Michael Jackson

Michael Jackson
Michael Jackson
	Jackson í Vínarborg árið 1988
Fæddur	Michael Joseph Jackson; 29. ágúst 1958; Gary, Indiana, BNA
Dáinn	25. júní 2009 (50 ára); Los Angeles, Kalifornía, BNA
Önnur nöfn	Michael Joe Jackson
Störf	Söngvari; lagahöfundur; dansari; upptökustjóri;
Maki	Lisa Marie Presley (g. 1994; sk. 1996); Debbie Rowe (g. 1996; sk. 2000);
Börn	3, þ.m.t. Paris
Foreldrar	Joseph Jackson (faðir); Katherine Jackson (móðir)
Fjölskylda	Jackson-fjölskyldan
	Tónlistarferill
Ár virkur	1964–2009
Stefnur	Popp; sálar; ryþmablús; fönk; rokk; diskó; danspopp;
Hljóðfæri	Rödd
Útgefandi	Steeltown; Motown; Epic; Legacy; Sony; MJJ Productions;
Áður meðlimur í	The Jackson 5
Vefsíða	michaeljackson.com
Undirskrift

Michael Joseph Jackson (29. ágúst 1958 – 25. júní 2009), kallaður „konungur poppsins“, var bandarískur tónlistarmaður, dansari og einn vinsælasti skemmtikraftur allra tíma. Söngur hans og dansspor, ásamt skrautlegu einkalífi, færðu honum vinsældir í yfir fjóra áratugi. Hann hafði áhrif á margar tónlistarstefnur. Hann varð einnig þekktur fyrir nokkur mjög flókin og erfið dansspor, eins og „vélmennið“ og „tunglganginn“, og fyrir að hafa breytt tónlistarmyndböndum í listform með myndböndum við lög eins og „Billie Jean“, „Beat It“ og „Thriller“.

Michael Jackson var áttundi í röð tíu systkina í Jackson-fjölskyldunni. Ferill hans sem tónlistarmanns hófst árið 1964 þegar hann kom fram með hljómsveitinni Jackson 5 ásamt eldri bræðrum sínum, Jackie, Tito, Jermaine og Marlon. Hann hóf sólóferil árið 1971 hjá Motown Records og náði alþjóðlegum vinsældum árið 1979 með plötunni Off the Wall. Hann var fyrsti svarti tónlistarmaðurinn sem naut mikilla vinsælda á sjónvarpsstöðinni MTV og átti raunar stóran þátt í vinsældum stöðvarinnar. Platan Thriller varð mest selda plata allra tíma og Bad var fyrsta platan sem gat af sér fimm smáskífur sem náðu toppi bandaríska smáskífulistans.

Frá 9. áratugnum varð Michael Jackson sífellt umdeildari vegna lýtaaðgerða, einkalífs, framkomu og lífstíls. Árið 1993 var hann fyrst ásakaður um að hafa beitt barn fjölskylduvinar kynferðisofbeldi. Málinu lauk með sátt utan dómstóla og Jackson var aldrei ákærður vegna skorts á sönnunargögnum. Árið 2005 var hann sýknaður af ákæru um kynferðisbrot gegn börnum og nokkrum öðrum sakarefnum. Bandaríska alríkislögreglan fann engin gögn um saknæmt athæfi af hans hálfu í hvorugu málinu. Árið 2009 var hann að undirbúa endurkomutónleikaröðina This is It þegar hann lést á heimili sínu við North Carolwood Drive í Holmby Hills-hverfinu í Los Angeles. Dánarorsök var of stór skammtur af própofól sem læknir hans, Conrad Murray, hafði gefið honum. Murray var dæmdur fyrir manndráp af gáleysi árið 2011.

Eftir dauða Jacksons fór danshöfundur hans, Wade Robson, í mál við dánarbú hans og hélt því fram að Jackson hefði misnotað sig kynferðislega frá sjö ára aldri. Þessum ásökunum var lýst í kvikmyndinni Leaving Neverland frá 2019. Myndin hafði mikil áhrif og varð til þess að útvarpsstöðvar tóku lög hans úr spilun. Aðrar heimildarmyndir hafa komið út til varnar Jackson sem hafna þessum ásökunum.

Jackson er einn af söluhæstu tónlistarmönnum allra tíma, með áætlaða 500 til 1000 milljón eintaka sölu á heimsvísu.^[1]^[2] Hann átti 13 smáskífur í efsta sæti Billboard Hot 100-listanum, sem var það fjórða mesta sem listamaður hafði náð á þann lista, og var fyrstur til að eiga smáskífu í efstu 10 sætunum yfir fimm áratugi. Hann vann 15 Grammy-verðlaun, sex Brit-verðlaun, ein Golden Globe-verðlaun og 39 Guinness-heimsmet, þar á meðal sem „frægasti skemmtikraftur allra tíma“. Jackson hefur verið tekinn inn í Frægðarhöll rokksins (tvisvar), Frægðarhöll söngsveitanna, Frægðarhöll lagahöfunda, Frægðarhöll dansins (eini tónlistarmaðurinn sem hefur náð því) og Frægðarhöll rytmablússins.