Quarashi

Quarashi
Uppruni	Reykjavík, Íslandi
Ár	1996–2005, 2016–í dag
Stefnur	Rapp
Útgáfufyrirtæki	Sony Lax Pop Músík Japis Sproti Columbia Time Bomb Skífan Dennis
Meðlimir	Höskuldur Ólafsson Sölvi Blöndal Egill Ólafur Thorarensen Steinar Orri Fjeldsted Ómar Örn Hauksson

Quarashi er íslensk rapp/hip hop hljómsveit frá Reykjavík. Hún er þekkt í Bandaríkjunum, Íslandi og Japan. Hljómsveitin hefur auk þessara landa farið í tónleikaferðalag til Ástralíu og Kanada. Meðlimir sveitarinnar samanstanda af þremur röppurum, þeim Höskuldi Ólafssyni, talsmanns sveitarinnar, Omar Swarez (Ómar Örn Hauksson) og Steina (Steinar Orri Fjeldsted) ásamt Sölva Blöndal sem útsetningarstjóri, hljómborðsleikari, slagverksleikari og trommari.

Í beinum útsendingum slógust í hópinn gítarleikari (Smári „Tarfur“ Jósepsson, kom seinna í staðinn fyrir Viðar Hákon Gíslason), Gaukur Úlfarsson bassaleikari, og plötusnúðurinn (DJ Dice, sem var síðar skipt út fyrir DJ Magic).

Quarashi hefur gefið út fimm breiðskífur og heita þær Quarashi (sem kom út 1997), Xeneizes (kom út árið 1999), Jinx (kom út árið 2002), Kristnihald undir jökli (kom út árið 2001) og Guerilla disco (kom út árið 2004). Árið 2009 var Platan Demos & B-Sides gefin út á síðunni quarashimusic.blogspot.com sem inniheldur Mess It Up, Orð Morð og fleiri lög sem ekki hafa komið út á breiðskífum sveitarinnar. Demos & B-Sides inniheldur einnig tónleika upptökur af nokkrum lögum.

Meðlimir

Núverandi

• Höskuldur Ólafsson (Hössi) - Söngur
• Egill Ólafur Thorarensen (Tiny) - Söngur
• Ómar Örn Hauksson (Ómar Swarez) - Söngur
• Steinar Orri Fjeldsted (Steini) - Söngur
• Sölvi Blöndal - Trommur/Hljómborð

Fyrrverandi

• Gísli Þorgeirsson (Gísli Galdur) - Plötusnúður
• Bjössi Ingimundarson (DJ Dice) - Plötusnúður
• Gaukur Úlfarsson - Bassi
• Smári Jósepsson (Tarfur) - Gítar
• Hrannar Ingimarsson - Hljóðblöndun/Gítar/Hljómborð
• Margrét Kristín Blöndal (Magga Stína) - Söngur
• Viðar Hákon Gíslason - Bassi/Gítar
• Richard Oddur Hauksson - Plötusnúður

Saga

Sölvi og Ómar hittust þegar að þeir voru krakkar í mótmælum gegn herstöð Bandaríkjanna í Keflavík, á Íslandi. Sölvi hitti Steina á vettvangi hjólabrettana og Höskuld í Háskóla Íslands. Steini var á þessum tíma þekktur fyrir hjólabrettaiðkun og hafði unnið nokkrar keppnir. Steini var kallaður Quarashi sem hjólabrettakappi og nafn hljómsveitarinnar kemur þaðan. Quarashi þýðir jafnframt ofurnáttúrulegur á arabísku. Upphaflega átti Höskuldur að vera söngvari, en eftir að Sölvi heyrði Höskuld rappa var planinu breytt og hljómsveitin var með þrjá rappara. Stuttu eftir stofnun hljómsveitarinnar, 29. Nóvember 1996 gaf hljómsveitin út sína fyrstu smáskífu, Switchstance undir plötufyrirtæki Sölva, Lax Records.

