Ólafur Egill Egilsson

Ólafur Egill Egilsson
Fæddur	12. október 1977
Maki	Esther Talia Casey
Foreldrar	Egill Ólafsson Tinna Gunnlaugsdóttir

Ólafur Egill Egilsson (fæddur 12. október 1977) er leikari og leikstjóri, handritshöfundur og leikskáld, sonur Egils Ólafssonar og Tinnu Gunnlaugsdóttur.

Ólafur lék sitt fyrsta hlutverk í sjónvarpsmyndinni Silfurtunglið 1979. Hann útskrifaðist úr Leiklistardeild Listaháskólans vorið 2002 og hefur starfað með leikhópunum Vesturporti, Frú Emelíu og hjá Leikfélagi Reykjavíkur, Leikfélagi Akureyrar og Þjóðleikhúsinu. Lengst af sem leikari en einnig sem leikstjóri og leikskáld. Ólafur hlaut Grímuverðlaun fyrir besta leik í aðalhlutverki 2005 og besta leik í aukahlutverki 2015. Ólafur var valinn Leikskáld ársins 2012 fyrir leikgerð sína á bók Auðar Jónsdóttur Fólkið í Kjallaranum. Leiksýningin 9líf sem Ólafur bæði skrifaði og leikstýrði var valin Sýning ársins 2022 auk þess að slá öll aðsóknarmet í íslensku leikhúsi en leiknar voru 250 sýningar fyrir tæplega 140.000 áhorfendur. Ólafur skrifaði einnig handrit sýningarinnar Elly, sem sömuleiðis var leikin fyrir metfjölda áhorfenda, sýningar urðu 253, en áhorfendur 120.000 þar sem sýningar hófust á nýja sviði Borgarleikhússins áður en sýningin var færð yfir á stóra svið leikhússins. Meðal annara verka eru Ásta, leikverk um Ástu Sigurðardóttur listakonu sem sýnt var í Þjóðleikhúsinu árið 2023, Karitas 2014, líka í Þjóðleikhúsinu. Fólkið í kjallaranum 2010 í Borgarleikhúsinu og Brot úr hjónabandi 2016, líka í Borgarleikhúsinu.

Ólafur Egill lék eitt af aðalhlutverkum í kvikmynd Þráins Bertelssonar Einkalíf (1996) og í kvikmyndunum Brúðguminn (2008) og Brim (2010) og söng með rokkhljómsveitinni Niður frá 1995 til 1997. Ólafur skrifaði handrit kvikmyndanna Brúðguminn, Brim, Eiðurinn, Sumarlandið og Kona fer í stríð. Fyrir handritið að Kona fer í stríð unnu Ólafur og meðhöfundur hans og leikstjóri kvikmyndarinnar Benedikt Erlingsson SACD verðlaunin á kvikmyndahátíðinni í Cannes, Kvikmyndaverðlaun Norðurlandaráðs auk hinna íslensku Edduverðlauna.

Ólafur er meðhöfundur fyrstu þáttaraðar sjónvarpsseríunnar Ófærð. Hann var sömuleiðis í höfundateymi sjónvarpsseríunnar Katla og skrifaði ásamt Benedikt Erlingssyni sjónvarpsseríuna Danska konan sem sýnd var í Ríkissjónvarpinu 2026.

Tengill

• Ólafur Egill Egilsson á Internet Movie Database

  Þetta æviágrip sem tengist leikurum og Íslandi er stubbur. Þú getur hjálpað til með því að bæta við greinina.