitarfélögum við Faxaflóa; Reykjavík, Kópavogi, Mosfellsbæ, Akranesi og Garðabæ.

Vatnsveita[breyta | breyta frumkóða]

Orkuveita Reykjavíkur rekur 13 vatnsveitur á starfssvæði sínu auk þess að selja neysluvatn í heildsölu til tveggja að auki, samtals til meira en helmings þjóðarinnar.

Fráveita[breyta | breyta frumkóða]

Orkuveitan á fráveitur í sex byggðarlögum og rekur dælustöðvar fyrir tvö sveitarfélög til viðbótar. Alls þjónar Orkuveitan liðlega helmingi þjóðarinnar í fráveitumálum.

Saga[breyta | breyta frumkóða]

Orkuveita Reykjavíkur var stofnuð 1. janúar 1999, með sameiningu Rafmagnsveitu Reykjavíkur og Hitaveitu Reykjavíkur. Rafmagnsveita Reykjavíkur var stofnuð árið 1921, en Hitaveita Reykjavíkur varð að sjálfstæðu fyrirtæki árið 1946. Árið 2000 sameinaðist Vatnsveita Reykjavíkur Orkuveitunni, en vatnsveitan tók til starfa 16. júní 1909. Guðmundur Þóroddsson, fyrrverandi vatnsveitustjóri, var ráðinn fyrsti forstjóri Orkuveitunnar.

Þann 1. maí 2000 tók Orkuveitan við rekstri Hitaveitu Þorlákshafnar. Um áramótin 2001-2002 sameinuðust veiturnar á Akranesi og hitaveiturnar í Borgarbyggð og Borgarfjarðarsveit Orkuveitu Reykjavíkur. Þá bættist hitaveitan á Bifröst við fyrirtækið. Jafnframt var Orkuveitunni breytt úr borgarfyrirtæki í sameignarfyrirtæki og voru eigendurnir Reykjavíkurborg, Akraneskaupstaður, Hafnarfjörður, Garðabær, Borgarbyggð og Borgarfjarðarsveit. Garðabær seldi sinn hlut í fyrirtækinu í árslok 2002.

Á árinu 2004 sameinuðust Austurveita, Hitaveita Hveragerðis og Ölfusveita Orkuveitunni. Í byrjun ársins 2006 sameinuðust fráveitur Reykjavíkur, Akraness, Borgarbyggðar og Borgarfjarðarsveitar Orkuveitu Reykjavíkur.

Deilur í október 2007[breyta | breyta frumkóða]

Í október 2007 spunnust miklar deilur um fyrirhugaða sölu á eignarhlut Orkuveitunnar í Reykjavik Energy Invest, og lyktaði þeim með því að borgarstjórnarmeirihluti Framsóknarflokks og Sjálfstæðisflokksins féll.

Dótturfélög[breyta | breyta frumkóða]

Dótturfélög Orkuveitunnar eru fimm: OR - Veitur, OR - Vatns- og fráveita, Orka náttúrunnar, Gagnaveita Reykjavíkur og OR - Eignir. Í ársbyrjun 2014 komu til framkvæmda ákvæði raforkulaga nr. 65/2003 sem kveða á um fyrirtækjaaðskilnað sérleyfis- og samkeppnistarfsemi. Samstæðu Orkuveitu Reykjavíkur var breytt í kjölfarið og stofnuð voru dótturfélög um einstaka starfsþætti Orkuveitunnar.

Orkuveita Reykjavíkur - Veitur ohf.[breyta | breyta frumkóða]

Uppbygging og rekstur veitukerfa. Framkvæmdastjóri er Inga Dóra Hrólfsdóttir.

Orkuveita Reykjavíkur - Vatns- og fráveita sf.[breyta | breyta frumkóða]

Uppbygging og rekstur lögbundinnar veituþjónustu sveitarfélaga.

Orka náttúrunnar[breyta | breyta frumkóða]

Eignarhald og rekstur jarðvarmavirkjana á Hellisheiði og Nesjavöllum og vatnsaflsvirkjana í Andakíl og Elliðaám. Auk rafmagnsframleiðslu sjá jarðvarmavirkjanirnar höfuðborgarbúum fyrir heitu vatni. Framkvæmdastjóri er Páll Erland.

Gagnaveita Reykjavíkur[breyta | breyta frumkóða]

Uppbygging og rekstur Ljósleiðarans, háhraða gagnaflutningskerfi.

Höfuðstöðvar[breyta | breyta frumkóða]

Höfuðstöðvar Orkuveitu Reykjavíkur eru að Bæjarhálsi 1 í Reykjavíki og fluttust þangað 23. apríl 2003 frá Suðurlandsbraut 34. Samkeppni var haldin um hönnun nýju höfuðstöðvanna og hlutu Hornsteinar og Teiknistofa Ingimundar Sveinssonar þar fyrstu verðlaun.

Kostnaður við byggingu höfuðstöðvanna fór talsvert fram úr áætlun og nam heildarkostnaður um 5.800 milljónum króna samkvæmt Morgunblaðinu, en 1.800 milljónir fengust fyrir sölu fyrri höfuðstöðva fyrirtækjanna sem voru sameinuð í Orkuveitunni.

Heimildir[breyta | breyta frumkóða]

Tengill[breyta | breyta frumkóða]