Virginia Woolf

Úr Wikipediu, frjálsa alfræðiritinu
Virginia Woolf

Virginia Woolf (25. janúar 188228. mars 1941) var breskur rithöfundur, gagnrýnandi og feministi. Hún er í hópi áhrifamestu skáldsagnahöfunda á 20. öld. Auk þess sem verk hennar höfðu mikil áhrif á kvennabaráttu 20. aldar, var Virginia brautryðjandi nýrra aðferða við skáldsagnaritun með notkun hugflæðis og innra eintals. Hún skrifaði um hversdagslega atburði, lagði ekki áherslu á flóknar fléttur eða djúpa persónusköpun heldur á tilfinningalíf og hugmyndir söguhetjanna. Þar takmarkaði hún sig ekki við eina söguhetju heldur ferðaðist úr hugarfylgsnum einnar persónu til annarrar, The Waves er líklega besta dæmi þess. Þekktasta bók Virginiu er þó eflaust skáldsagan To the Lighthouse frá 1927. Nokkrar kvikmyndir hafa verið gerðar um líf skáldkonunnar, nú síðast The Hours (2002) með Nicole Kidman í hlutverki Virginiu.

Virginia Woolf giftist Leonard Woolf, gagnrýnanda, árið 1912. Saman stofnuðu þau Hogarth Press árið 1917. Heimili þeirra var samkomustaður fjölda listamanna, skálda og gagnrýnenda, og kallaðist sá hópur Bloomsbury-hópurinn.

Árin 1895 og 1915 fékk hún taugaáföll, en hún átti við geðræn vandamál að stríða.

Virginia framdi sjálfsmorð þann 28. mars 1941 með því að drekkja sér. Eiginmaður hennar, Leonard, ritstýrði flestum verka hennar sem gefin voru út eftir andlát hennar.

Verk eftir Virginiu sem komið hafa út á íslensku[breyta | breyta frumkóða]

  • 1983 - Sérherbergi - (A Room of One's Own - útg. 1929). Þýðandi: Helga Kress.[1]
  • 2014 - Út í vitann - (To the Lighthouse - útg. 1927). Þýðandi: Herdís Hreiðarsdóttir.[2]
  • 2017 - Orlandó - (Orlando: A Biography - útg. 1928). Þýðandi: Soffía Auður Birgisdóttir.[3][4]
  • 2017 - Mrs. Dolloway - (Mrs. Dolloway - útg. 1925). Þýðandi: Atli Magnússon.[5]

Tilvísanir[breyta | breyta frumkóða]

  1. Magdalena Schram, „Sérherbergi“, 19. júní (tímarit), 1.tbl. 1984
  2. Nanna Hlín Halldórsdóttir, „Hér hefur lífið staðnæmst“, Starafugl.is, 27. nóvember 2014 (skoðað 17. júní 2019)
  3. Skald.is, „Orlandó í þýðingu Soffíu Auðar Birgisdóttur“ Geymt 17 júní 2019 í Wayback Machine, (skoðað 17. júní 2019)
  4. Vísir.is, „Sífelld togstreita á milli staðalímynda og raunveruleikans“, (skoðað 17. júní 2019)
  5. Forlagid.is, „Mrs. Dolloway“, (skoðað 17. júní 2019)