Ári síðar gaf sveitin út sýna fyrstu breiðskífu, samnefnda hljómsveitinni, 13. október 1997. Richard Oddur Hauksson var með hljómsveitinni við tökur plötunnar sem plötusnúður. Lög Quarashi frá smáskífunni Switchstance er að finna á breiðskífunni Quarashi, mikið breytt. Tónlistarstefna plötunnar og Quarashi er nútímarapp. Textasmíði hljómsveitarmannana Steina og Höskuldar eru mismunandi. Hössi er sögumaður, en Steini spáir í yfirnáttúrulegum hlutum og félögum sínum. Sölvi semur síðan lög hljómsveitarinnar. Hljómsveitin er jafnframt með plötunni fyrsta íslenska hljómsveitin sem rappar undir rapptónlist. Vinsældir plötunnar Quarashi voru miklar á Íslandi, hún seldist í 6.000 eintökum og er svokölluð gullplata. Quarashi fór í tónleikarferð yfir allt Ísland og var opnunarband The Fungees og The Prodigy.

Á næstu árum fór Sölvi í ferðalag til Suður Ameríku. Sú ferð hafði mikil áhrif á næstu plötu sveitarinnar, Xeneizes. Nafn plötunnar kemur frá áhorfendafélagi Argentínska fótboltafélagsins Boca Juniors. Platan var gefin út 25. október 1999. Platan varð önnur gullplata Quarashi og fékk mikla athygli frá Bandaríkjunum og Bretlandi, þrátt fyrir að hljómsveitin hafði aldrei leitað til erlendra útgáfufyrirtækja. Nokkur Bresk útgáfufyrirtæki sýndu plötunni áhuga, en Quarashi hafnaði þeim öllum.

Frægð í Bandaríkjunum

Hljómsveitin var með samning við Bandaríska útgáfufyrirtækið Time Bomb Recordings. Quarashi voru aldrei jafn vinsælir í Bandaríkjunum eins og í Japan eða Íslandi. Þeir tóku þó þátt í herferð MTV2 og tímaritið Spin nefndi Quarashi sem áhugaverða hljómsveit, árið 2002. Lagið Stick ´Em up hljómaði í kvikmyndinni Orange County og þáttunum Alias og Smallville. Quarashi tók jafnframt þátt í Warped túrnum árið 2002. Hljómplatan Jinx seldist í rúmlega 100.000 eintökum í Bandaríkjunum.

Frægð í Japan

Quarashi voru með samning við Sony í Japan. Þeir fóru í tónleikaferðalag árið 2002. Í tónleikaferðalaginu fóru þeir til Japan árið 2002, til höfuðborgarinnar Tókýó og Osaka á hátíðinni Summer Sonic. Í kjölfarið fóru þeir í samstarf við Japönsku sveitina YKZ um tíma. Ómar Swarez, meðlimur Quarashi sagði á þeim tíma, að þeir sem væru nógu klikkaðir og kjánalegir kæmust áfram og yrðu frægir í Japan. Quarashi náði 7 sæti japanska HMV listans með plötunni Guerilla disco. 27 þúsund eintök voru prentuð fyrirfram af plötunni til Japans og allar fyrri plötur hljómsveitarinnar höfðu selst í um 100.000 eintökum í landinu.

Útgefið efni

Breiðskífur

• Quarashi - (1997) - Lax Records/Pop Músík
• Xeneizes - (1999) - Japis
• Kristnihald undir Jökli - (2001) - Sproti
• Jinx - (2002) - Columbia Records/Time Bomb Recordings
• Guerilla disco - (2004) - Skífan/Dennis Records - Sony Japan

Smáskífur

• Switchstance - (1996) - Lax Records
• Stick 'Em Up - (2002)
• Rock On! - (2014)
• Chicago - (2016)

Safnplötur

• Anthology - (2011) - Laxmenn ehf
• Greatest Tricks - (2021)

Tónleikaplötur

• Quarasi á Nasa (Live) - (2011)

Heimildir

  Þessi tónlistargrein er stubbur. Þú getur hjálpað til með því að bæta við greinina.