Katrín Fjeldsted

Úr Wikipediu, frjálsa alfræðiritinu
Stökkva á: flakk, leita
Katrín Fjeldsted (til vinstri) og Ástrós Gunnlaugsdóttir úr stjórnlagaráði.

Katrín Fjeldsted (fædd 6. nóvember 1946) er stjórnmálamaður og heimilislæknir. Foreldrar hennar eru Jórunn Viðar (f. 1918) tónskáld og Lárus Fjeldsted (f. 1918, d. 1985) forstjóri. Katrín er gift Valgarði Egilssyni og eiga þau fjögur börn saman; Jórunni Viðar (f. 1969), Einar Véstein (f. 1973; d. 1979), Véstein (f. 1980) og Einar Stein (f. 1984). Katrín lauk stúdentsprófi frá MR árið 1966 og kandidatspróf frá læknadeild árið 1973. Hún hélt síðan áfram í sérfræðinámi til heimilislækninga í Bretlandi og lauk því 1979.

Katrín hefur meðal annars verið borgarfulltrúi, í borgarráði, formaður heilbrigðisráðs, formaður heilbrigðisnefndar, varaformaður umhverfisnefndar og umhverfismálaráðs, í stjórn Sorpu, á allsherjarþingi Sameinuðu þjóðanna og fleira.

Katrín sat á Alþingi fyrir Sjálfstæðisflokkinn kjörtímabilið 1999-2003 auk þess sem hún hefur setið í landbúnaðarnefnd, iðnaðarnefnd, félagsmálanefnd, umhverfisnefnd, heilbrigðis- og trygginganefnd og allsherjarnefnd. Kjörtímabilið 2003-2007 var hún 2. varaþingmaður Reykjavíkurkjördæmis norður og tók nokkrum sinnum sæti á þinginu. Hún var kosin á stjórnlagaþing 2010 og sat í stjórnlagaráði.

Katrín var formaður Félags íslenskra heimilislækna frá 1997 til 1999. Hún var varaformaður Evrópusamtaka lækna 2006-2007 og 2008-2009, og hefur verið forseti samtakanna síðan 2013.

Heimildir[breyta | breyta frumkóða]