Motherwell F.C.

Úr Wikipediu, frjálsa alfræðiritinu
Jump to navigation Jump to search

Motherwell Football Club er skoskt knattspyrnufélag með aðsetur í samnefndum bæ í Norður-Lanarkshire. Það hefur einu sinni hampað skoska meistaratitlinm og leikið samfleytt í efstu deild frá árinu 1985.

Saga[breyta | breyta frumkóða]

Félagið var stofnað þann 17. maí árið 1886 við samruna liðanna Glencairn FC og Alpha FC með það að markmiði að Motherwell gæti teflt fram einu samkeppnishæfu félagi. Atvinnumennska var tekin upp árið 1893 og fékkk liðið í kjölfarið aðild að skosku deildarkeppninni, fyrst liða frá Lanarkshire. Tveimur árum síðar var leikvangurinn Fir Park tekinn í notkun og hefur það verið heimavöllur félagsins upp frá því.

Fyrstu árin voru keppnisbúningar Motherwell bláir, en árið 1913 var ákveðið að skipta yfir í vínrauða og rafgyllta búninga. Var fyrirmyndin fengin frá enska liðinu Bradford City og eru þessir litir enn í dag ríkjandi í félagsmerki og búningum Motherwell.

John "Sailor" Hunter stýrði Motherwell frá 1910 til 1946 og er nafn hans letrað gylltum stöfum í sögu félagsins. Motherwell hafnaði í þriðja sæti leiktíðina 1919-20, sem var besti árangurinn fram að því. Undir lok þriðja áratugarins hafnaði Motherwell ítrekað í 2.-3. sæti í deildinni. Þessi árangur varð hvatning til frekari landvinninga. Motherwell hélt í keppnisferð til Spánar árið 1927 þar sem leikið var við bestu lið Spánverja og unnust sjö af átta leikjum. Árið eftir lá leiðin til Suður-Ameríku þar sem liðið gerði garðinn frægan.

Fyrsti og eini Skotlandsmeistaratitill Motherwell leit dagsins ljós leiktíðina 1931-32. Liðið vann þá 30 af 38 leikjum sínum og skoraði í þeim 119 mörk. Þar af skoraði framherjinn Willie MacFadyen heil 52 mörk, sem er enn í dag met í efstu deild í Skotlandi. Þetta reyndist eini meistaratitillinn sem annað lið en Celtic og Rangers tókst að vinna á árabilinu 1904-47.

Eftir að Hunter lét af stjórn liðsins tók við tímabil óstöðugleika. Motherwell vann bikarkeppnina og deildarbikarinn árin 1951 og 1952, en árið 1953 féll það í fyrsta sinn niður um deild. Næstu áratugina var liðið oftast nær um eða fyrir neðan miðja efstu deild, féll stundum niður en vann sig yfirleitt beint aftur upp. Fjórði og síðasti stóri titillinn í sögu Motherwell var svo árið 1991 þegar liðið varð bikarmeistari eftir sigur á Dundee United í framlengdum úrslitaleik.

Bikarmeistaratitillinn gaf Motherwell þátttökurétt í Evrópukeppni í fyrsta sinn. Félagið hefur margoft tekið þátt í Evrópukeppnum og tvívegis mætt íslenskum liðum. Árið 2010 sló Motherwell Breiðablik úr Evrópudeildinni en fjórum árum síðar sló Stjarnan skoska liðið úr keppni.

Íslenski landsliðsmaðurinn Jóhannes Eðvaldsson lék með Motherwell um tveggja ára skeið.

Titlar[breyta | breyta frumkóða]

  • Skotlandsmeistarar (1): 1931-32
  • Skoski bikarinn (2): 1951-52, 1990-91
  • Skoski deildarbikarinn (1): 1950-51